Урамыр агъэкIэжьыщт фэшI
Мыекъуапэ шъхьафит зашIыжьыгъэр илъэс 55-рэ зэхъум ащ ыцIэ зыфаусыгъэгъэ урамэу Черемушкэм щыIэр къихьащт илъэсым агъэкIэжьынэу агъэнафэ.
Адыгэ Республикэм и ЛIышъхьэ «зэдэгущыIэгъу занкIэу» цIыфхэм адыриIагъэм а упчIэр къыщаIэтыгъагъ.
Геннадий Митрофановым къызэриIуагъэмкIэ, лъэпкъ проектэу «ПсэупIэр ыкIи тыкъэзыуцухьэрэ дунаир» зыфиIорэмрэ АР-м и ЛIышъхьэ къыгъэуцугъэ пшъэрылъымрэ къапкъырыкIыхэзэ Iофым фежьагъэх, проект-сметэ документацием игъэхьазырын дэлажьэх.
КIэлэцIыкIу джэгупIэр шIыжьыгъэным, урамхэр къэгъэнэфыгъэнхэм, уц-къэгъагъэхэмкIэ гъэкIэрэкIэгъэным, кушъхьэфэчъэ паркыр гъэпсыгъэным, тIысыпIэхэр тегъэуцогъэнхэм, стендхэу адыгабзэкIи урысыбзэкIи къэбархэр зытетхэгъэщтхэр, нэмыкI Iофыгъохэри ащ щызэшIохыгъэнхэу агъэнафэ. ЫпэкIэ щыIагъэхэм ачIыпIэкIэ, фонтан гъушъэхэри ашIыщтых. АР-м и ЛIышъхьэ унашъо къафишIыгъ транспортымрэ лъэсгъогухэмрэ зэрэзэхэкIыщтхэ шIыкIэм дегупшысэнхэу, ахэм атыралъхьащтхэр къыдалъытэнхэу, декоративнэ-архитектурэ шэпхъэшIухэр агъэфедэнхэу къяджагъ.
«Пкъыгъо пстэури къыдэлъытагъэу, акъылыгъэ хэлъэу проектыр гъэцэкIагъэ хъумэ, зызыгъэпсэфыщтхэмкIэ урамыр Iэрыфэгъу хъущт. ШъолъырыкIэхэу дгъэцэкIэжьхэрэр ыкIи кIэу тшIыхэрэр уахътэм диштэхэу, гъэшIэгъонхэу гъэпсыгъэнхэ фае», — къыхигъэщыгъ КъумпIыл Мурат.