Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ мэкъуогъум и 1-м Адыгеим къыщызэIуа­хыгъ, ащ епхыгъэ IофышIэхэу районхэм ащыIэхэми япшъэ­рылъхэр зэри­фэшъуашэу агъэцакIэх. Шэу­джэн районымкIэ мыщ исоциальнэ координато­рэу Дачъэ Ма­ринэ зэIукIэгъу дытиIагъ, яIофшIэн зэрэзэхащэрэр къед­гъэIотагъ.

ТигущыIэгъу илъэс 27-м къыкIоцI гъэсэныгъэм ылъэныкъокIэ IофшIэн зэфэшъхьафхэр ыгъэцэкIагъэх. 2015-рэ илъэсым къыщегъэжьагъэу волонтерхэм чанэу ахэт, Шэуджэн районым мыщ фэдэ апэрэ отрядэу щызэхащагъэм пэщэныгъэ дызэрихьагъ.

— Фондым Iоф щысшIэнэу сыгукIэ сыфаеу сыIухьагъ. ЩыIэныгъэм чIыпIэ къин ригъэуцогъэ цIыфхэм садеIэнэу сыдигъуи сыфэягъ. Джы мэхьанэ зиIэр нэбгырэ гъэнэфагъэм IэпыIэгъу езгъэгъотын зэрэслъэкIыщтыр ары, — хи­гъэунэфыкIыгъ Маринэ.

Социальнэ координаторым къызэри­IуагъэмкIэ, фондэу «Хэгъэгум иухъума­кIохэр» зыфиIорэм ипшъэрылъ шъхьа­Iэхэр хэушъхьафыкIыгъэ дзэ операцием хэлажьэхэрэм, хэкIодагъэхэм, ахэм яунагъохэм ящыкIэгъэ IэпыIэгъу ягъэгъотыгъэныр ары. Амал зэриIэкIэ ахэм яIофыгъохэр зэшIуахых. АщкIэ район администрацием, гупчэ сымэджэщым, цIыфхэм социальнэ фэIо-фашIэхэр ­афэзыгъэцэкIэрэ Зэхэубытэгъэ гупчэм, нэ­мыкI организациехэм зэпхыныгъэ адыряIэу мэлажьэх.

— Мэкъуогъум и 1-м къыщегъэжьагъэу тыгъэгъазэм нэс нэбгырэ 70-мэ зыкъытфагъэзагъ, ахэм Iофыгъуи 158-рэ къытахьылIагъ. Анахьэу зыгъэгумэкIыщтыгъэхэр «Заом иветеран» зыфиIорэ статусыр къафагъэшъошэныр, феде­ральнэ ыкIи шъолъыр фэгъэкIотэнхэр ыкIи ахъщэ тынхэр къаратынхэр, унэгъо хъыз­мэтым ылъэныкъокIэ къэуцурэ гу­мэкIыгъохэр афызэшIохыгъэнхэр, медицинэ IэпыIэгъур, кIэлэцIыкIухэр зыгъэ­псэфыпIэхэм агъэкIонхэр, нэмыкIхэри. Тэ типшъэрылъыр мы Iофыгъохэр «зы шъхьангъупчъэ» шIыкIэм иамалхэмкIэ афызэшIотхынхэр ары, — къыхигъэ-щыгъ Дачъэ Маринэ.

Iофыгъохэм янахьыбэр афагъэцэ­кIагъ, къэнагъэр янэплъэгъу ит, ахэмкIэ унэшъо гъэнэфагъэхэр щыIэх. Социальнэ координаторым къызэриIуа­гъэмкIэ, ти­лIыхъужъхэм ыкIи ахэм ­яунагъохэм Iэ­пыIэгъу арагъотын закъор арэп зыуж итхэр. ЛIыхъужъныгъэу ахэм зэрахьэрэр къыткIэхъухьэрэ лIэужхэм зэралъагъэ­Iэсыщтхэм ренэу ыуж итых. ХэушъхьафыкIыгъэ дзэ ­операцием хэлажьэхэрэм зэIукIэгъухэр адашIых, зыпсэ зыгъэтIылъыгъэхэм яшIэжь агъэлъапIэ.

Iэшъынэ Сусан.