«Урысыер — амалыбэ зиIэ хэгъэгу» зыфиIорэ президент платформэм ипроектэу «Джэгуныр егъажь» («Начни игру») зыцIэм иятIонэрэ едзыгъо зызыщарагъэтхырэ уахътэр аухыгъ.

Мэзитфым къыкIоцI Урысыем ишъо­лъыр 89-мэ ыкIи ныбджэгъу зэфыщытыкIэ зыдытиIэ къэралыгъо 24-мэ ащыщ нэбгырэ 91281-мэ ятхылъхэр атыгъэх. Адыгэ Республикэм илIыкIохэр нэбгыри 198-рэ мэхъух. Урысые зэнэкъокъур джащ фэдэу федеральнэ проектэу «Нэбгырэ пэпчъ социальнэ лифт фыхэхыгъ» зыфиIорэми къыдыхэлъытагъэу агъэцакIэ, ар лъэпкъ проектэу «Гъэсэны­гъэм» хэхьэ.

Проектым лъэныкъуитIу къызэдеубыты. «Партнер кейсым» къыхиубытэу зэнэкъокъум хэлажьэрэмэ джэгукIэ индустрием хэхьэрэ сэнэхьатмэ ащыщ зэрагъэгъотын алъэкIыщт. Командэхэу опыт зиIэхэр зэгохьагъэхэу зиджэгукIэ проект зыгъэцакIэ зышIоигъохэм ыкIи инвесторхэр къэзыгъотыщтхэм адэлажьэх.

«Урысые зэнэкъокъур президент платформэмкIэ ушэтынэу хъугъэ. ТинасыпкIэ джэгукIэ индустриер зышIогъэшIэгъонхэр бэ хъугъэх, ар статистикэу урысые бэдзэрымкIэ ушэтынэу ашIы­гъэхэм къагъэлъагъо. ПроектыкIэм ишIуагъэкIэ сэнаущыгъэ хэлъэу видео джэгукIэхэр зэхэзыгъэуцохэрэр къэгъо­тыгъошIу мэхъу, игъом мы Iофым ыуж тызэрихьагъэр джыри зэ ащ къегъэшъып­къэжьы. Заявкэхэр къызэратырэм уеп­лъымэ, зэкIэри нэрылъэгъу шъыпкъэ мэхъу — апэрэ едзыгъом нэбгырэ мин 80-мэ шIоигъоныгъэ яIагъэмэ, джы а пчъагъэм процент 15 хэхъуагъ. Проектыр зышIогъэшIэгъонхэр нахьыбэ зышIыгъэмэ ащыщ сэнэхьат лъэныкъоу «Партнер кейсым» къызэрэхэхъуагъэр. Ащ неущырэ мафэ иI, гъэсэныгъэми бизнесми ар ящыкIэгъэ шъыпкъ. ТадэIэпыIэзэ нэбгырэ мини 9-мэ а сэнэхьатыр аIэ къырагъэхьагъ, — къыхигъэщыгъ АНО-у «Урысыер — амалыбэ зиIэ хэгъэгу» зыфиIорэм игенеральнэ пащэ иапэрэ гуадзэу Алексей Агафоновым. — Адыгэ Республикэм щыщхэу зэнэкъо­къум хэлажьэхэрэр финалым нэсынхэу сафэлъаIо! Шъуапэ ежъугъэхъу, ар къы­зэрэжъудэхъущтым тицыхьэ телъ!»

Нэбгырэ 91281-м щыщэу джэгукIэ индустрием епхыгъэ сэнэхьатыр нэбгырэ 67923-мэ къыхахыгъ. Апэ ишъырэр геймдизайныр ары — нэбгырэ 35540-рэ ащ феджагъ. Дизайныр зэзыгъэшIагъэр — 13621-рэ, Unity-зэхэгъэуцоныр — 11374-рэ, геймификациер — нэбгрэ 8571-рэ мэхъу.

«Проектым икомандэ пшъэрылъитIу зыфигъэуцужьыгъагъ: апэрэмкIэ, джэгукIэ индустрием фэгъэхьыгъэ пэублэ шIэныгъэ зэнэкъокъум хэлажьэрэмэ ятыгъэныр, ятIонэрэмкIэ, IофшIэн шъып­къэм хэщэгъэнхэр. Тигухэлъхэр къыддэхъугъэх, едгъэджагъэхэр анахь Iоф­шIэкIо дэгъумэ ащыщ зэрэхъущтхэр тшIошъ хъугъэ, — къыкIигъэтхъыгъ президентскэ платформэм ипроектэу «Джэгуныр егъажь» зыфиIорэм ипащэу Марьям Карповам.

Урысые зэнэкъокъум иятIонэрэ едзы­гъо 2024-рэ илъэсым игъэтхэпэ мазэ рагъэкIокIынэу агъэнафэ. Апшъэрэ технологиехэр зыщагъэфедэхэрэ «ИТ-парк» зыфиIорэ Технопаркэу къалэу Казань дэтым финалыр щыкIощт.