Республикэм и Филармоние егъэджэкIо-гъэсакIом и Илъэс зэри­кIырэм фэгъэхьыгъэ Iофтхьабзэ щыкIуагъ.

[caption id="attachment_143451" align="aligncenter" width="800"] А. Гусев[/caption]

Ащ хэлэжьагъэх кIэлэегъа­джэхэр ыкIи кIэлэпIухэр, колледжхэмрэ апшъэрэ еджапIэ­хэмрэ ащезыгъаджэхэрэр, гъэсэныгъэ тедзэ язытыхэрэр ыкIи тренерхэр, гъэсэныгъэм иве­теранхэр. Адыгеим и ЛIышъхьэу КъумпIыл Мурат а Илъэсым къыкIоцI проектыбэ зэрэзэ­шIуахыгъэм пае афэгушIонэу къэкIуагъ.

Джащ фэдэу кIэлэегъаджэхэм шIуфэс гущыIэхэр къафагъэхьыгъэх АР-м и Къэралыгъо Совет — Хасэм и Тхьаматэу Владимир Нарожнэм ыкIи АР-м гъэсэныгъэмрэ шIэныгъэмрэкIэ иминистрэу Евгений Лебедевым.

КIэлэегъаджэхэм закъыфи­гъазэзэ Адыгеим и ЛIышъхьэ къыIуагъ егъэджэн сэнэхьатыр къыхэзыхыгъэхэм социальнэ мэхьанэшхо зиIэ пшъэрылъыр зэрэзэшIуахырэм пае зэрафэразэр.

Президентэу Владимир Путиным егъэджэкIо-гъэсакIом и Илъэсэу ыгъэнэфагъэм ар къыгъэшъыпкъэжьыгъ.

КъумпIыл Мурат къызэриIуа­гъэмкIэ, гъэсэныгъэр анахь мэхьанэшхо зэратырэ лъэны­къохэм ренэу ащыщыгъ ыкIи къэнэжьы. МыщкIэ республикэм проектышхохэр ыкIи программэ зэфэшъхьафхэр щызэшIуахы­гъэх, гъэсэныгъэ зыщарагъэгъо­тырэ организациехэм яинфраструктурэ хэпшIыкIэу нахьышIу ашIыгъ. Аужырэ илъэси 6-м Адыгеим еджэпIи 4 щагъэ­псыгъ, джыри 6 ашIы, кIэлэцIыкIу IыгъыпIэ 19 ашIыгъ, ахэм ащыщэу 2-м ягъэпсын ыкIэм фэкIо. Къоджэ еджапIэхэм ателъы­тагъэу гъэсэныгъэм игупчэу «Точка роста» зыфиIорэм фэдэу 89-мэ Iоф ашIэ, ахэм ащыщэу 25-р мы илъэсым къызэIуахыгъ. КIэлэцIыкIу технопарки 4-мэ, «IТ-куб» зыфиIорэм фэдэ гупчи 2-мэ Iоф ашIэ. ЕджапIэхэм яигъэкIотыгъэ программэ къыдыхэлъытагъэу мы аужырэ илъэситIум еджэпIэ 15 зэтырагъэпсыхьагъ, зыр — къэралыгъо программэу къуаджэхэм хэхъоныгъэ ягъэшIыгъэным тегъэпсыхьагъ. АР-м и ЛIышъхьэ къулыкъухэм пшъэрылъ афи­шIыгъ а пчъагъэхэм ахагъэ-хъо­нэу ыкIи къызэкIэлъыкIощт илъэситIум амал зэриIэкIэ рес­публикэм иеджапIэхэр нахьыбэу агъэцэкIэжьынхэу.

КIэлэегъаджэхэр зэрафи­мыкъухэрэр дэгъэзыжьыгъэным пае «педагогическэ классхэкIэ» заджэхэрэм зарагъэушъомбгъу­нэу рахъухьагъ, непэкIэ ахэр 19 зэрэхъухэрэр. Къэралыгъо программэу  «Къоджэ кIэлэ­егъадж» зыфиIорэм къыдыхэлъытагъэу илъэси 5-м къыкIоцI, мы илъэсри зэрахэтэу, респуб­ликэм икъоджэ еджапIэхэм кIэ­лэегъэджэ 49-рэ Iоф аща­шIэнэу къэкIуагъэх. Ащ нэмыкIэу Адыгэ къэралыгъо университетым иапшъэрэ курсхэм арыс нэбгырэ 20 Адыгеим икъоджэ еджапIэхэм ащэлажьэх.

«Ренэу къызэрэхэзгъэщы­рэмкIэ, гъэсэныгъэм ылъэныкъо­кIэ Iофтхьабзэу зэшIотхыхэрэм ялъытыгъэу ежь кIэлэегъаджэ­хэм Iоф ашIэнымкIэ амалэу яIэхэр нахьышIу ашIын зэралъэ­кIырэм нэмыкIэу кIэлэегъэджэ сэнэхьатым уасэу фашIырэми нахь зыкъеIэты. Тэ тызыфаер IофышIэ ныбжьыкIэхэр нахьыбэу еджапIэхэм къякIолIэнхэр, кIэлэегъаджэхэм, кIэлэпIухэм яIэпэIэсэныгъэ ренэу нахь хагъэхъоным иамал яIэныр ары», — къыхигъэщыгъ КъумпIыл Мурат.

Адыгеим и ЛIышъхьэ къызэриIуагъэмкIэ, кIэлэегъаджэхэм республикэм ренэу анаIэ щатырагъэты, анахь кIэлэегъэджэ ыкIи кIэлэпIу дэгъухэр къыхагъэщых, кIагъэгушIух. Непэ ахэм анахь дэгъухэм республикэ ыкIи къулыкъу тынхэр афагъэшъо­шагъэх. МэфэкI концерткIэ зэ­хахьэр аухыгъ.

АР-м и ЛIышъхьэ ипресс-къулыкъу