Наркотикыр хэбзэнчъэу къызэрэригъэкIокIыщтыгъэм епхыгъэу Адыгеим щыпсэурэ хъулъфыгъэм ылъэныкъокIэ къызэIуахыгъэ уголовнэ Iофым фэгъэхьыгъэ унашъоу хьыкумым ышIыгъэм кIуачIэ иIэ хъугъэ.

ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ыкIи АР-м хэгъэгу кIоцI IофхэмкIэ и Министерствэ наркотикхэр къызэрэрагъэкIокIырэм лъыплъэгъэнымкIэ гъэIоры­шIапIэм икъулыкъушIэхэр зэгъу­сэхэу зэрахьэгъэ Iофтхьабзэхэм яшIуагъэкIэ бгъэфедэ мыхъущт веществор хэбзэнчъэу къезы­гъэкIокIыщтыгъэ илъэс 26-рэ зыныбжь хъулъфыгъэу Мыекъопэ районым щыщыр къау­бытыгъ.

Мы илъэсым имэлылъфэгъу мазэ щынэгъончъэнымкIэ фе­деральнэ къулыкъум и ГъэIорышIапIэу АР-м щыIэм икъулы­къу­шIэхэм къэбар къаIэкIэхьагъ Алексей Самойловым республикэ гупчэм наркотикхэр къыщыригъэ­кIокIхэу. Къэбарыр зауплъэкIум шъыпкъэу къычIэкIыгъ.

КъулыкъушIэхэр зэгуцафэ­щтыгъэхэ хъулъфыгъэр Мыекъуа­пэ къыщаубытыгъ. БзэджашIэм иавтомобиль къызалъыхъум, зы­­щыщыр амышIэрэ веществор зэрылъ зэкIоцIыщыхьэгъэ къэмлэнэ 25-рэ къырагъотагъ. Ащ нэмыкIэу Интернет зэпхыныгъэ­хэмкIэ IуигъэкIын мурад иIэу мэзым щигъэбылъыгъэу зы къэм­ланэ къыIахыгъ.

Къагъотыгъэ веществор зэкIэ АР-м хэгъэгу кIоцI IофхэмкIэ и Министерствэ иэкспертнэ-криминалистическэ гупчэ агъэ­хьыгъ. Ащ иIофышIэхэм зэрагъэунэфыгъэмкIэ, къэмланэхэм грамми 9 хъурэ героиныр акIоцIылъыгъ.

Мы хъугъэ-шIагъэмкIэ АР-м хэгъэгу кIоцI IофхэмкIэ и Минис­терствэ иотделэу Мыекъуапэ щы­Iэм уголовнэ Iоф къызэIуихыгъ.

Мыекъопэ къэлэ хьыкумым А. П. Самойловым илъэси 8 хьапс тырилъхьагъ.