Пэсэрэ орэдхэм яижъырэ ыкIи янепэрэ къэIуакIэ зэготэу зыщыIугъэ зэхэт концерт Мыекъуапэ щыкIуагъ. Купхэу «Мыст»(Адыгеир), «Джэрпэджэжь» (КъБР) зыфиIохэрэм республикэм дэгъоу щызэлъашIэрэ Нэгъой Заур яIэпыIэгъоу ар зэхащагъ.

[caption id="attachment_143408" align="aligncenter" width="800"] А. Балабась.[/caption]

— ТикъэIуакIэхэр непэ зэфэшъхьафхэми, купхэм ижъырэ къэIуакIэм тетэу загъэсагъ, ары ащ лъапсэу яIэр. Ащ ишIуагъэкIэ, бэрэ зызэдамыгъэхьазырыгъэми, мары зы сценэм щызэдэлэжьэнхэ алъэкIыгъ. Емыжъыушъурэр «фэмыф» аIоти, фэгубжыщтыгъэх. Тэ ар джы тэгъэшIагъо, — къеIуатэ ижъырэ адыгэ орэдхэр къэзыIоу, АР-м культурэмкIэ изаслуженнэ IофышIэу Нэгъой Заур.

Концертыр сыхьатрэ ныкъорэ кIуагъэ. Тарихъ, лIыхъужъ ыкIи шIулъэгъу орэдхэр ащ щыIугъэх. Ахэм ащыщых «Мэзгуащ», «Япон заом иорэд», «Хьатх я КъокIасэ иорэд», нэмыкIхэри.

НыбжьыкIэ купхэу «Мыст» ыкIи «Джэрпэджэжь» зыфиIохэрэм лъэпкъ мэкъэмэ Iэмэ-псымэхэм ямызакъоу, фэшъхьафхэри агъэфедагъэх. Лъэпкъ къэIукIэр ылъапс, ау имынэшанэхэри мэкъамэхэм ахалъхьэ. Купэу «Мыст» хэт Сихъу Джэнэт къызэриIорэмкIэ, ижъырэ орэдыжъхэмрэ шыкIэпщынэмрэ шIулъэгъоу афыриIэр пэсэрэ орэд къегъэIуакIэу Гъогъо Дамир рилъэгъулIагъэм къыщежьагъ.

— Илъэс 15 сыныбжьэу «Абдзахэмэ язекIо орэд» Гъогъо Дамир шыкIэпщынэм къыригъаIоу зызэхэсэхым, «Сэри ащ фэдэ сыхъунэу сыфай» зэсIожьыгъ. ГъукIэ Замудин дэжь сыкIуагъ ыкIи ижъырэ орэдыжъхэр ащ шIу сигъэлъэгъугъэх. Джы мары илъэси 7 – 8 фэдиз хъугъэу ахэр сищыIэныгъ, — къыддэгощагъ Сихъу Джэнэт.

Сихъу Джэнэт изакъоп, ныбжьыкIэ купитIуми ахэтым инахьыбэр ГъукIэ Замудин ыгъэсагъэх, римыгъэджагъэхэри ащ кIырыплъыгъэх. Ащ иапэрэ еджа­кIохэм ащыщэу Нэгъой Заур ижъырэ орэд къэIуакIэу, мэкъэмэ къегъэIуакIэу ГъукIэ Замудин зыфигъэсагъэхэм афэшъыпкъэмэ, ныбжьыкIэхэр зэхъокIыныгъэхэм нахь дахьыхых.

— Непэ ныбжьыкIэхэм ягукъэкIыкIэ мыщ фэдэ Iофтхьабзэ зэрэзэхащагъэр сигуапэ. Гукъау нахь мышIэми, уахътэм дакIоу тыбзэ тIэкIэзы, ау лъэпкъым бзитIу иI: орэдыбзэмрэ зэрыгущыIэрэмрэ. Зыр кIодымэ, адырэри щыIэщтэп. Ау мыщ фэдэу тиныбжьыкIэхэм орэдыжъхэр къаштэхэу, купкIэу яIэр къагурыIоу, къаIоу щытмэ, тыбзи, Тхьэм ыIомэ, зиужьыжьын. «Шъопсэу» шъосэIо, — закъыфигъэзагъ ныбжьыкIэхэм адыгэ культурэм иухъумакIоу, АР-м изаслуженнэ сурэтышIэу ГъукIэ Замудин.

— Непэ тлъэгъугъэр тэ зэхэтщэгъэгъэ «Жъыум» къыпыкIыгъэ мыжъо жгъэеу сэлъытэ. Ау тиIофшIакIэ зэфэдэп. Тэ ижъырэ къэIуакIэм тытемыкIэу, пэсэрэ къэтыкIэр дгъэIущтыгъ.

НыбжьыкIэхэр тIэкIу нахь шъхьафитых, мэкъамэми дэлажьэх, фэшъхьаф Iэмэ-псымэхэри агъэфедэх. Арэу щытми, ашIогъэшIэгъо­нэу зэрэпылъхэм пае сафэраз. Ау сялъэIу сшIоигъу купкIыр амыгъэкIодынэу, гъэкIэжьыным егъэлыегъащэу зыдырамыгъэхьыхынэу, — закъыфигъэ­загъ ныбжьыкIэ купхэм АР-м культурэмкIэ иминистрэ игуадзэу Кушъу Светланэ.

Сыдэу щытми, ижъырэ ыкIи гъэкIэжьыгъэ къэIукIэ иIэми, нафэр зы — ижъырэ орэдыжъхэр щыIэныгъэм къыхэ­хьажьыгъэх ыкIи непэрэ ныбжьыкIэ купхэм ахэр къащыуцущтхэп. Концертми ар нафэ къытфишIыгъ. ГъукIэ Замудин зыдэлэжьэрэ кIэлэцIыкIу купэу «Насып» зыфиIорэм концертым зыкъыщигъэлъэгъуагъ, Iэгу тео лъэш къылэжьыгъ.

Анцокъо Ирин.