Республикэ «Адыгэ Ха­сэм» и Совет изичэзыу зэхэсыгъо джырэблагъэ иIагъ. 2023-рэ илъэсым Хэсашъхьэм Iофэу ышIа­гъэр ащ щызэфа­хьысыжьыгъ, тапэкIэ пшъэрылъэу яIэхэм атегущыIагъэх.

Шъугу къэдгъэкIыжьын, мы илъэсым имэзае Адыгэ Хасэм изэфэхьысыжь-хэдзын зэфэсэу щыIагъэм Советым кIэу хэтыщтхэр щагъэнэфагъэх, организацием итхьаматэу ЛIымыщэ- къо Рэмэзан илъэсищ пIалъэкIэ иIэнатIэ къыIуагъэнагъ.

Зэхэсыгъом хэлэжьагъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, динлэжьхэр, Адыгеим иобществэу «Шыу Хасэм» хэтхэр, нэмыкI­хэри.

Адыгэ Хасэм итхьаматэу ЛIымыщэкъо Рэмэзан изэфэ­хьысыжьхэм ащыхигъэунэфыкIыгъ общественнэ-политикэ ыкIи культурнэ щыIакIэм фэ­гъэхьыгъэ Iофтхьабзэу Адыгэ Республикэм щыкIуагъэхэм Хэ­сашъхьэм хэтхэр чанэу зэрахэлэжьагъэхэр.

— Зэхэсыгъом Хэсэ къутамэу тиIэхэм ялIыкIохэм зэфэхьысыжьхэр къыщашIыгъэх. Мы илъэсым Адыгэ Хасэм икъутамэ Джэджэ районым щызэхэтщагъ. Ащ нэмыкIэу ныбжьыкIэ куп зэхатщи илъэс реным ахэм та­дэлэжьагъ, дэгъоу зыкъызэрагъэлъэгъуагъэм къыхэкIэу ахэр Хэсэ къутамэм хэдгъэхьагъэх, — къыIуагъ Рэмэзан.

Мы илъэсым Адыгэ Хасэр республикэм щырекIокIыгъэ Iофтхьэбзэ зэфэшъхьафхэм ахэ­лэжьагъ. Ахэр зыфэдэхэм къатегущыIагъ Адыгэ Хасэм итхьаматэ. АР-м лъэпкъ Iоф­хэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет кIэщакIо зыфэхъугъэ хьакIэщым, адыгэ шъуашэм и Мафэ, ЗыкIыныгъэм и Мафэ, нэмыкIыбэхэм ахэлэжьагъэх. Ащ нэмыкIэу ежь Адыгэ Хасэм игукъэкIыкIэ цIыф гъэшIэгъонхэм ныбжьыкIэхэр аIуагъэкIагъэх. Ахэр археологэу Тэу Ас­лъан, шIэныгъэлэжьэу Бырсыр Абдулахь, IэкIыб къэралым къикIыжьыгъэхэм ащыщэу Хьатам Нэдждэт. Ащ нэмыкIэу, ныбжьыкIэхэм яшIоигъоныгъэкIэ, Лъэпкъ театрэм ипащэу Ацумыжъ Рустам къыхагъэлажьи, Iэнэ хъурае рагъэкIокIыгъ.

— IэкIыб къэралхэм ащыIэ тилъэпкъэгъухэр тинэплъэгъу идгъэкIыхэрэп, ахэм дэгъоу тадэлажьэ. Лъэпкъ зэфыщы­тыкIэхэм ыкIи кощын Iофхэм алъэныкъокIэ амалэу тиIэм елъы­тыгъэу IэпыIэгъу тафэхъу. Ащ нэмыкIэу бэмышIэу Да­гъыстан къыщыхъугъэ зэпэуцужь зэхахьэхэм афэдэхэм тиныбжьыкIэхэр ащыухъумэгъэнхэм фэшI динлэжьхэр къыхэдгъэла­жьэхэзэ зэIукIэхэр редгъэ­кIокIыгъэх. Ащ нэмыкIэу, районхэр къэткIухьэхэзэ Хэсэ къу­тамэхэм тадэлажьэ. Джащ фэдэу Шъхьащэфыжь, Налщык, Мэздэгу, Краснодар тащыIагъ. Бзэм икъызэтегъэнэн, тикIэ-ла­кIэхэм ныдэлъфыбзэр ашIэным Iоф адэтэшIэ. Ащ пае зэ­нэкъокъу зэфэшъхьафхэр афызэхэтщагъ, диктантхэр атхыгъ. Бзэм икъэухъумэн фэгъэхьы­гъэу АР-м и ЛIышъхьэ дэжь щызэхэщэгъэ Советым иIофшIэн тыхэлэжьагъ. КIэлэцIыкIу IыгъыпIэхэр, еджапIэхэр къэткIухьэхэзэ тадэгущыIагъ, гумэкIыгъохэм защыдгъэгъозагъ, хэкIыпIэу щыIэхэм тарыгущы­Iагъ, — къыIуагъ ЛIымыщэкъо Рэмэзан.

Хасэм итхьаматэ къызэри­IуагъэмкIэ, Хэсэ къутамэхэр зыщамыгъэпсыгъэу къэнагъэхэр Адыгэкъал, Теуцожь ыкIи Шэуджэн районхэр ары. Адрэ­хэм чанэу Iоф адашIэ. Къэнагъэхэми мэкIэ-макIэзэ къута­мэ­хэр ащагъэпсыщтых, Iоф къа­дэзышIэщт ныбжьыкIэхэр агъэнэфэщтых.

КIАРЭ Фатим.