АдыгэлI батырэу Шъхьащэкъо Кимэ игъэхъагъэхэм джыри ахигъэхъуагъ. «Power Expo» зыфиIорэ къэгъэлъэгъонэу Москва щыкIуагъэм къыдыхэлъытагъэу Iэпшъэ телъхьанымкIэ зэнэкъокъум ащ текIоныгъэр къыщыдихыгъ.

[caption id="attachment_143435" align="aligncenter" width="800"] Шъхьащэкъо Кимэ ихъарзынэщ.[/caption]

Илъэс 59-рэ зыныбжь спортсменыр илъэс 33-м ит Гога Тапурие 4:2-у те­кIуагъ. КъэIогъэн фае, Iэпшъэ телъхьа­нымкIэ Кимэ зыкъызэригъэлъэгъуагъэр апэрэ. Ащ ыпэкIэ мы спорт лъэпкъым пылъыгъэу щытыгъэп.

— Ары, сызпэуцужьыгъэр илъэс 26-кIэ сэщ нахьи нахьыкIэу къычIэкIыгъ. Сыныбжь елъытыгъэу, етIани апэрэу сызэрэхэлажьэрэм къыхэкIэу зэкIэми ар къыстекIонэу къашIошIыщтыгъ, ау зэрэмыгугъагъэхэу къычIэкIыгъ. КIалэу сызпэуцужьыгъэри лъэшэу зыщыгугъы­жьыщтыгъ, — къытфиIотагъ Шъхьащэкъо Кимэ.

Iофтхьабзэм хэлэжьагъэхэр зэкIэ зы IэкIэ зэнэкъокъугъэх. Шъхьащэкъо Кимэрэ Гога Тапуриерэ IитIумкIэ зэпэуцужьынхэу къафадагъ. Iэ сэмэгумкIи джабгъумкIи зэхъожьхэзэ, акIуачIэ зэрахьылIагъ, пчъэгъиплI апэ изыгъэкъурэм текIоныгъэр къыдихыщтыгъ. Ар Кимэу къычIэкIыгъ.

— Iэпшъэ телъхьанымкIэ дунаим, Урысыем ячемпионэу, гъогогъу пчъагъэ­рэ текIоныгъэ къыдэзыхыгъэу Роман Шоринри мызыгъэгурэ ушэтыным хэлэжьагъ. Ащ сэри сыздигъэхьазырыгъ. Мы спорт лъэпкъыр сэрыкIэ гъэшIэгъонэу къычIэкIыгъ. Ащи шIэныгъэ, екIолIэкIэ шъхьаф ищыкIагъ. Ау сыдми укIэрыхьэмэ пкIуачIэ къэбгъэлъэгъонэу щытэп, — къыддэгуащэ Шъхьащэкъо Кимэ. Кимэ Iэпшъэ телъхьаныр ыгу рихьыгъэу тапэкIэ нахь ишъыпкъэу ащ пылъы­нэу рихъухьагъ. Зэнэкъокъу зэфэшъхьаф­хэми ахэлэжьэнэу имурад.

Шъугу къэдгъэкIыжьын, спортым иветеран цIэрыIохэм Шъхьащэкъо Кимэ ащыщ, спорт лъэпкъ зэфэшъхьафхэмкIэ къэгъэлъэгъо­нышIухэр иIэх. Аужырэ илъэсхэм анахьэу ыцIэ зыгъэIурэр шъхьа­фит бэнэныр ары. Ащи ар пыщагъэ зыхъугъэр бэшIагъэп, ныбжь шIукIаем итыгъ. Ары нахь мышIэми, мафэ къэс ышIырэ ухьазырынхэмрэ ыгу зэрэфаблэрэмрэ яхьатыркIэ гъэхъа­гъэхэр ешIых. Кимэ къызэриIорэмкIэ, спортым фыриIэ шIулъэгъур ицIыкIугъом къыздиштагъ.

— Футбол, хоккей ренэу тешIэщтыгъ, секцие зэфэшъхьафхэм етIанэ тыкIуагъ. СпкъышъолкIэ спорт лъэпкъ зэфэ­шъхьафхэм сатегъэпсыхьагъэуи къычIэ­кIыгъ. Анахьэу сызпылъыгъэр хьылъэ Iэтыныр ары, ау мары илъэс 60-м ехъулIэу нэмыкI спорт лъэпкъхэри къыз­IэкIэзгъэхьагъэх, — къытфиIотагъ Кимэ.

Iэпшъэ телъхьаным изакъоп, непэ Кимэ фэшъхьаф пшъэрылъхэри зыфегъэуцужьых. Ахэр къыдэхъунхэм фэшI мафэ къэс Iоф зыдешIэжьы. Уфаемэ, ныбжьыр пэрыохъу зэрэмыхъущтыр ащ ыушэтыгъ.

Анцокъо Ирин.