ХэушъхьафыкIыгъэ дзэ операцием хэлажьэрэмэ апае Пшызэ къэзэкъы­дзэм и Мыекъопэ къэзэкъ отдел къыу­гъоигъэ шIу­шIэ ­Iэпы­Iэгъур тыгъуасэ ытIупщыгъ.

Ар зэшIуихыгъ Адыгеим икъэзэкъ ныбжьыкIэхэм я Союз.

Союзым итхьаматэу Екатерина Загорулько къызэриIотагъэмкIэ, дзэ­кIолIхэм къафаугъоигъэ щыгъын фабэхэм, ренэу ящыкIэгъэ пкъыгъохэм ямызакъоу, илъэсыкIэ шIухьафтынхэри ахэм арагъэгъусагъэх.

— Мы IэпыIэгъур я 41-у щыт, тоннитIу фэдиз къэтыугъоигъ. Адыгеим икъэ­зэкъ ныбжьыкIэхэм я Союз хэтхэм афэшъхьафэу IэпыIэгъум икъэугъоин епхыгъэ Iофым къыхэлэ­жьагъэх республикэ еджапIэхэм якIэлэеджакIохэр, Адыгеим щыпсэурэ цIыфыбэ. Джащ фэдэу дзэ­кIолIхэм ягупсэхэм къагъэ­хьазырыгъэхэри ащ хэ­лъых, — къыIотагъ Екатеринэ.

Ащ къызэрэхигъэщы­гъэмкIэ, Мыекъопэ районым ит поселкэу Тульскэмрэ станицэу Кужорскэмрэ ащыпсэурэ къэзэкъ ныбжьыкIэхэми яшIогъэшхо къэкIуагъ.

— ШIушIэ IэпыIэгъур Херсонскэ ыкIи Запорожскэ шъолъырхэм анагъэсыщт. Сэгугъэ охътабэ те­мышIэу ар тидзэкIолIмэ аIэкIэдгъэхьэшъунэу. ТиухъумакIомэ мандарин килограмми 100-м ехъу къафэтщэфыгъ, ащ IэшIу-­IушIухэр, шъоур, нэмыкI гъомылапхъэхэр идгъэ­гъусагъэх. ЯсэнэхьаткIэ къашъхьэпэщт пкъыгъохэр, анахьэу газыр зэрыт баллон цIыкIухэр, шэф остыгъэхэр ыкIи нэмыкIхэр афэттIупщыгъэх. Дэгъоу сыщыгъуаз письмэхэмрэ кIэлэцIыкIухэм ашIыгъэ сурэтхэмрэ тидзэкIолIхэр зэращыгушIукIхэрэм, ахэри зыщыдгъэгъупшагъэхэп, — къыIотагъ пшъэ­шъэ­жъыем.

Екатеринэ игущыIэхэм къахигъэхъожьыгъ мыщ фэдэ IэпыIэгъур аугъои зы­хъукIэ вирусхэм апэшIуекIохэрэ ыкIи фэшъхьаф Iэзэгъу уцхэр, щыгъын фабэхэр къызэрэ­далъытэхэрэр.