Непэ адыгабзэм зэпичырэ къиныгъохэр гъэзетэу «Адыгэ макъэм» щылажьэхэрэм зыгорэм къафиIотэжьынхэу щы­тэп. Iофэу ашIэрэм ишIуагъэ­кIэ гумэкIыгъом икуупIэ зэхашIэ.

[caption id="attachment_143293" align="aligncenter" width="800"] И. Анцокъу.[/caption]

Гъэзетым иблэкIыгъэ къыу­хъумэзэ, непэ хахъо фишIызэ «Адыгэ макъэр» мэлажьэми, неущырэм ымыгъэпэн ылъэкIырэп: IофшIэныр лъызыгъэкIотэн зылъэкIыщтэу къыткIэхъухьэрэ лIэужхэм къахэкIырэр зырыз дэдэу зэрэщытыр гумэкIыгъо шъхьаIэу зыдиIыгъ. Iофыгъом хэкIыпIэ фылъыхъоу республикэ гъэзетым иредактор шъхьаIэу МэщлIэкъо Саидэ игукъэкIкIэ дэкIыгъо зэIукIэгъухэр респуб­ликэм ирайонхэм редакцием ащызэхещэх. Адыгэ журналисти­кэм инепэрэ мафэ, ащ иамал­хэр, шIоигъоныгъэ зиIэ ныбжьыкIэхэм ащ зыщаушэтын, ыужыкIэ гъэзетым щылэжьэнхэ зэралъэкIыщтыр ныбжьыкIэхэм агурыгъэIогъэныр Iофтхьабзэм ипшъэрылъ шъхьаI. Апэрэ Iоф­шIэгъу дэкIыгъор къуаджэу Пэ­нэжьыкъуае игурыт еджапIэ непэ щыкIуагъ. Теуцожь районым игурыт еджапIэхэм яя 9 — 11-рэ классхэм яеджа­кIохэр ащ хэлэжьагъэх. АдыгабзэкIэ республикэм къыщыдэ­кIырэ гъэзет закъом тарихъ бай зэриIэр, непэ Iофэу ышIэрэр ыкIи лъэхъаным амалэу къыты­хэрэр зэрагъэфедэхэрэр Мэщ­лIэкъо Саидэ ныбжьыкIэхэм къафиIотагъ.

— Непэ гъэзетыр хэутыгъэу къыдэкIырэ къодыеп. Адырэ къэбарлъыгъэIэс амал пстэуми афэдэу хъытыум нэкIубгъохэр ащыриIэх. ТГ-м, ВК-м чанэу тащэлажьэ. Республикэм щы­хъурэ-щышIэрэр псынкIэу ахэм къарытэгъахьэ, сайтми Iоф ешIэ. Ау гукъаор бзэм рылэжьэщт ныбжьыкIэхэр зэрэмэкIэ дэдэр, тIэкIу тешIэмэ ары, тымыгъотыжьыхэнхэм ищынагъуи щыI. Ащ къыхэкIэу зыкъышъуIуд­гъэ­кIагъ. Хэта зышIэрэр, адыгэ журналистикэм ищыIэныгъэ езыпхын къышъухэкIымэ, ти­пчъэ­хэр шъуфызэIухыгъэх, — къыIуагъ МэщлIэкъо Саидэ.

[caption id="attachment_143294" align="aligncenter" width="800"] И. Анцокъу.[/caption]

Джащ фэдэу, «Адыгэ макъэм» ижурналистхэу Iэшъынэ Суса­нэрэ Анцокъо Иринэрэ ныбжьыкIэхэм гущыIэгъу афэхъугъэх, яIофшIэн фэгъэхьыгъэ упчIэхэр къараты­гъэх. Анахь гъэшIэгъо­нэу гъэзет журналистикэм хэлъым, къиныгъоу зыIукIэхэрэм къакIэупчIагъ Хьабэхъу Саидэ.

— ТиIофшIэн гъэшIэгъон закI. Мафэ къэс цIыфыкIэхэм таIокIэ, чIыпIакIэхэм тэкIо. Тисэнэхьат тахещэ, такъыхещыжьы. А пстэури тиныдэлъфыбзэ ихьатыркIэ. ЕтIанэ, сэнэхьатыр къыхэпхы зы­хъукIэ, нахь шъхьаIэр ащ уфе­джэн закъор арэп, урылэ­жьэ­жьы­шъун фае, — адэгощагъ ныбжьыкIэхэм АР-м изаслуженнэ журналистэу Iэшъынэ Сусанэ.

— НэмыкI лъэпкъ шъухэхьа­ъэмэ, ашIогъэшIэгъон шъузы­шIыщтыр шъузэрэадыгэр, ны­дэлъфыбзэу шъуIулъыр, культу-рэр ары. Арышъ, шъубзэ шъу­­шIэщтмэ, сыхьат пчъагъэу еджа­пIэм чIэлъым ар елъытыгъэнэу щытэп. ШъурыгущыI, жъугъэбзэрабзэ, шъукъытфатх, джы щегъэ­жьагъэу шъукъыд­дэлажь, — къы­Iуагъ Анцокъо Иринэ.

УпчIэ-джэуап зэдэгущыIэгъум ныбжьыкIэхэм ныдэлъфыбзэр зэ­раIулъыр къыгъэлъэгъуагъ. КIэлэ­еджакIохэр етIупшыгъэу адыга­бзэм рэгущыIэх. ЯщыIэныгъэ адыгэ журналистикэм рамыпхыщтми, ныдэлъфыбзэр зэрамы­гъэкIодыщтыр къыха­гъэщыгъ.

— Сэ врач сыхъу сшIоигъу. Ау ащ къикIырэп синыдэлъфыбзэ шIу сымылъэгъоу. Непэ ащ чанэу сырэгущыIэ, сэгъэлъапIэ. Ащ изэгъэшIэн дэдзых пшIы ухъущтэп, — къыддэгощагъ игупшысэхэмкIэ Пэнэжьыкъое гурыт еджапIэм ия 10-рэ класс ис Хьабэхъу Саидэ.

— Адыгабзэр ары ренэу сызэ­рыгущыIэрэр. Синыбджэгъу Ты­гъужъ Батыррэ сэрырэ адыгабзэм­кIэ олимпиадэхэм ренэу та­хэла­жьэ, чIыпIэхэр къэтэхьых. Ти­кIас тыбзэ, шIу тэлъэгъу. — къыти­Iуагъ мы еджапIэм ия 8-рэ класс щеджэрэ Шъхьэлэхъо Расул.

ЛъэныкъуитIумкIи шIуагъэ хэ­лъэу зэIукIэгъур кIуагъэ. ­Шъхьадж ишIошIхэр къыриIотыкIынхэ ылъэкIыгъ. Мыщ фэдэ дэкIыгъохэр редакцием иIофышIэхэм район пстэуми ащызэхащэщтых.

Бжыхьэкъо Бэл.