Къэгъэлъэгъон-форумэу “Урысыер” зыфиIоу Москва щызэIухы­гъэм тыгъэгъазэм и 14-м Адыгеим и Мафэу щыкIуагъэм игъэкIо­тыгъэу зыкъыщызгъэлъэгъуагъэхэм ащыщ АР-м IофшIэнымкIэ ыкIи социальнэ хэхъоныгъэмкIэ и Министерствэ.

[caption id="attachment_143289" align="aligncenter" width="800"] Сурэтыр авторым ий.[/caption]

Ащ ипащэу Мырзэ Джанбэч иIофшIэгъухэр игъусэхэу къэгъэ­лъэгъоным зэрэхэлэжьэщтхэ программэ ин пэшIорыгъэшъэу зэхагъэуцогъагъ.

ХьакIэхэм къарагъэлъэгъущт социальнэ проектхэм ягъусэу апагъохыщт шхыныгъохэр къыздащагъэх, зыхагъэлэжьэщтхэ зэнэкъокъухэр рахъухьагъэх, якъэгъэлъэгъуапIэ лъэпкъ IэпэщысэхэмкIэ агъэдэхагъ. Къэгъэ­лъэгъоныр зыщыкIуагъэр УФ-м IофшIэнымкIэ ыкIи социальнэ хэхъоныгъэмкIэ и Министерствэ ипавильон. Ащ епхыгъэу Iоф зышIэрэ волонтерхэр пстэуми яIэпыIэгъугъэх. КъэгъэлъэгъуапIэр агъэхьазырыфэ социальнэ фэIо-фашIэхэмкIэ къулыкъухэм адэлэжьэрэ отделым ипащэу ЦIыпIынэ Жанетэ гущыIэгъу сыфэхъугъ.

— Аужырэ илъэсхэм ныбжь зиIэхэм игъэкIотыгъэу Iоф адэтэшIэ. Социальнэ фэIо-фашIэхэмкIэ гупчэу районхэм арытхэм мэфэ стационархэр къащызэIутхыгъэх. Ныбжь зиIэхэм яакъыл, яшIэжь, аIэ къыхьырэм къащымыкIэным пае ахэм тиIофышIэ­хэр игъэкIотыгъэу адэлажьэх. Мыгъэ Iофтхьэбзэ зэфэшъхьафыбэ ахэм афызэхэтщэгъагъ. Республикэ спартакиадэр ахэм зэу ащыщ. СпортымкIэ АР-м и Комитет ащкIэ IэпыIэгъу къытфэхъугъ. ТекIоныгъэ къыдэзыхыгъэ нэбгыри 9-р Санкт-Петербург дгъэкIогъагъэх. Ащ щыкIогъэ зэнэкъокъухэм дэгъоу за­къыщагъэлъэгъуагъ. Мыщ фэдэ проектхэмкIэ нэмыкI шъолъыр­хэм тадэгощэн тлъэкIыщт, зэ­дэ­лэжьэныгъэм тыфэхьазыр.

ЗэрэчъыIэм емылъытыгъэу, къэгъэлъэгъуапIэм цIыфыбэ къекIолIэгъагъ. Ахэм ахэтыгъэх сэкъатныгъэ зиIэхэм я Урысые обществэ икъутамэу Москва исоциальнэ къэлэ къулыкъу зынаIэ тет нэжъ-Iужъхэм ыкIи сэкъатныгъэ зиIэхэм ялIыкIо 30. Курэжъыехэм арысхэр ахэм бэу ахэтыгъэх.

Абэсэ зэшхэр пщынэмрэ пхъэкIычхэмрэ зэдагъэжъыу­хэзэ хьакIэхэм адыгэ мэкъэмэ чэфкIэ апэгъокIыгъэх. Журна­лис­тэу ТIэшъу Светланэ хьа­кIэ­хэм шIуфэс гущыIэ дахэхэр афи­гъэ­загъ, къэгъэлъэгъуапIэм ригъэ­блэгъагъэх.

Адыгеим фэгъэхьыгъэ фильм кIэкIыр къызагъэлъэгъо нэуж АР-м IофшIэнымкIэ ыкIи со­циальнэ хэхъоныгъэмкIэ иминистру Мырзэ Джанбэч къэгущы­Iагъ. Лъэпкъ проектэу «Ныбжь зиIэхэр» зыфиIорэм зэрэдэ­ла­жьэхэрэр къыIотагъ. Шъолъыр пащэм ынаIэ тетэу федеральнэ ыкIи шъолъыр программэхэр зэрагъэцакIэхэрэм игъэкIоты­гъэу къатегущыIагъ.

