АР-м и ЛIышъхьэу КъумпIыл Мурат Адыгеим и ­Лъэпкъ музей непэ зэкIом, Адыге­им ихьыкумхэм ятарихъ къи­зыIотыкIырэ къэгъэлъэгъоным нэIуасэ зыфишIыгъ. Адыгэ Республикэм ихьыкумхэр зы­зэхащагъэр илъэси 101-рэ зэ­рэхъурэм ар фэгъэхьыгъ.

Iофтхьабзэм хэлэжьагъэх АР-м и Апшъэрэ хьыкум итхьаматэу Шумэн Байзэт, Хьыкум департаментым АР-мкIэ и Гъэ­IорышIапIэ ипащэу Хьакъуй Юныс, нэмыкIхэри.

АР-м и ЛIышъхьэ экспозициер къызэпиплъыхьагъ, проектым изэхэщакIохэм адэгущыIагъ. АР-м и Апшъэрэ хьыкум итхьаматэ зэрэхигъэунэфыкIыгъэмкIэ, илъэси 101-м къыкIоцI Адыгеим ихьыкумхэм гъогушхо къакIугъ, Урысые Федерацием ихьыкум системэ зыкI ахэр пытэу епхыгъэ хъугъэх. Экспозициехэми ар къаушыхьаты.

Адыгэ Республикэм ихьыкум системэ итарихъ зыщызэфэхьысыжьыгъэ музеим иэкспонатхэр, хэутыгъэхэр, нэпэеплъ хьап-щып­хэр къэгъэлъэгъоным къыра­хьылIагъэх. Тематическэ стенд­хэм, фильмхэм Адыгеим ихьыкумхэм хэхъоныгъэ шъхьаIэу ашIыгъэхэм, Хэгъэгу зэошхом хэлэжьэгъэ хьыкумышIхэм щыIэныгъэ гъогоу къакIугъэм нэIуасэ уафашIы.

Адыгеим ихьыкумышIхэм ацIэ­кIэ Шумэн Байзэт АР-м и ЛIышъхьэрэ Лъэпкъ музеим иIо­фышIэхэмрэ «тхьашъуегъэ­псэу» къариIуагъ къэгъэлъэгъо­ным изэхэщэнкIэ IэпыIэгъу къы­­зэрафэхъугъэхэм фэшI. Та­пэкIэ ащ АР-м и Лъэпкъ му­зей адыгэ хьыкумым изэхэсыгъо фэгъэхьыгъэ сурэтрэ тхы­лъэу «100 лет судам общей юрисдикции Адыгеи» зыфи­Iорэмрэ шIухьафтынэу ритыгъа­гъэх.

Хьыкум системэм иIофшIэн зэрэзэхищэрэр цIыфхэм зэлъя­гъэшIэгъэным, ныбжьыкIэхэм анаIэ ащ тырягъэдзэгъэным мэхьанэшхо зэриIэр АР-м и ЛIышъхьэ къыхигъэщыгъ.

«Мыщ фэдэ проектхэм яшIуа­гъэкIэ тиреспубликэ исхэм Адыгеим ихьыкум системэ тарихъ гъогоу къыкIугъэр, ащ ихэ­хъоныгъэ зиIахьышIу хэзы­шIыхьагъэхэр нахьышIоу ашIэ мэхъу. Къэгъэлъэгъоным просветительскэ пшъэрылъышхо егъэцакIэ, ныбжьыкIэхэм япат­риотическэ пIуныгъэ фэIоры­шIэ», — къыIуагъ республикэм ипащэ.

АР-м и ЛIышъхьэ ипресс-къулыкъу