АР-м иобщественнэ организациеу «Урысыем иархитекторхэм я Союз» икъэгъэлъэгъон Адыгеим исурэт къэгъэлъэгъуапIэ къыщызэIуахыгъ.

Ащ ехъулIэу мы организацием хэхьэгъэ ныбжьыкIэхэу Уайкъокъо Аслъан, Устэ Ерстэм, Анна Ирхинам Урысыем иархитекторхэм я Союз зэраштагъэхэр къэзыушыхьатырэ тхылъхэр Iофтхьабзэм щаратыжьы­гъэх. IофшIэгъэ 25-рэ фэдиз ныбжьыкIэхэм къэгъэлъэгъоным къырахьылIагъ, япроектхэр къа­гъэшъыпкъэжьыгъэх. Урысыем иархитекторхэм я Союз хэтэу, МААМ-м ипрофессорэу, Пшызэ изаслуженнэ архитекторэу Александр Кузнецовыр къэгъэлъэгъоным къырагъэблэгъагъ. Ащ IофшIэгъэ 50-м ехъу къырищэлIагъ.

Iофтхьабзэм хэлэжьагъэх Мыекъуапэ къэлэгъэпсынымкIэ и Комитет, гъэцэкIэкIо хэбзэ къулыкъухэм, творческэ интеллигенцием ялIыкIохэр, псэолъэ­шIынымкIэ специалистхэр. Урысыем иархитекторхэм я Союз и Адыгэ шъолъыр къутамэ итхьаматэу Галина Ирхинам Iофтхьабзэм къекIолIагъэхэм закъыфигъазэзэ къыIуагъ: «Адыгеим уахътэм диштэу зэхъокIыныгъэшIухэр фэхъунхэм архитекторхэм яIахьышIу хэлъ. Непэ хэдгъэунэфыкIырэ ныбжьыкIэхэм IэпэIэсэныгъэшхо зэряIэр япроектхэмкIэ къаушыхьатыгъ. Тикъэгъэлъэгъон къедгъэблэ­гъэгъэ Александр Кузнецовым гъэхъагъэхэр зэриIэхэр, лъэныкъо зэфэшъхьафхэмкIэ зэрэлажьэрэр иIофшIагъэхэм къаушыхьаты».

Архитектор сэнэхьатым уасэу фашIырэр къэIэтыгъэным, ныбжьыкIэхэм, а сэнэ­хьатым анаIэ тырадзэным мэхьанэшхо зэриIэр А. Кузнецовым хигъэу­нэфыкIыгъ.

Урысыем иархи­текторхэм я Союз хэ­хьэгъэ ныбжьыкIэхэм тафэгу­шIо, ахэм тапэкIи гъэхъа­гъэхэр ашIынхэу афэтэIо.

Лъэпшъыкъо Фатим. Сурэтыр: А. Лаутеншлегер.