Адыгэ Республикэм и ЛIышъхьэ дэжь лъэпкъ зэфыщытыкIэхэмкIэ ыкIи дин объединениехэм язэдэлэжьэнкIэ Советэу щызэхэщагъэм изэхэсыгъо республикэм и Правительствэ и Унэ щыкIуагъ. Адыгеим и ЛIышъхьэу Къум­пIыл Мурат Iофтхьабзэр зэрищагъ.

Советым иIофшIэн хэлэжьагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, министерствэхэм япа­щэхэр, нэмыкIхэри.

Урысыем гушъхьэлэжь шIуагъэу иIэхэр къэухъумэгъэнхэмкIэ ыкIи гъэпытэгъэнхэмкIэ къэралыгъо политикэм ипхырыщын епхыгъэ Iофыгъохэм мы зэIукIэгъум щатегущыIагъэх.

Адыгеим и ЛIышъхьэ, Iофтхьабзэм хэлажьэхэрэм закъыфигъазэзэ зэрэхигъэунэфыкIыгъэмкIэ, культурэмрэ динымрэ алъэныкъокIэ зэдегъэштэныгъэ­зэгурыIоныгъэ азыфагу илъыныр, рес­публикэм щыпсэухэрэм зыкIыныгъэ ахэлъыныр — ахэр ары гъэхъагъэ хэлъэу социальнэ-экономикэ пшъэрылъхэр зэшIохыгъэнхэмкIэ, обществэм зыпкъ­итыныгъэ хэлъынымкIэ анахь мэхьанэ­- шхо зиIэхэр.

«Хабзэм икъулыкъухэмрэ дин органи­зациехэмрэ, джащ фэдэу лъэпкъ общест­веннэ объединениехэмрэ цыхьэшIэгъу зэфыщытыкIэхэр азыфагу илъ хъугъэх. Ахэм япащэхэм ащыщ горэм сыIумыкIэу къыхэкIырэп: тызэгъусэу джырэ Iофыгъохэм татегущыIэ, зэдэлэжьэныгъэм ылъэныкъокIэ джыри бгъэфедэн плъэ­кIыщт амалэу щыIэхэм танэсы. Осэшхо фэсэшIы шъхьэихыгъэу тиеплъыкIэхэр къызэфэтIотэнхэм шъори мэхьанэ зэре­шъутырэм. Адыгеим ихэхъоныгъэкIэ, Уры­сыем и Президентэу Владимир Пути­ным къырихьыжьэгъэ Iофтхьабзэхэр пхырыщыгъэнхэмкIэ зэкIэми зы екIолIакIэ тиI. Ащ фэдэ зэдэлэжьэны­гъэм, зэ­гурыIоныгъэм къыкIэкIуагъэх тиреспуб­ликэ илъ мамырныгъэмрэ зэгурыIоныгъэмрэ», — къыIуагъ КъумпIыл Мурат.

Хэгъэгум и Президент лъэпкъ зыкIыныгъэм, зэгурыIоныгъэм атетэу къэралыгъор гъэпытэгъэн зэрэфаем иекIолIакIэ къытегущыIэзэ Адыгеим и ЛIышъхьэ къыхигъэщыгъ лъэпкъ политикэм ылъэныкъокIэ къэралыгъо программэу щыIэр республикэм шIуагъэ къытэу щыпхырыщыгъэным мэхьанэшхо зэриIэр.

КъумпIыл Мурат анахьэу анаIэ зыты­раригъэдзагъэхэм ащыщых республикэм щыпсэурэ цIыфхэм язэхэшIыкI гъэпытэгъэныр, лъэпкъхэм языкIыныгъэ ылъа­псэу обществэм хэлъ шIуагъэхэм джыри нахь зягъэушъомбгъугъэныр, дин конфессие пстэуми къыдалъытэрэ лъэныкъошIухэр гъэфедэгъэнхэм мэхьанэшхо зэряIэр.

Ащ къызэрэхигъэщыгъэмкIэ, илъэс къэс дин организациехэм IэпыIэгъоу сомэ миллиони 10 зырыз къафыхагъэкIы. Мы илъэсым Адыгеимрэ Краснодар краимрэ арыс быслъымэнхэм я Дин­дэлэжьапIэрэ Адыгеимрэ Мыекъуапэрэ я Епархиерэ сомэ миллиони 7,5-рэ джы­ри ахъщэ тедзэу аIэкIагъэхьагъ. Илъэсэу къихьащтым къыщыублагъэу организациитIуми IэпыIэгъоу араты- рэр сомэ миллион 17,5-рэ зырызым нэсыщт.

