СурэтышIэу Шъэожъ Хьасан илъэс 60 зэрэхъурэм фэгъэхьыгъэ хэушъхьафыкIыгъэ къэгъэлъэгъонэу «Фантазия свободы» зы­фиIорэр Адыгэ Республикэм исурэт къэ­гъэлъэгъуапIэ къыщызэIуахыгъ.

МэфэкI зэхахьэм къекIолIагъэхэм закъыфигъэзагъ Къо­кIыпIэм щыпсэурэ лъэпкъхэм яискусствэкIэ Къэралыгъо музеим икъутамэ ипащэу Шъэуап­цIэкъо Аминэт:

«Къэгъэлъэгъоным зэрэщытэу тарихъ хъугъэ-шIагъэхэм ягупшысэ ухещэ, а зэкIэ нэм къыкIегъэуцо. Шъэожъ Хьасан итворческэ проектхэр гъэшIэгъоных. Скульптурэхэу, сурэтхэу, каллиграфическэ IофшIэнэу непэ тинэрылъэгъухэм ар къаушыхьаты».

Сурэт къэгъэлъэгъуапIэм ипа­щэу, Урысыем культурэмкIэ изаслуженнэ IофышIэу, зэлъа­шIэрэ сурэтышIэу, архитекторэу Бырсыр Абдулахь зэхахьэм къыщиIуагъ Шъэожъ Хьасан зэ­хищэгъэ къэгъэлъэгъоным ти­шIэжь къызэрагъэбаирэр, лъэпкъ­хэр зэрэзэфищэхэрэр.

Зэлъэпкъэгъухэм яIэпэIэсэныгъэ искусствэм къызэращагъэлъагъорэм уасэу фишIыгъэр адыгэмэ ящыIэныгъэ къы­пкъырэкIы. IэпэIасэр Сирием къыщыхъугъэми, адыгэ чIыгур ыпсэ хэтIагъ, лъэпкъ фэмэ-бжьымэр иIэшIагъэхэм ахэо­лъагъо.

«Искусствэм уфэлэжьэныр псынкIэп. Сикъэлэмыпэ къы­чIэкIыгъэ сурэтхэр шъуинэры­лъэгъу. Лъэпкъым къыкIугъэ гъогу къиным непэрэ мафэр хэгъэкIухьагъэу сурэтхэмкIэ къэсэIуатэ.

ЦIыфхэм азыфагу зэгурыIоныгъэ илъыныр ары сиIофшIагъэхэм ямэхьанэ, — къыхигъэщыгъ Шъэожъ ­Хьасан.

СурэтышIыр Сирием икъалэу Алеппо къыщыхъугъ, ащ ще­джагъ. 1998-рэ илъэсым Адыге­им къэкIожьыгъ, непэ АКъУ-м икафедрэ идоцент. АР-м исурэтышIхэм якъэгъэлъэгъонхэм чанэу ахэлажьэ.

Хьасан иIофшIэгъухэм ижъы­рэ лъэхъаным Меккэр, Мединэр зэрэщытыгъэхэм, диным пIуныгъэ мэхьанэу иIэм, искусствэм исаугъэтхэм блэкIыгъэ лIэшIэгъухэр къызэрагъэлъагъохэрэм, фэшъхьафхэм уагъэгъуазэ. Сурэтхэр щыIэныгъэм щыщых, куоу уагъэгупшысэ. Адыгэ ха­бзэр лъэпкъ гупшысэм къы­пкъырэкIы. Мыщ фэдэ искусствэр щыIэныгъэм иIотакIу.

«ТхьэрыIо зимыIэм шъыпкъэ иIэп» аIо адыгэмэ. Уижъ ыIорэм уедэIун зэрэфаем адыгэ хабзэми, Ислъам динми мэхьэнэ хэхыгъэ щыряI. НыбжьыкIэхэр шIэжьым зэрэфагъасэхэрэр, лъэпкъ шэн-хабзэхэм зэрафапIухэрэр музеим щыкIогъэ зэхахьэм къыщаIуагъ.

Адыгэ Республикэм ишIэныгъэлэжьхэм ащыщхэр, лъэпкъ интеллигенцием инахьыжъ гъэшIуагъэхэр, АР-м культурэмкIэ и Министерствэ илIыкIохэр, еджэпIэ зэфэшъхьафхэм ачIэс­хэр, журналистхэр ыкIи искусствэр зикIасэхэр Iофтхьабзэм хэлэжьагъэх. МэфэкI зэхахьэр зэгъэфагъэу, узIэпищэу гъэпсыгъагъ.

СурэтышIым иIофшIагъэхэр къихьащт илъэсым щылэ мазэм и 31-м нэс къагъэлъэгъощтых, шIоигъоныгъэ зиIэхэр ащ еплъынхэ алъэкIыщт.

Лъэпшъыкъо Фатим. Сурэтхэр авторым тырихыгъэх.