ИлъэсыкIэ мэфэкIхэм яхэгъэунэфыкIын щынэгъончъэу щытыным епхыгъэ Iофыгъохэр АР-м хэгъэгу кIоцI IофхэмкIэ и Министерствэ зэрехьэх.

Ведомствэм къызэритыгъэмкIэ, илъэсыкIэм епхыгъэ мэ­фэкI Iофтхьабзэхэр зыщыкIощтхэ чIыпIэхэр терроризмэм ылъэныкъокIэ щынэгъончъэу щытынхэм фэшI цIыфхэр бэу зыхэлэжьэрэ Iофтхьабзэхэм террористическэ актхэр къащымыхъунхэм, экстремизмэ нэшанэ зиIэ зекIуакIэхэр зэрамыхьанхэм хэбзэухъумакIохэр лъыплъэщтых. Джащ фэдэу я 4 — 5-рэ класс зиIэ пиротехническэ пкъыгъохэр зыщаIыгъхэ псэуалъэхэр щынэгъончъэным ишапхъэхэм адештэхэмэ ауплъэ­кIущтых. Мы пкъыгъохэр хэ­бзэнчъэу зыгъэзекIохэрэм пы­тагъэ хэлъэу адэзекIощтых, пшъэдэкIыжь арагъэхьыщт.

Тыгъэгъазэм и 28-м къыщегъэжьагъэу 2024-рэ илъэсым щылэ мазэм и 8-м нэс мэфэкI пцIыикъхэр зыщагъэуцугъэ чIыпIэхэм, урамхэм, гупчэхэм, парк­хэм ящынэгъончъагъэ къэу­хъумэгъэным фэшI хэбзэухъумакIохэм гъэлъэшыгъэ шIыкIэм тетэу къулыкъур ахьыщт.

Республикэм щызэхащэрэ мэфэкI Iофтхьабзэхэр щынэ­гъончъэнхэм, общественнэ рэ­хьатныгъэр къэухъумэгъэным волонтерхэр къыхэгъэлэжьэ­гъэнхэм мэхьанэшхо зэриIэр къыхагъэщы.

ИлъэсыкIэр къэблагъэ зы­хъукIэ къэорэ пкъыгъохэм ягъэ­федэн нахь жъугъэу къежьэ. Ана­хьэу ар джэгуалъэ зышIыхэ­рэр кIэлэцIыкIу Iэтахъохэр ары.

УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Рес­публикэм щыIэм къызэрэщаIуа­гъэмкIэ, ИлъэсыкIэм инэшэнэ шъхьаIэхэм ащыщых хлопушкэхэр, петардэхэр ыкIи мэшIоустхъор. МэфэкIыр гум къинэ­жьэу ахэм къагъэкIэракIэ. Ау машIом зыкъимыштэнымкIэ щы­нэгъончъагъэр къызыдамы­лъытэкIэ, тхьамыкIагъоу къы­хэкIырэр макIэп.

КъулыкъушIэхэм къызэрэхагъэщыгъэмкIэ, ахэр хэушъхьафыкIыгъэ щапIэхэм къащыпщэфынхэу щыт. Ащ дакIоу къыхэпхырэ пкъыгъом сертификат пылъмэ, узэрэдэзекIощт шIыкIэр урысыбзэкIэ зэрытхэгъэ тхьапэр игъусэмэ, пIалъэу иIэм игъо имыкIыгъэмэ уакIэупчIэн фае. Ахэр къызыщышъуамыгъэлъэ­гъугъэ щапIэм шъущымыщафэмэ нахь тэрэз.

Джащ фэдэу къэорэ пкъыгъо­хэр къэшъущэфыхэ зыхъукIэ ятеплъэ дэгъоу шъуеплъ: зэхэцIыцIагъэу, уцIыныгъэу, зыкIоцIылъым чагъэхэр иIэхэ хъущтэп. Ар нэпцIымэ къызэрэп­шIэщт нэшэнэ шъхьаIэр — зыкIоцIылъ щыхьагъэм къыдэзыгъэкIыгъэм иреквизитхэм, щы­нэгъончъэу узэрэдэзекIощтым, зыщыбгъэфедэщт чIыпIэм якъэ­бар тетхэгъэнэу щыт. Хабзэ зэрэхъугъэу, илъэс къэс ошIэ-дэмышIэ IофхэмкIэ ыкIи хэгъэгу кIоцI IофхэмкIэ министерствэхэм ялIыкIохэр зэгъусэхэу къэорэ пкъыгъохэр хэбзэнчъэу зыщащэхэрэ чIыпIэхэр къызэдакIухьэх.

ИлъэсыкIэ мэфэкIхэр окIофэхэ ошIэ-дэмышIэ Iофхэр ыкIи машIор къэмыгъэхъугъэнхэмкIэ ГъэIорышIапIэм Iофтхьэбзэ те­дзэхэр егъэхьазырых.