Урысыем ичемпионат и Суперлигэ хэлэжьэрэ «АГУ-Адыифым» зичэзыу ешIэгъоу иIагъэр Москва щыкIуагъ.

Зэнэкъокъум ипэшIорыгъэшъ едзыгъо пэрытныгъэ щызыIыгъ командэхэм ащыщэу «ЦСКА-м» IукIагъ. «ЦСКА» (Москва) — «АГУ-Адыиф» — 35:21 (21:12).

Мыщ фэдэ командэ лъэшхэм уадешIэныр псынкIэп. Ау пкIуачIэ ууплъэкIунымкIэ, къыкIэлъыкIощт ешIэгъухэм зафэбгъэхьазырынымкIэ ишIогъэшхо къэкIо. Адыгеим икомандэ иешIакIэ уигъэрэзэнэу щытыгъ, анахьэу ятIонэрэ таймым. Ау бысымхэр хэпшIыкIэу нахь лъэшыгъэх. «АГУ-Адыифым» щешIэхэрэ Лилия Кавера ыкIи Екатерина Терлецкаям гъогогъу плIырыплIэ Iэгуаор къэлапчъэм дадзагъ.

— Командэм амалэу иIэр къыгъэлъэгъуагъ, ау ащ дакIоу хэукъоныгъабэ тшIыгъэ, ахэр дэгъэзыжьыгъэнхэм тапэкIэ тыпылъыщт, — къыIуагъ Екатерина Терлецкаям. Тыгъэгъазэм и 24-м «АГУ-Адыифыр» Мыекъуапэ щешIэщт. Зэнэкъо­къум икомандэ анахь лъэшэу «Ростов-Дон» тихьэкIэщт. ЗэIукIэгъур мафэм сыхьатыр 2-м рагъэжьэщт. Гандболыр зыгу ри­хьыхэрэр ащ еплъынхэу зэхэщакIохэм рэгъэблагъэх. УзэрэчIэхьащтым ыпкIэ лъыптын ищыкIагъэп.