Агъэмысагъ
Гъэсэныгъэ тедзэ зыщызэрагъэгъотырэ унэе учреждением ипащэу Iоф зышIэщтыгъэм ылъэныкъокIэ уголовнэ Iофэу къызэIуахыгъэм хэплъагъэх ыкIи унашъоу ашIыгъэм кIуачIэ иIэ хъугъэ.
Унэе ухъумакIохэр зыщагъэхьазырырэ курсхэр къаухыгъэу хэбзэнчъэу свидетельствэхэр зэраритыгъэмкIэ ар агъэмысэ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм зэригъэунэфыгъэмкIэ, гъэсэныгъэ тедзэ зыщызэрагъэгъотырэ унэе учреждениеу «Школа охраны «Феникс» зыфиIорэм иучредителэу Р. А. БрантIым мызэу, мытIоу къуалъхьэ къыратызэ унэе ухъумакIохэр рагъэджагъэхэу ыкIи медицинэ уплъэкIунхэр арагъэкIугъэхэу тхьэпэ нэпцIхэр аритыгъэх.
ГъэIорышIапIэм икъулыкъушIэхэм оперативнэ-лъыхъун Iофтхьабзэу зэрахьагъэхэм къакIэлъыкIоу Р. А. БрантIым Урысыем щыпсэурэ нэбгырэ 11-мэ мыщ фэдэ документхэр афигъэпсыным пае къуалъхьэу сомэ мини 126-рэ къаIихыгъэу къаубытыгъ.
Материалэу къаугъоигъэхэмкIэ Р. А. БрантIым ылъэныкъокIэ Урысыем и Следственнэ комитет иследственнэ ГъэIорышIапIэу АР-м щыIэм уголовнэ Iоф къызэIуихыгъ ыкIи зэхифыгъ. АР-м и Мыекъопэ къэлэ хьыкум унашъоу ышIыгъэмкIэ Р. А. БрантIым тазырэу сомэ 1200000 тыралъхьагъ, джащ фэдэу унэе ухъумэкIо организациехэм илъэси 2 пIалъэкIэ IэнатIэ ащиIыгъын ымылъэкIынэу фагъэпытагъ.
Мы унашъом кIуачIэ иIэ хъугъэ.