Республикэм ижурналистхэм азыфагу щызэхащэрэ зэнэкъо­къухэу «Патриот», «Адыгеир зэдытиун», «Стоп, коррупция!» зыфиIохэрэм якIэуххэр зэфахьысыжьыгъэх. Зитхыгъэ ыкIи зикъэтын анахь дэгъоу алъытагъэхэм Адыгэ Респуб­ликэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ и Комитет афэгушIуагъ.

Зэхэсыгъор къызэIуихызэ комитетым итхьаматэу Шъхьэлэхъо Аскэр игуапэу журналистхэм къафэгушIуагъ, мыщ фэдэ зэнэкъокъухэм мэхьэнэ ин зэряIэр къыхигъэщыгъ.

— Илъэс къэс журналистхэм тхыгъэ ыкIи къэгъэлъэгъон гъэшIэгъонхэр зэнэкъокъум къырахьылIэ зэрэхъугъэхэр тигуапэ. ЩыIэныгъэм илъэныкъо пстэури IэпэIэсэныгъэ хэлъэу къызэдырагъэу­бытын алъэкIы. ХэушъхьафыкIыгъэ дзэ операциер зэрэкIорэми шъунаIэ тетыгъ. Джащ фэдэу мы аужырэ илъэсхэм социальнэ хъытыухэм Iоф адэшъошIэ, ащкIэ пшъэрылъхэр зэрифэшъуашэу шъогъэцакIэх. ТапэкIи шъуигъэхъагъэхэм шъуа­къыщымыуцоу ыпэкIэ шъулъыкIотэнэу шъуфэсэIо, — къыIуагъ Шъхьэлэхъо Аскэр.

Лъэныкъоу «Патриот» зыфиIорэм апэрэ чIыпIэр къыщыдихыгъ къэлэ гъэ­зе­тэу «Майкопские новости» зыфиIорэм иштат хэмыт корреспондентэу Александра Визняк, республикэ гъэзетэу «Адыгэ макъэм» иобозревателэу Iэшъынэ Сусанэ ятIонэрэ хъугъэ, гъэзетэу «Красное знамя» зыфиIорэм иредактор шъхьа­Iэу Виктория Виятик ящэнэрэ чIыпIэр фагъэ­шъошагъ. ТелерадиокъэтынхэмкIэ къахэщыгъэ­хэр телерадиокомпаниеу «Адыгеим» тематическэ къэтынхэмкIэ къулыкъум иотдел ипащэу ТIэшъу Светлан, къэтынхэр зезыщэу Нэгъэрэкъо Саныет, Шэу­джэн районым изыкI къэбар гупчэ икор­респондентэу Боджэкъо Бэл.

«Адыгеир зэдытиун» зыфиIорэ лъэныкъомкIэ зыфэгушIуагъэхэр республикэ гъэзетэу «Советскэ Адыгеим» иобозревателэу Екатерина Нужнаяр, «Адыгэ макъэм» икорреспондентэу Александра Балабась ыкIи гъэзетэу «Зэкъошныгъэм» икорреспондентэу Ирина Татиури. ТелекъэтынхэмкIэ — КъТРК-у «Адыгеим» иIофышIэхэу ГъукIэлI Сусан, Цыргъой Марианэ, Шъэджэшъэ Азэмат, Тыгъужъ Саныет, Бэгъушъэ Фатим.

Лъэныкъоу «Стоп коррупция» зыфи­Iорэм щагъэшIуагъэх гъэзетэу «Майкопские новости» зыфиIорэм иобозревателэу Вера Корниенкэр, гъэзетэу «Советскэ Адыгеим» иобозревателэу Дмитрий Кизяновыр, «Адыгэ макъэм» иобозревателэу КIарэ Фатим. Телекъэ­тынхэмкIэ — телерадиокомпаниеу «Адыгеим» иIофышIэхэу Евгения Федосеевар, Къудаикъо Алый, ЛIэхъусэжъ Марианэ. Джащ фэдэу хэутын IофхэмкIэ федеральнэ агентствэм ыцIэкIэ афэгушIуагъэх ыпшъэкIэ зигугъу къэтшIыгъэ комитетым иIофышIэхэм ащыщхэм ыкIи лъыхъон патриотическэ клубэу «ШIэжь» зыфиIорэм хэтхэм.