Республикэм икъэлэ шъхьаIэ ахэр щаублэгъахэх. Тыгъэгъазэм и 22-м къыщегъэжьагъэу Мыекъуапэ ичIыпIэ зэфэшъхьафхэм ахэр ащэкIох.

Ау анахь шъхьаIэхэр мы ма­фэхэм зэхащэщтых. ИлъэсыкIэ пцIыикъ шъхьаIэр Лениным ыцIэ зыхьырэ гупчэм къыщызэIуа­хыщт. Ар нахьыжьэу рахъухьэгъагъ, ау уаер пэрыохъу зэра­фэхъугъэм къыхэкIэу зэкIа­хьэн фае хъугъэ. Тыгъэгъазэм и 27-м Мыекъуапэ ипцIыикъ шъхьаIэ мэфэкI шIыкIэм тетэу зэлъыхагъэнэщт. Пчыхьэм сы­хьатыр 6-м ар аублэщт, хэла­жьэ зышIои­гъохэр зэкIэ къэлэ гупчэм ра­гъэблагъэх. Тыгъэгъа­зэм и 30-м илъэсыкIэ ермэ­лыкъ иныр ура­мэу Советскэм щы­кIощт. КъыкIэлъыкIорэ мафэм атлетикэ псынкIэмкIэ зэнэ­къокъу­хэр къэ­лэ паркым щыкIощтых.

Щылэ мазэм изыгъэпсэфыгъо мафэхэр гъэшIэгъоныщтых ыкIи чэфыщтых, и 3-м къыщыублагъэу и 13-м нэс Iофтхьабзэ зэ­мы­лIэужыгъохэр Мыекъуапэ щырагъэкIокIыщтых. Щылэ ма­зэм и 3 — 6-м, мафэм сыхьатым 3-м къыщегъэжьагъэу Ле­ниным ыцIэ зыхьырэ гупчэм концертхэр, къэлэ паркым сабыйхэм апае программэ гъэшIэгъонхэр ащызэхащэтых. Джащ фэдэу культурэм и Унэу «Гигантым» мультфильмэхэр къыщагъэлъэгъощтых, шахмэтхэмкIэ зэнэ­къо­къухэр зэхащэщтых. Щылэ мазэм и 7-м, Мыекъуапэ ипцIыикъ шъхьаIэ дэжь, мафэм сыхьатыр 1-м концерт щыра­хъухьагъ. А ма­фэм, ау нахь кIасэу, сыхьатыр 3-м Черемушкэми щычэфыщт. Щылэ мазэм и 8-м шIоигъоныгъэ зиIэхэм Мыекъуапэ икIэрыкIэу къызфызэIуахын алъэкIыщт. Сыхьатыр 12-м Лениным игупчэ экс­курсие щаублэщт.

Щылэ мазэм и 12-м псэупIэу Родниковэм, и 13-м Ханскэм илъэсыкIэ чъыгхэр мэфэкI шIыкIэм тетэу ащызэфа­шIы­жьыщт.

Мыекъуапэ ипцIыикъ шъхьаIэ имэфэкI остыгъэхэр щылэ ма­зэм и 13-м агъэкIосэжьыщтых. Аужырэ илъэсыкIэ Iофтхьабзэ­хэм ахэлажьэ зы­шIоигъохэр зэкIэ ащ рагъэ­блэгъэщтых.

Анцокъо Ирин. Сурэтыр: авторым ий.