Ар мафэ къэс тиIэу тесагъ, тищыIэныгъэ епхыгъэ шъыпкъ, зэпыугъо горэ зыфэхъукIэ, дунаир мэкIодыжьэу къытщэхъу. ОшIэ-дэмышIэ хъугъэ-шIагъэхэм ямылъытыгъэу электро-энергиер зэпымыоу цIыфхэм къа­IэкIэхьаным пылъхэм яIофшIэн хьылъэ дэдэми, илъэсипшI пчъагъэ хъугъэу мы лъэныкъом щылажьэхэрэр щыIэх. Ахэм ащыщ непэ зигугъу къэтшIыщтыри.

Андрей Шелудько «Россети Кубань» зыфиIорэ хъызмэтшIапIэм и Адыгэ къутамэ электрорыкIуапIэхэм ягъэIорышIэнкIэ игупчэ иоперативнэ-диспетчерскэ къулыкъу ибригадэу лъэтемытэу чIыпIэм нэсырэ ия V-рэ куп иэлектромонтер. Илъэс 20 хъугъэу мы сэнэхьатым рэлажьэ. ПшъэдэкIыжь ин хэлъэу иIофшIэн зэригъэцакIэрэм пае ыкIи сэнэхьат мэфэкIым ехъу­лIэу УФ-м энергетикэмкIэ и Министерствэ и Щытхъу тхылъ къыратынэу агъэлъэгъуагъ.

2005-рэ илъэсым Андрей Шелудько Адыгэ электрическэ сетьхэм къахахьи, кВ 35-м ыкIи нахь лъагэхэм ателъытэгъэ под­станциехэм якъулыкъу ибрига­дэу лъэтемытэу чIыпIэм нэсырэм электромонтерэу аштагъ. А лъэхъаным кIэлэ ныбжьыкIэм мы сэнэхьатымкIэ апшъэрэ еджапIэр къыухыгъэу ыкIи мы лъэныкъомкIэ Мыекъуапэ ихъызмэтшIапIэхэм ащыщ илъэ­ситIурэ Iоф щишIэгъахэу щы­тыгъ, Урысыем и УIэшыгъэ кIуачIэхэми къулыкъур ащихьыгъэхагъ.

Андрей IофшIэныр ыгу рихьэу, ишIэныгъэхэм ахигъахъоу щытыгъ, шIэныгъэ тедзэхэр хъыз­мэтшIапIэм иегъэджэн гупчэ щызэригъэгъотыщтыгъэх.

Вольт лъагэхэм ателъытэгъэ рыкIуапIэхэм яIыгъын, язэте­гъэпсыхьан, Iоф ягъэшIэгъэным бригадэм хэтэу Андрей Ше­лудько зэшIуехы, нэмыкI къулыкъухэм Iоф ащызышIэхэрэм яIофшIэпIэ чIыпIэхэр шапхъэхэм адиштэным пылъ, ахэр япшъэ­рылъхэм ягъэцэкIэн фежьэнхэ Iизын ареты, загъэцэкIахэкIэ, яIофшIэпIэ чIыпIэ къызэрэзэра­нэкIыжьырэми лъэплъэ. Пстэу­ри шапхъэхэм адиштэным шIокI имыIэу егъэцакIэ, щынэгъон­чъэным пылъ.

— IофшIэным хэшIыкI ин фыриI, иIофшIэгъухэм алъытэ, шIу алъэгъу. ОшIэ-дэмышIэ Iоф­хэр къызщыхъухэрэ чIыпIэхэм ар пчъагъэрэ дгъэкIуагъэ ахэм къыздахьыгъэ хъугъэ-шIагъэхэр дэгъэзыжьыгъэнхэм пае, — къыт­фиIотагъ хъызмэтшIапIэу «Россети Кубань» зыфиIорэм и Адыгэ къутамэ ипащэ игуадзэу, иинженер шъхьаIэу ЛIыIапIэ Рустам. — Шъачэ щыкIогъэ Олимпиадэм электричествэр зэпыу имыIэу къащыIэкIэхьаныр зэшIозыхыгъэхэм Андрей Шелудько ащыщ.

Исэнэхьат епхыгъэ пстэуми ащ уасэ афешIы, мэхьанэу иIэ­ри къыгурэIо.

— ЕджапIэр къызысэухым Пшызэ чIыгулэжьын универ­ситетым сычIэхьагъ, сэнэхьатэу зызфэзгъэзэщтыр згъэнэ­фэгъа­хэу секIолIагъ. Уахътэ те­шIэ­гъа­хэу къызгурыIожьыгъ ар тэ­рэзэу къызэрэхэсхыгъэр. Сыгу рихьырэ пстэуми ар япхыгъ — жьы къабзэм ухэтэу Iоф ошIэ, зыкъызэIуохышъу, пшъэдэкIыжь ин, цIыфхэмкIэ мэхьанэшхо зиI, нэмыкIыбэу щыIэныгъэм купкI къезытэу, насыпышIо узышIыхэрэр хэсэлъагъох, — иIофшIэн джащ фэдэу зэхешIэ Андрей Шелудько.