Адыгэ Республикэм футбо­лымкIэ икIымэфэ зэIухыгъэ зэнэкъокъу иящэнэрэ тур къыдыхэлъытэгъэ ешIэгъухэр мы шэмбэтым щыIэщтых. Хабзэ зэрэхъугъэу, ахэр стадионэу «Юность» зы­фи­Iорэм щыкIощтых.

Футболыр зыгу рихьыхэрэр апэрэ лигэм ыкIи ветеранхэм якомандэхэм яешIэгъухэм яплъынхэ алъэкIыщт.

Ветеранхэм якуп хэт командэу зэIу­кIэщтхэр: «ВНГ» — «Фыщт» (сыхьатыр 10-м), ­«Дорожник» — «Щагъдый» (сыхьатыр 11-м), «Делотехника» — «Звезда» (сыхьатыр 12-м).

Апэрэ лигэм хэт командэхэм мы зыгъэ­псэфыгъо мафэхэм я 3 — 4-рэ турхэм къа­дыхэлъытэгъэ ешIэгъухэр яIэщтых. «Спортмастер-2» ыкIи «Легион», «Люди в черном» ыкIи «СШОР-2007» зыфиIорэ командэхэр зэIукIэщтых. Мы купым хэтхэм мэфитIум къыкIоцI ешIэгъу 12 яIэщт, ахэр пчэдыжьым сыхьатыр 10-м рагъэжьэщтых.

Ау футболыр зыгу рихьыхэрэм анахь ашIогъэшIэгъоныр апшъэрэ лигэм хэт коман­дэхэм язэIукIэгъухэр ары. Ом изытет къы­хэкIэу ахэм туритIу блатIупщыгъ. Ящэнэрэ турым къыдыхэлъытэгъэ ешIэгъу шъхьаIэм щызэIукIэщтых командэ анахь лъэшхэм ащыщхэу «Урожаимрэ» «Кавказымрэ». Ар мафэм сыхьатыр 12-м рагъэжьэщт.

Джащ фэдэу мы мафэхэм зэдешIэщтых:

«Картонтара-Шытхьал» — «МГГТК АГУ», «ИФК и дзюдо АГУ» — «МФОК Ошъутен», «Зэкъошныгъ» — «Юность».