1992 — 1993-рэ илъэсхэм Абхъазым щыкIогъэ заом Адыгеим икIыгъэ нэбгы­рэ 200 фэдиз  гуфакIоу хэлэжьагъ. ТекIоныгъэ къыдэхыгъэным Адыгеим икIыгъэ лIыхъужъхэм яIахьышIу халъхьагъ.

[caption id="attachment_143380" align="aligncenter" width="800"] А. Iэшъын.[/caption]

Абхъазым къикIыгъэ лIыкIохэр тыгъуасэ Мыекъуапэ щыIагъэх, текIоныгъэр къызыдахыгъэр илъэс 30 зэрэхъугъэм фэгъэхьыгъэу Адыгеим икIи гуфакIоу зэо-зэпэуцужьым хэлэжьагъэхэр къыхагъэщыгъэх. Ахэм ащыщэу 13-мэ орден, зы нэбгырэ текIоныгъэ къызэрэдахыгъэм фэгъэхьыгъэ медаль афагъэшъошагъ. Джыри нэбгырэ 90-рэ фэдизмэ юбилейнэ медальхэр аратыжьыщтых.

Iофтхьабзэм хэлэжьагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.

— Илъэс 30-кIэ узэкIэIэбэжьмэ Абхъа­зым щыкIогъэ заом Адыгеим щыпсэухэрэм чIыпIэшхо щаубытыгъ. Титарихъ гъогу зэу зэрэщытыр, тызэрэзэкъошыр, зыкIыныгъэ зэрэтхэлъыр джыри зэ ащ къегъэшъыпкъэжьы. КъыткIэхъухьэхэрэми а зэфыщытыкIэхэр алъыдгъэIэсын, ахэтлъхьан фае. ТапэкIи тизэдэлэжьэныгъэ нахь зедгъэу­шъомбгъущт. ЗэкIэми сышъуфэлъаIо мамыр щыIакIэ шъуиIэнэу, шIоу щыIэр къы­жъудэхъоу шъупсэунэу, — къыIуагъ Абхъаз Республикэм и Президент иуп­чIэ­жьэгъоу Рисмаг Аджинджал.

Абхъазым ишъхьафитыныгъэ зэрэдыра­гъэштагъэм тарихъ мэхьанэ зэриIэр, язэ­дэлэжьэныгъэ, язэфыщытыкIэ тапэкIи ащ нахь зэригъэпытэщтым яцыхьэ зэрэте­лъыр Iофтхьабзэм къыщаIуагъ.

ДЕЛЭКЪО Анет.