Адыгеим и ЛIышъхьэу Къум­пIыл Мурат Урысыем щынэгъончъэнымкIэ и Фе­деральнэ къулыкъу и ГъэIорышIапIэу Адыгэ Республикэм щыIэм Iоф щызышIэхэрэм адэжь кIогъагъ, я Мафэ фэшI ахэм афэгушIуагъ.

ГъэIорышIапIэм ипащэу Михаил Кемеровым республикэм и ЛIышъхьэ къызэрафэгушIуагъэм пае зэрэфэразэр къыхигъэщыгъ, къэралыгъо хабзэм икъулыкъухэм зэгурыIоныгъэ азыфагу илъэу республикэм япшъэрылъхэр зэрэщагъэца­кIэ­хэрэм къызэрэкIырамыгъэ­чы­щтым ицыхьэ зэрэтелъыр къы­Iуагъ.

ГъэIорышIапIэм щыкIогъэ зэ­IукIэм къекIолIагъэх АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, фе­деральнэ инспектор шъхьаIэу Сергей Дрокиныр, АР-м и Апшъэрэ хьыкум, хэгъэгу кIоцI IофхэмкIэ и Министерствэ, Урысые Федерацием и Следственнэ комитет иследственнэ гъэIорышIапIэу АР-м щыIэм япащэхэр, АР-м РосгвардиемкIэ и ГъэIорышIапIэ, ФСИН-м и ГъэIорышIапIэу Адыгэ Респуб­ликэм щыIэм яIофышIэхэр ыкIи къулыкъу зэфэшъхьафхэм яветеранхэр.

Адыгеим и ЛIышъхьэ ипсалъэ къызэрэщыхигъэщыгъэмкIэ, къулыкъум иIофышIэхэм пшъэ­рылъэу яIэхэр зэрифэшъуашэу агъэцакIэх, цIыфхэм ящынэгъон­чъагъэ укъуагъэ мыхъуным те­гъэпсыхьэгъэ Iофтхьабзэхэм чанэу ахэлажьэх.

«Урысыем и Президентэу Владимир Путиным къызэрэхигъэщырэмкIэ, «дунаим псынкIэу зэхъокIыныгъэхэр зыщыфэхъу­хэрэ, гумэкIыгъуакIэхэр къызщыкъокIыхэрэ лъэхъаным щы­нэгъончъэным икъулыкъухэм пшъэрылъэу яIэхэм нахь ахэхъо. Мэхьанэшхо зиIэ лъэныкъохэмкIэ IофшIэныр гъэлъэшыгъэн, кадрэхэм яамалхэр нахь икъоу гъэфедагъэ зэрэхъущтхэм анаIэ тырагъэтын фае». Пстэуми апэу ар зыфэгъэхьыгъэр террориз­мэмрэ экстремизмэмрэ апэ­шIуекIорэ бэнэныгъэр гъэлъэшы­гъэныр ары. Лъэпкъ ыкIи дин зэмызэгъыныгъэхэр щыIэхэ, къэ­ралыгъо IофшIэным пэуцужьхэрэм цIыфхэр агъэплъэхъухэ хъущтэп, тиобществэ изыкIыныгъэ ылъапсэ зэщызгъэкъонэу пылъхэм пхъашэу апэуцужьыгъэн фае», — къыIуагъ КъумпIыл Мурат.

Республикэм и ЛIышъхьэ анахьэу анаIэ зытыраригъэ­дзагъэр къэбар къэкIопIэ амалэу щыIэхэр къэухъумэгъэнхэр, къолъхьэ тын-Iыхыным пэуцужьыгъэныр, экономикэм ылъэныкъокIэ бзэджэшIагъэу зэрахьэхэрэм апэшIуекIогъэныр ары.

Проектхэу зэшIохыгъэ хъугъэ­хэм ыкIи социальнэ-экономикэ хэхъоныгъэмкIэ респу­бликэм щырахъухьагъэхэм ягугъу къы­шIызэ КъумпIыл Мурат къы­зэ­рэхигъэщыгъэмкIэ, со­циальнэ зыпкъитыныгъэр къэ­гъэнэжьыгъэным мэхьанэшхо иIэу щыт.

Республикэм и ЛIышъхьэ къызэриIуагъэмкIэ, Урысыем и Президент ихэдзынхэу къи­хьащт илъэсым щыIэщтхэр поли­тическэ мэхьанэшхо зиIэ хъугъэ-шIагъэхэм ахэхьэ, цIыфхэм ящынэгъончъагъэкIэ пшъэдэ­кIыжь зыхьырэ къулыкъухэм ыкIи ведомствэхэм зэкIэ къатефэрэр зэрагъэцэкIэщтым анаIэ икъоу тырамыгъэт хъущтэп.

Урысыем щынэгъончъэнымкIэ и Федеральнэ къулыкъу и Гъэ­IорышIапIэу Адыгэ Республикэм щыIэм щылэжьэрэ пстэуми зэ­рафэразэр ЛIышъхьэм къыIуагъ ыкIи къулыкъум иветеранхэу

Адыгеим ихэхъоныгъэ зиIахьы­шхо хэзышIыхьагъэхэм инэу зэ­рафэразэр къыхигъэщыгъ.

Мы Iофтхьабзэм къекIолIагъэ­хэм джащ фэдэу къафэгушIуагъэх АР-м и Къэралыгъо Совет — Хасэм ипащэхэр, УФ-м и Президент Къыблэ федеральнэ шъолъырымкIэ и Полномочнэ лIыкIо иаппарат, АР-м и Ап­шъэрэ хьыкум, АР-м и МВД, Росгвардием и ГъэIорышIапIэу АР-м щыIэм, Урысыем и ФСИН и ГъэIорышIапIэу Адыгэ Респуб­ликэм щыIэм яIэшъхьэтетхэр.

Анахь хъупхъэу къыхагъэщыгъэхэм АР-м и ЛIышъхьэ ирэзэныгъэ тхылъхэр, АР-м и Къэ­ралыгъо Совет — Хасэм идипломхэр, джащ фэдэу ведомствэ тынхэр ыкIи хэбзэу­хъумэкIо къулыкъу заулэхэм япащэхэм ярэзэныгъэ тхылъхэр аратыгъэх.