АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр иIофшIэгъухэр игъусэхэу тыгъуасэ Адыгэ республикэ гимназием ихьэкIагъэх. Тилъэпкъэгъу­хэу Адыгеим къэзыгъэзэжьыгъэхэм ясабыйхэр анахьэу зыщеджэхэрэр мы еджапIэр ары. Адыгабзэ нэмыкI зыIумылъ ныбжьыкIэхэм яегъэджэн IэшIэхы къафэмыхъуми, ар зэрифэшъуашэу зэшIуахы, шIэныгъэ арагъэгъоты, зыкI къэралыгъо ушэтынхэри атых.

— Тилъэпкъэгъу­хэм ясабыйхэр щы­Iэныгъэм хэгъэгъо­зэжьыгъэнхэмкIэ Iоф­шIэнышхо шъошIэ, ащкIэ лъэшэу тышъу­фэраз. Гимназиер агу рихьэу мыхэм къыхахы. Адыгабзэм изэгъэшIэнкIэ мы еджапIэр сыдигъокIи анахь дэгъухэм ясатыр хэт. Мыщ ще­джэхэрэм, къэзыухыгъэхэм, ны-тыхэм ягугъу дахэкIэ ашIы, ащ мэхьанэ ин иI. ШъуиIофшIэнкIэ джыри нахь хэхъоныгъэхэр шъушIынхэу сышъуфэлъаIо, — къыIуагъ Шъхьэлэхъо Аскэр.

Нэужым щытхъу тхылъхэмрэ шIухьафтынхэмрэ афигъэшъошагъэх Адыгэ республикэ гимназием ипащэу КIыкI Нуриет, икIэлэпIоу Фрида Кореловам, урысыбзэмкIэ кIэлэегъаджэу Хъоц Ларисэ, адыгабзэмкIэ ыкIи адыгэ литературэмкIэ кIэлэегъаджэхэу СтIашъу Зурет, Темзэкъо Маринэ, Лъэустэнджэл Фатимэ, ГъукIэлI Марет.

ЯIофшIэн уасэ къызэрэфашIыгъэмкIэ зэрафэразэхэр, тапэкIи яIофшIэн зэрэлъагъэкIотэщтыр гимназием ипащэ къы­Iуагъ. Адыгабзэм изэгъэшIэн игъэкIотыгъэу зэрэпылъхэр, ар языгъэшIэрэ кIэлэегъаджэхэр зэкъотхэу зэрэлажьэхэрэр къыIуагъ. КъыткIэхъухьэрэ лIэужхэм яныдэлъфыбзэ зэрарагъэшIэщтым ыуж итых. Зихэкужъ къэзыгъэзэжьыгъэхэм ясабыйхэр рэхьатынхэм, ялэгъухэм ащыщ хъунхэм, ныбджэгъуныгъэ азыфагу илъыным нахьыжъхэр сыдигъокIи дэлажьэх.

Гимназием чIэсхэм шIэныгъэ зэрэзэрагъэгъотырэм дакIоу творчествэм ылъэныкъокIи гъэхъэгъэшIухэр яIэх. АщкIэ ищыкIагъэр зэкIэ аIэкIэлъ. БэмышIэу сурэтышIэу Къат Теуцожь галерее къыфызэIуахыгъ, лъэныкъо зэфэшъхьафхэм афэгъэхьыгъэ, купкI ин зиIэ сурэт пчъагъэ еджапIэм къыпалъагъ.

Iофтхьабзэм икIэух гимназием икIэлэеджакIохэм ясэнаущыгъэ къагъэлъэгъуагъ, Iур-Iупчъэхэр къаIуагъэх, усэ къеджагъэх, лъэпкъ мэкъамэхэр къырагъэIуагъэх.

ДЕЛЭКО Анет. Сурэтыр А. Iэшъын.