УФ-м и Президент ихэдзын зызщыфагъэхьазырырэм ыкIи ар зыщыкIощт лъэхъаным щынэгъончъагъэ щыIэныр, ИлъэсыкIэ мэфэкI­хэм ялъэхъан террористическэ ­актхэр зэрамыхьанхэм, терроризмэм пэуцужьыгъэнымкIэ планыр зэрагъэцакIэрэм ыкIи нэмыкI Iофыгъохэм терроризмэм пэшIуе­кIогъэнымкIэ АР-м икомиссиерэ и Оперативнэ штабрэ зэдыряIэгъэ зэхэсыгъом щатегущыIагъэх. Адыге­им и ЛIышъхьэу КъумпIыл Мурат зэхэсыгъор зэрищагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэ­рэщэ Анзаур, федеральнэ инспектор шъхьаIэу Сергей Дрокиныр, хэбзэухъу­мэкIо къулыкъухэмрэ уплъэкIунхэм афэ­гъэзэгъэ къулыкъухэмрэ япащэхэр.

Урысые Федерацием и Президент ихэдзын гъэтхапэм и 15-м къыщегъэ­жьагъэу и 17-м нэс хэгъэгум щыкIощт. ЩынэгъончъагъэмкIэ къулыкъухэм лъэшэу анаIэ зытырагъэтыщтыр Урысыем ишъолъырхэм диверсионнэ актхэмрэ зэщыгъэкъон Iофхэмрэ ащызэрамыхьанхэр ары. Ащ епхыгъэу терроризмэм пэшIуекIогъэнымкIэ комиссиемрэ Оперативнэ штабымрэ яунашъохэм ягъэцэ­кIэнкIэ, цIыфхэр жъугъэу зыхэлэжьэщт культурэ Iофтхьабзэхэм язэхэщэнкIэ къулыкъу гъэнэфагъэхэм пшъэдэкIыжьэу ахьырэм къыхэхъощт. Щынэгъончъа­гъэмкIэ Федеральнэ къулыкъум АР-мкIэ и ГъэIорышIапIэ ипащэу Михаил Кемеровым ащ фэгъэхьыгъэу къыIуагъ.

Зэхэсыгъом зэрэщыхагъэунэфыкIы­гъэмкIэ, чIыпIэ хэдзэкIо комиссии 9, участкэ хэдзэкIо комиссие 265-рэ Адыге­им щызэхащэщт. Республикэм и ЛIышъхьэ агитационнэ Iофтхьабзэхэр зэра­хьэхэ зыхъукIэ хабзэр амыукъоным, цIыф­хэм амакъэ зыщатыщт чIыпIэхэр щынэгъончъэнхэм гъунэ зэрэлъафырэр агъэлъэшын зэрэфаем зэхэсыгъом хэлажьэхэрэм анаIэ тыраригъэдзагъ.

«Урысыем и Президент ихэдзын зыз­щыфагъэхьазырырэ, республикэм ар зыщыкIощт лъэхъаным IофшIэнышхо зэшIохыгъэн фаеу хъущт. ЦIыфхэм ама­къэ зыщатыщт унэхэр зэкIэ зэрищы­кIагъэм лъыкIахьэу ауплъэкIунхэ фае. ХэдзыпIэ участкэхэм террористическэ актхэр ащызэрамыхьанхэм, машIом ахэм закъыщимыштэным, хэдзэкIо комиссиехэм къэбархэр аIэкIэзыгъэхьэрэ инфраструктурэм иIофшIэн тэрэзэу зэхищэным лъэшэу анаIэ атырагъэтын фае», — къыIуагъ КъумпIыл Мурат.

