Къолъхьэ тын-Iыхыным пэуцужьыгъэнымкIэ АР-м и Комиссие изэхэсыгъоу Адыге­им и ЛIышъхьэу КъумпIыл Мурат зэрищагъэм къолъхьэ тын-Iыхыным игъогупэ пы­бзыкIыгъэнымкIэ АР-м хэгъэгу кIоцI IофхэмкIэ и Министерствэ амалэу зэрихьэ­хэрэм, мыщ фэдэ бзэджэшIагъэм пэуцужьырэ къэралыгъо къулыкъушIэхэм яIэпэIэсэныгъэ зыкъегъэIэтыгъэным япхы­гъэ Iофыгъохэм, къуалъхьэр амытынымкIэ ыкIи къа­IамыхынымкIэ муниципалитетхэм Iофэу ащашIэрэм ыкIи нэмыкI Iофыгъохэм щатегущыIагъэх.

Къолъхьэ тын-Iыхыным пэуцужьыгъэнымкIэ АР-м хэгъэгу кIоцI IофхэмкIэ и Министерствэ Iофтхьабзэу зэрихьэхэрэм АР-м хэгъэгу кIоцI IофхэмкIэ иминист­рэу Олег Безсмельницыныр къа­тегущыIагъ. Ащ зэрэхигъэу­нэфыкIыгъэмкIэ, программэ, лъэпкъ проект зэфэшъхьафхэм бюджет мылъкоу къафыхагъэ­кIырэм ехьылIэгъэ къэбархэр министерствэ гъэнэфагъэхэм полицием къыIэкIагъахьэх. Федеральнэ казначействэм АР-мкIэ ичIыпIэ гъэIорышIапIэрэ ЮФО-мкIэ Росфинмонито­рингымрэ ягъусэхэу мылъкухэр зэрагъэфедэрэм ренэу гъунэ алъафы.

Илъэсыр къызихьагъэм щегъэжьагъэу АР-м хэгъэгу кIоцI IофхэмкIэ и Министерствэ иIофышIэхэм къолъхьэ тын-Iыхын нэшанэ зиIэ бзэджэшIэгъэ 47-рэ къыхагъэщыгъ. Ахэм ащыщэу 7-мэ къолъхьэшхо къащаIахыгъ. Нэбгырэ 20-мэ къолъхьэ тын-Iыхын нэшанэ зиIэ бзэджэшIэгъэ 55-рэ мыгъэ зэрахьагъ. Ахэм яIофхэм хьыкумым щыхэплъагъэх, бзэджашIэхэм уголовнэ пшъэдэкIыжь арагъэхьыгъ.

Республикэм ипащэ зэфэхьысыжьхэм къатегущыIэзэ зэрэхигъэунэфыкIыгъэмкIэ, къэралыгъо программэхэм, лъэпкъ проектхэм къадыхэлъытэгъэ Iофтхьабзэхэм ягъэцэкIэн пае бюджетхэм къахагъэкIырэ мылъкур нахь шIуагъэ къытэу агъэфедэным, хабзэр амыукъоным хэбзэухъумэкIо къулыкъухэм нахь лъэшэу анаIэ атырагъэтын фае.

«Федеральнэ пащэхэм IэпыIэгъоу къыратырэм ишIуагъэкIэ республикэм непэ ищыкIэгъэ амалхэр зэкIэ иIэх экономикэмкIэ, псауныгъэм икъэухъумэнкIэ, гъэсэныгъэмкIэ, псэупIэхэм ягъэ­псынкIэ, гъогушIынымкIэ, коммунальнэ ыкIи нэмыкI лъэныкъохэмкIэ псынкIэу хэхъоныгъэ ышIынэу. Къолъхьэ тын-Iы­хын нэшанэ зиIэ бзэджэшIа­гъэхэр зезыхьэхэрэм ягъогупэ пхъашэу пыбзыкIыгъэн фае», — къыIуагъ АР-м и ЛIышъхьэ.

АР-м и ЛIышъхьэрэ АР-м иминистрэхэм я Кабинетрэ я Администрацие къэралыгъо къулыкъумкIэ ыкIи кадрэ политикэмкIэ и ГъэIорышIапIэ ипащэу Шъхьабэ Налбый къолъхьэ тын-Iыхыным пэуцужьырэ къэралыгъо къулыкъушIэхэм яIэпэ­Iэсэныгъэ зыкъегъэIэтыгъэнымкIэ Iофхэм язытет къытегущы­Iагъ. Къолъхьэ тын-Iыхыным епхыгъэ бзэджэшIагъэхэр зэрамыхьанхэм ыкIи нэмыкI хэ­бзэукъоныгъэхэр амышIынхэм атегъэпсыхьагъэу къэралыгъо граждан къулыкъушIи 133-рэ, къэралыгъо граждан къулыкъум IухьэгъакIэхэмрэ 2023-рэ илъэ­сым Мыекъопэ къэралыгъо тех­нологическэ университетым зэрэщырагъэджагъэхэр ащ къы­Iуагъ.

ХэбзэухъумэкIо къулыкъухэм яIофышIэхэу къолъхьэ тын-Iыхын нэшанэ зиIэ бзэджэшIагъэхэм апэуцужьырэ подразделениехэм ащылажьэхэрэри мыщ фэдэ егъэджэнхэм къахырагъэубы­тэнэу республикэм ипащэ пшъэ­рылъ афишIыгъ.

Теуцожь районым ипащэу УдыкIэко Адамрэ Шэуджэн рай­оным ипащэу Аулъэ Рэщыдэрэ къолъхьэ тын-Iыхыным пэуцу­жьыгъэнымкIэ чIыпIэ зыгъэIоры­шIэжьынымкIэ къулыкъухэм яIоф­хэм язытет къытегущыIа­гъэх.

Республикэм и ЛIышъхьэ зэхэсыгъом муниципалитетхэм игъо щафилъэгъугъ АР-м Iоф­шIэнымрэ социальнэ хэхъо­ныгъэмрэкIэ и Министерствэ игъусэхэу къэралыгъо, муниципальнэ фэIо-фашIэхэм япхыгъэ пшъэрылъхэр МФЦ-м етыжьыгъэнымкIэ IофшIэныр агъэлъэшынэу. Ащ къолъхьэ тын-Iыхыным нахь къыкIыригъэчыщт. Джащ фэдэу Комиссием 2024-рэ илъэсым Iофэу ышIэщтхэм яплан аухэсынэу зэхэсыгъом къащы­халъхьагъ.

Адыгэ Республикэм и ЛIышъхьэ ипресс-къулыкъу