Адыгеим и ЛIышъхьэ дин пащэхэм ыкIи лъэпкъ объединениехэм ялIыкIохэм анаIэ тыраригъэдзагъ социальнэ Iофыгъоу къэуцухэрэм язэшIохынкIэ язэдэлэжьэныгъэ джыри нахь агъэлъэшын зэрэфаем.

Зэхэсыгъом къыщыгущыIагъэх Адыге­имрэ Краснодар краимрэ ямуфтиеу Къэрдэнэ Аскэрбый, Адыгеимрэ Мые­къуапэрэ яархиепископэу Тихон, ермэл апостол чылысым ипащэу Тер Мушег-­Хачатрян.

Быслъымэн ыкIи чыристан конфессиехэм япащэхэм къаIотагъ дин организациехэм Iофэу ашIэрэм фэгъэхьыгъэу. КъызэрэхагъэщыгъэмкIэ, ахэм ялIыкIохэр социальнэ, гуманитарнэ ыкIи культурнэ проектхэм, Iэнэ хъураехэм, конференциехэм ахэлажьэх, анахь зигъо IофыгъохэмкIэ яеплъыкIэхэр къаIох. Мыщ къыщаIуагъ Епархиемрэ быслъымэнхэм я ДиндэлэжьапIэрэ фондэу

«Хэгъэгум иухъумакIохэр» зыфиIорэм ишъолъыр къутамэрэ язэдэлэжьэныгъэ фэгъэхьыгъэ зэзэгъыныгъэм зэрэкIэтхагъэхэр.

ЗэIукIэгъум республикэм и ЛIышъхьэ къызэрэщиIуагъэмкIэ, ныбжьыкIэхэм гъэсэныгъэ IофшIэным епхыгъэ Iофтхьабзэхэм анэмыкIэу гъот макIэ зиIэ цIыф­хэм адеIэнхэм, лъэпкъ ыкIи дин зэфэшъхьафхэм язэгурыIоныгъэ гъэпытэгъэ­ным япхыгъэ Iофтхьабзэхэр зэрахьанхэ фае.

«Республикэр мамырныгъэрэ рэхьатныгъэрэ зэрылъ шъолъырэу щытыным, лъэпкъ е дин ушъхьагъухэм япхыгъэу зэпэуцужьыныгъэ горэхэр къимыхъухьанхэм тэркIэ мэхьанэшхо иIэу щыт. Зыпкъ­итыныгъэ зыхэлъ обществэр ары шIуагъэ къэзытырэ социальнэ политикэр зы­­щыпхырыпщын, цIыфхэм ящыIакIэ нахь зыкъебгъэIэтын зыщыплъэкIыщтыр. ЗэкIэми къыдгурыIон фае имыхьа­къэу зыгорэм мыхъункIэ утегущыIэу е удэзекIомэ, гумэкIыгъуабэ къыпыкIын зэри­лъэкIыщтыр. Тэ типшъэрылъыр зэщыгъэ­къон кIуачIэхэм цIыфхэр ахамыщэнхэм, ахэм афэхъун ылъэкIыщт кIэух тхьамыкIагъохэм ащыухъумэгъэнхэр ары», — икIэухым къыIуагъ КъумпIыл Мурат.

Адыгеим имафэу Дунэе къэгъэлъэ­гъопIэ-форумэу «Урысыер» зыфиIоу ВДНХ-м щыкIуагъэм ыкIи республикэм фэгъэхьыгъэ экспозицием изытет ЛIышъхьэм агу къыгъэкIыжьыгъ. Мыщ ипсэолъэ шъхьаIэ къегъэлъагъо Адыгеим щы­псэурэ цIыф лъэпкъхэм зыкIыныгъэрэ зэкъошыныгъэрэ зэрэзэдыряIэр.

Республикэм и ЛIышъхьэ зэIукIэгъум икIэухым къулыкъу гъэнэфагъэхэм пшъэ­рылъ афишIыгъ дин ыкIи лъэпкъ культур­нэ Iофыгъохэм якъэгъэлъэгъонкIэ ыкIи якъиIотыкIынкIэ эфир уахътэр нахьыбэ шIыгъэным иIофыгъо егупшысэнхэу.

Ащ дакIоу КъумпIыл Мурат къыIуагъ Советым ыштэрэ унашъохэм илъэсэу къихьащтым щыIэщт политическэ хъугъэ-шIэгъэшхом — Урысыем и Президент ихэдзынхэм язэхэщэн нахь дэгъоу рекIокIынымкIэ яшIуагъэ къызэрэкIощтым ицыхьэ зэрэтелъыр.

АР-м и ЛIышъхьэ ипресс-къулыкъу