ИлъэсыкIэ мэфэкIхэм зызэрафагъэ­хьазырырэми шъхьафэу зэхэсыгъом щы­тегущыIагъэх. АР-м хэгъэгу кIоцI Iоф­хэмкIэ и Министерствэ ипащэ къызэриIуагъэмкIэ, хэбзэухъу­мэкIо къулыкъухэм зэпхыныгъэ пытэ яIэным анаIэ тырагъэты. Экстремистскэ нэшанэ зиIэ бзэ­джэшIагъэхэр зезыхьэхэрэр къыхэгъэщыгъэнхэм пае къэбар жъугъэм иамалхэмрэ Интернетым ихъытыухэмрэ ауплъэкIух. Оперативнэ-пэшIорыгъэшъ Iоф­тхьабзэхэр зэрахьэх, общест­веннэ рэхьатныгъэм икъэухъу­мэнкIэ унэе ухъумэкIо орга­низациехэм зэдэлэжьэныгъэ ады­ряIэнэу агъэнэфагъ. ЗекIоным епхыгъэ чIыпIэхэр нахь щынэгъончъэнхэм пае амал тедзэхэр къызфагъэфедэнэу рахъухьэ. Мыекъуапэ имэрие къызэритыгъэмкIэ, ИлъэсыкIэ Iофтхьабзэхэм язэхэщэн пае гъэсэныгъэ языгъэгъотырэ организацие 70-м ехъу, культурэм иучреждении 2 къызфагъэфе­дэнэу рахъухьэ. ТхьамыкIагъо къэхъун зэрилъэкIыщтымкIэ цIыф­хэм псынкIэу макъэ языгъэIурэ системэр зэрэзэтегъэ­псыхьагъэр ауплъэкIугъ. ЦIыф­хэр жъугъэу зыщызэрэугъоирэ чIыпIэхэу къалэм иIэхэм видео­камерэхэр ащагъэуцугъэх. Народнэ дружинэхэм ахэтхэр ухъу­мэн Iофтхьабзэхэм къахагъэлэжьэщтых.

Республикэм и ЛIышъхьэ пшъэ­рылъ афишIыгъ террористическэ актхэр зэрамыхьанхэм, машIом зыкъимыштэным, автомобиль авариехэр къэмыхъунхэм, цIыфхэм шъобжхэр атещагъэ мыхъунхэм атегъэпсыхьэгъэ информационнэ Iофтхьэбзэ те­дзэхэр зэрахьанхэу.

2019 — 2023-рэ илъэсхэм терроризмэм пэшIуекIогъэнымкIэ УФ-м иплан республикэм зэрэщагъэцакIэрэми зэхэсыгъом щытегущыIагъэх. АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм зэ­пхыныгъэ адыряIэнымкIэ ыкIи къэбар жъугъэм иамалхэмкIэ и Комитет ипащэ къызэриIуагъэм­кIэ, терроризмэмрэ экстремиз­мэмрэ яидеологие къызэхэзыфырэ информационнэ материалхэр республикэм къыщыдэ­кIых. Терроризмэм пэшIуекIогъэнымкIэ муниципальнэ ко­миссиехэм ныбжьыкIэхэр, дин па­щэхэр, общественностыр, хэбзэухъумэкIо къулыкъухэр къы­зыхэлэжьэрэ Iофтхьабзэхэр зэрахьэх. Къэралыгъо телерадиокомпаниеу «Адыгея» зыфиIорэр игъусэу терроризмэм пэшIуекIорэ видеороликхэр къулыкъум къыгъэхьазырыгъэх.

Терроризмэм пэуцужьыгъэнымкIэ Iофтхьабзэу зэрахьэ­хэрэм ахэлэжьэрэ къулыкъухэм язэдэлэжьэныгъэ агъэлъэшын зэрэфаер республикэм ипащэ къыхигъэщыгъ. ЛIышъхьэм ишIошI­кIэ, терроризмэм пэшIуекIогъэ­нымкIэ комиссием иунашъохэр икъоу гъэцэкIэгъэнхэм нахь лъэшэу анаIэ тырагъэтын фае.

Адыгэкъалэ терроризмэм пэшIуекIогъэнымкIэ икомиссие Iофэу ышIагъэм муниципалитетым ипащэ къытегущыIагъ. Лъэпкъ, дин нэшанэ зиIэ зэмызэгъыныгъэхэр мыгъэ зэрэщымыIагъэхэр зэхэсыгъом щы­хагъэунэфыкIыгъ. КультурэмкIэ ыкIи гъэсэныгъэмкIэ учреждениехэр террористическэ актхэм ащыухъумэгъэнхэм атегъэпсы­хьэгъэ паспортхэр къагъэхьазырыгъэх, цIыфхэр предприятиехэмрэ организациехэмрэ зэрадагъэхьэрэ шапхъэхэр нахь агъэлъэшыгъэх.

Терроризмэм пэшIуекIогъэнымкIэ АР-м икомиссие иаппарат ипащэ къыIэтыгъэ Iофыгъо­хэм затегущыIэхэ нэуж зэхэсыгъом хэлажьэхэрэм 2024-рэ илъэсым терроризмэм пэшIуе­кIогъэнымкIэ Iофэу ашIэщтым иплан аухэсыгъ.

АР-м и ЛIышъхьэ ипресс-къулыкъу