Урысыем ичемпионат и Суперлигэ хэлэжьэрэ «АГУ-Адыифыр» зэнэкъокъум апэрэ чIыпIэр щызыIыгъ «Ростов-Доным» дешIагъ. «АГУ-Адыиф» — «Ростов-Дон» 24:39 (11:19).

ЗэIукIэгъум ипэублэ тикомандэ дэеу ешIагъ, апэрэ Iэгуаор къэлапчъэм зыдадзагъэр я 13-рэ такъикъыр ары ныIэп. А уахътэм хьакIэхэм Iэгоуи 7 къыдадзагъ. «АГУ-Адыифым» щешIэрэ Виктория Мещеряковам пенальтикIэ Iэгуаор къэлапчъэм дидзагъ. Мы ешIэгъум ащ пенальтищ ыгъэцэ­кIагъ, зэкIэри дидзагъэх.

Зэнэкъокъум пэрытныгъэ щызыIыгъ «Ростов-Доным» щешIэхэрэ Ярослава Фроловар, Дарья Стаценкэр ыкIи Екатерина Зэленковар Мыекъуапэ къэкIуагъэхэп. Ау ахэр ахэмытхэми командэр зы­лъызыщэн зылъэкIыщт ешIакIоу хэтыр макIэп. Республикэм, икъэлэ шъхьаIэ щешIагъэх олимпийскэ чемпионкитIу. «АГУ-Адыифым» хэт Кобл Зурет мы мафэм ешIапIэм къихьагъэп, ау ащ ипшъэ­­рылъхэр дэгъоу агъэцэкIагъэх Анастасия Алексеевам ыкIи Анастасия Селиверстовам. Тигандболисткэхэм къахэщыгъ Валентина Томилинар, ар тикомандэкIэ ешIэкIо анахь дэгъоу къыхахыгъ.

ЯтIонэрэ таймым къэлэпчъэIут ныбжьыкIэу Екатерина Пивневар цыхьэшIэгъоу ешIагъ, ащ Iэгоо заулэ къызэкIидзэжьыгъ. Ау апэрэ чIыпIэм зэрэщытхэр хьа­кIэхэм джыри зэ къагъэшъып­къэжьыгъ, текIоныгъэр къыда­хыгъ. Джырэ уахътэм Адыгеим икомандэ я 10-рэ чIыпIэм щыт.

Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 36. 2. «ЦСКА» — 31. 3. «Астраханочка» — 29. 4. «Черноморочка» — 28. 5. «Лада» — 25. 6. «Кубань» — 19. 7. «Динамо-Синара» — 15. 8. «Звезда» — 12. 9. «Ставрополье» — 10. 10. «АГУ-Адыиф» — 8. 11. «Луч» — 6. 12. «Университет» — 1.

ПэшIорыгъэшъ едзыгъом къыдыхэлъытэгъэ ешIэгъуищ «АГУ- Адыифым» джыри иIэщт, «Астраханочкэм», «Звездам» ыкIи «Ладэм» адешIэщт.