2024-р унагъом и Илъэсэу Урысыем и Президентэу В. В. Путиным зэригъэнэфагъэм тигъэгушIуагъ, зы бэрэчэтыгъэ ин горэ илъэсыкIэм хэлъыщтэу къытщыхъугъ.

«Унагъо умыхъоу, къэрал ухъущтэп» еIо гущыIэжъым. Тиунагъохэр лъэпсэ пытэнхэу, тикъэралыгъошхоу Урысыем мамырныгъэ-тынчыныгъэ илъынхэу тэлъаIо.

УсакIоу, тхакIоу Хьакъунэ Заремэ мы мафэхэм итхыгъакIэхэм ащыщ усэхэр редакцием къытфихьыгъэх. Ахэр гупшысэ закIэх, гум къекIых, псыхьагъэх. Заремэ адыгэ унэгъо зэгурыIо щапIуныр инасып къыхьыгъ: ыбзи, ихабзи пкъырыхьагъ, джы а зэкIэ ежьым илъэпкъ IуегъэкIэжьы — матхэ, мэусэ, адыгабзэр дахэу егъэ­IорышIэ. Прозэми, сэмэркъэу-кIэнэкIэлъэ тхыгъэхэми затырегуащэ ыкIи къыдэ­хъух. Усэныр, ежь къыдэхъугъэу хэлъышъ, ахэм узяджэкIэ, игущыIэ псынкIэу къып­пкъырэхьэ. Иусэ сатырхэр зэрэзэриблыхэрэм ижъырэ лъэпкъ усакIэр гум къагъэкIы. УсакIэхэр къаIуатэрэмкIэ щэу зэтеутыгъэх: адыгэ бзылъфыгъэхэм афэгъэ­хьыгъэ поэмэр; ныбжьыкIэхэм афэгъэзэгъэ усэу «КIалэхэр, шъошIа?» ыкIи илъэсыкIэу къэблагъэрэмкIэ сабыйхэр ыгъэгушIохэмэ шIоигъоу афитхыгъэ кIымэфэ-мэфэкI усэ цIыкIу кIэракIэхэр.

Ныр — нэ. Ащ тыкъыхэкIы, тепIу, телэжьы, ыпсэ къуапэ тыщыщышъ, къы­тIуплъэ закъомэ, тыгу илъыр къешIэ. Ар теIэфэ тыбай. Заремэ иамал къызэрихьэу адыгэ ным ыгу ишъэбэгъэ-IэшIугъэ, илъэшыгъэ-щэIэгъэ мыухыжь лъфыгъэхэм аригъашIэ, афыриIотыкIы шIоигъу, къегъоты екIоу гущыIэ дэгъухэри, ным пеIэн псэ зыпыт гори зэрэщымыIэр, ащ тыфэсакъын, тыкIырыплъын, цIыфы тызэрэхъущтым тыпылъын зэрэфаер; джащыгъум ным ыгу зэрэхэхъощтыр, ар непэ щымыIэжьми, дэгъоу тшIэрэм зэригъэразэу зэригъэгушIорэ, тимыхъун утын-лыуз зэрэхихырэр усакIом иамалкIэ тегъашIэ.

«Ным ишIулъэгъу шъорышIэп — ежь шъузпешIы», — еIо Заремэ.

Илъфыгъэ паемэ, ныр зэблэжьырэп. Ау ащ гу лъызымытэрэри макIэп. УсакIор джащ паекIэ мэгумэкIы, мэгуIэ, тикIэлакIэхэм гукIэгъу-лыузыр ным фыряIэным кIэхъопсы, къыфэджэ:

«КIалэхэр, шъошIа? ГъэшIэгъон гъашIэр, Шъул зыщыузрэм, Ным ыгу мэузы».

ЩыIэныгъэм ыгупчэ ит цIыфымкIэ анахь мэхьанэ зиIэр цIыфыгъэ пхэлъыныр арэу зэрэщытыр, пфэлъэкIыщтымкIэ ным уедэхэшIэныр, уфэсакъыныр, зыфиIорэр фэпшIэныр анахь шэнышIоу зэрэщытыр дахэу усэкIэ къыриIоты­кIыгъ.

УсакIор ежьыри бэшIагъэу ны, нани хъугъэ, ны пстэумэ афэдэу, ахэм затыреухэ, ау фэныкъу ежьыри лъфыгъэм игукIэгъу-шIулъэгъу ыкIи а зэкIэ ны минхэм ацIэкIэ къыриIотыкIыгъ.

Мамырыкъо Нуриет.

Хьакъунэ Зарем КIалэхэр, шъошIа? КIалэхэр, шъошIа? ГъэшIэгъон гъашIэр, — Ныр зыгъэгушIо Пэпчъ Тхьэр къешIушIэ, КIалэхэр, шъошIа? ГъэшIэгъон гъашIэр, — ШIулъэгъу шъорышIэп, Ным ежь шъузпешIы, КIалэхэр, шъошIа? ГъэшIэгъон гъашIэр, — Шъул зыщыузрэм Ным ыгу мэузы. КIалэхэр, шъошIа? ГъэшIэгъон гъашIэр, — Ным ыгу къэзIэтрэр Ары пэрытыр. КIалэхэр, шъошIа? ГъэшIэгъон гъашIэр, — Ным ыгу зызакъо! Тафэжъугъэсакъых Ренэу тянэхэм, Шъхьас яIэп ахэм ЕгъашIэм тэркIэ, Ныр бгъэгушIонкIэ Сыдэу тхъэгъуабза! — Пщынэм фэд ыбзэ, Лъфыгъэм къыдэхъумэ ИIофыр хъуаоу. Ныр бгъэгушхонкIэ Сыдигъуи псынкIэ, Шъуфэзэщыгъэу ЕшъуIомэ шIагъоу Дунэе мылъкур Из къэхъущт ыгу! Ныхэм IаплI фабэр Ащэхъу гуапэ. Тежэ ИлъэсыкIэм Тыгъэгъазэм ыкIэм Осым зеутхыпкIы, МакIэп къыпышъэшърэр, ЗэрэIушъашъэрэр Дэгъоу зэхэтэхы, ЧъыIамэр къыхихэу Къыдэгъуалъхьэ щагум, — Лъэхъу зыдэджэгун. Сабыйхэр икIасэх. Непэ зегъэIасэ. Зэрихьагъ ос хъотыр Зэдгъэфагъ тшIэщтыр, — ТиIофшIэн тигъатхъэу Осыр зэдэтэтхъу, Тежэ ИлъэсыкIэм КъэкIощт ЛIыжъ ЩтыргъукIым. Осхэкухь ешIэщтхэр Къэзэрэугъоих, Осыр армэ – хъои!