— Проектэу «Москва игъэшIэ кIыхьэхэр» тищысэтехыпIэу шъолъырхэмкIэ тызэнэкъокъузэ тэлажьэ, шъхьадж ишъолъыр щызэшIуихын ылъэкIыщт Iоф­тхьабзэхэр егъэнафэх. УФ-м Iоф­шIэнымкIэ ыкIи социальнэ хэхъоныгъэмкIэ иминистрэу Ан­тон Котяковым тыдэлажьэ. Пенсием зыныбжь нэсыгъэхэм ящыкIэгъэ фэIо-фашIэхэм язэшIохын къэзыгъэпсынкIэрэ про­ектыр республикэм щагъэцакIэ. Пенсием кIорэ цIыфхэр зыми имыщыкIагъэхэу къащыхъоу, фэгъэкIотэныгъэу яIэхэм икъоу ащымыгъуазэхэу, шIэныгъэ, сэ­нэхьат тедзэхэр зэрэзэрагъэгъотыщтыр амышIэу зэрэщытыр дгъэунэфыгъэ. Къулыкъу, компание зэфэшъхьафхэу IэпыIэгъу афэхъун зылъэкIыщтхэм, яфинанс шIэныгъэхэр къэзыIэтыщтхэм, юридическэ лъэныкъомкIэ упчIэжьэгъу афэхъущтхэм ащызыгъэгъозэхэрэ программэ афызэхэдгъэуцуагъ. Ащ къыде­лъытэ культурнэ Iофтхьабзэхэм ямэкъэгъэIу, зекIо-зыгъэпсэ­фыпIэу Адыгеим итхэм якъэтхы­хьан. Ныбжь зиIэхэр чанхэу гъэшIэ кIыхьэр рахыным пае спорт комплексхэр ыпкIэ хэмылъэу къызфагъэфедэн алъэ­кIынэу дгъэпсыгъэ. Джащ фэдэу ахэр волонтерхэми ахэхьашъущтых. Физкультурэ Iофтхьабзэ­хэм ямэфэпчъи проектым къы­делъытэ.

[caption id="attachment_143290" align="aligncenter" width="800"] Сурэтыр авторым ий.[/caption]

Адыгеим иминистрэ игущыIэ ашIогъэшIэгъонэу бысымхэр едэIугъэх, кIэухым Iэгу фытеуа­гъэх. Пцыикъ чъыгым пашIэщт лъэпкъ джэгуалъэхэм яшIын къэгъэлъэгъоным къекIолIагъэ­хэр хагъэлэжьагъэх. Ащи лъэшэу фэчэфыгъэх.

Сэкъатныгъэ зиIэхэм яIобществэу Москва щызэхэщагъэм Къыблэ-ТыгъэкъохьэпIэ районымкIэ ипащэ игуадзэу Ольга Абуковам зэхахьэм нэIуасэ ты­щыфэхъугъ. Ежьыри курэ­жъыем исыгъ нахь мышIэми, анахь чанэу къэгъэлъэгъоным хэлэжьагъэхэм ащыщыгъ.

— Москва ыуж шъукъинэрэп. Адыгеим иминистрэ программэу непэ къызтегущыIа­гъэм тшIогъэшIэгъонэу тедэIугъ. Тызэдэлэжьэн фае. Шъолъыр дахэ шъущэпсэу, зекIоным зиу­шъомбгъуным шъупылъ, тэркIэ ар гъэшIэгъон. Адыгеим тыкъа­кIо тшIоигъоу тыхъугъ.

Сэкъатныгъэ зиIэхэм яоб­ществэу Москва щызэхэщагъэм испециалистэу Надежда По­дальцевам къыхигъэхъожьыгъ:

— ТиIофшIэгъоу Адыгеим щыпсэухэрэм зэшIуахырэ Iоф­тхьабзэхэм тагъэгушIуагъ. Къэ­гъэлъэгъоныр дахэу зэхащагъ. Адыгэ культурэр зэрэбаир нэ­рылъэгъу тфэхъугъ. Лъэпкъ шэн-­хабзэхэри къэжъугъэлъэ­гъуагъ, лъэпкъ дэхагъэм тиумэхъыгъ, тыфай зэпхыныгъэхэр тиIэнхэу.

Министерствэм епхыгъэ къулы­къухэм, муниципальнэ гъэIорышIапIэхэм ащызэхищэрэ Iофтхьэбзэ зэфэшъхьафхэр къи­зыIотыкIырэ интерактивнэ плат­формэу УФ-м IофшIэнымкIэ ыкIи социальнэ хэхъоныгъэмкIэ и Министерствэ зэхигъэуцуагъэм Адыгэ Республикэр зэрэхэтыр ЦIыпIынэ Жанетэ хьакIэхэм аригъэлъэгъугъ, узэрэдэлэжьэщтым нэIуасэ фишIыгъэх.

— Ныбжь зиIэхэр Iофтхьабзэ зэфэшъхьафхэм ахэтэгъэлажьэх. Къашъом, орэдкъэIоным, пщэ­ры­хьаным афэщагъэхэм апае десэхэр районхэм ащызэхэтэщэх. Социальнэ хъытыухэми купхэр ащызэхэщагъэхэу тынаIэ атет. Адыгэ къуаем ифестиваль, адыгэ хьалыжъом, къэбым ямэфэкIхэр блэдгъэкIхэрэп. Тигу­псэхэм тызэрафыщытым фэдэу нахьыжъхэр тэгъашIох, зетэщэх. Непэ типроектхэм щыгъуазэ шъузэрафэхъугъэм мэхьанэшхо етэты. УФ-м и Министерствэу тызэпхыгъэм къытитыгъэ амалымкIэ тыфэраз, — къыIуагъ ащ.

Къэгъэлъэгъоным икIэухым бысымхэри хьакIэхэри зыхэлэжьэгъэхэ адыгэ джэгум пчэгур зэлъиубытыгъ. Курэжъыем зэрисхэу къешIагъэхэри къа­хэкIыгъэх. Ныбжьым, фыкъоныгъэу иIэм ямылъытыгъэу цIыфым чанэу гъэшIэ кIыхьэр ри­хын зэрилъэкIыщтым ищысэ Адыгеим къыгъэлъэгъуагъ.

Тэу Замир.