АР-м хэдзынхэмкIэ и Гупчэ комиссие непэ я 28-рэ зэхэсыгъо иIагъ. Ащ Iофыгъуи 7-мэ щатегущыIагъэх, унэшъо гъэнэфагъэхэр щашIыгъэх. Iоф­тхьабзэр зэрищагъ ащ и Тхьаматэу Сэмэгу Нурбый.

Адыгеим изаконопроектэу «АР-м ихэбзэгъэуцугъэхэм ащыщхэм зэхъокIыныгъэхэр афэшIыгъэнхэр» зыфиIорэм фэгъэхьыгъэу къэгущыIагъ комиссием иаппарат ипащэу Сихъу Азэмат. Нэужым Урысые Федерацием и Президент ихэ­дзынхэм языфэгъэхьазырын къэзэрэугъоигъэхэр тегущыIагъэх. Федеральнэ бюджетым къыхэхыгъэ сомэ миллион 59-рэ мин 917-м ехъу АР-м хэдзынхэмкIэ и Гупчэ комиссие къыфатIупщыгъ. КъызэраIуагъэмкIэ, сомэ миллион 44-рэ мин 530-р хэдзын комиссиехэм ахэтхэм ялэжьэпкIэ тедзэу агъэнэфэщт, къатIупщыгъэм ипроцент 75-рэ ар мэхъу. Миллион 15-рэ мин 370-р хэдзынхэмкIэ ящыкIэгъэщтхэр зэрагъэгъотыщтых, бюллетеньхэр, ахэм атетыщт хэу­шъ­хьафыкIыгъэ маркэхэр, про­токолхэр агъэпсыщтых.

— Хэдзынхэр мэфищэ зэ­рэкIощтым къыхэкIыкIэ ащ изэхэщэн пэIухьащт ахъщэри нахьыб. Нэбгырэ мини 3-м ехъумэ Iоф ашIэнэу тэгъэнафэ. Процент 80-р ахэм ялэжьапкIэ текIодэщт. Бюллетеньхэм сомэ миллионым ехъу апэIухьащт, къэнэжьырэр рекламэм ыхьыщт, — къыIуагъ Сэмэгу Нурбый.

Джащ фэдэу республикэм ирайонхэм ыкIи икъалэхэм ащыIэ чIыпIэ комиссиехэм хэ­дзынхэм зызэрафагъэхьазырын фаер къаIуагъ. Федеральнэ ыкIи республикэ бюджетхэм къахэ­хыгъэ мылъкоу афатIупщыщтыр зэрагъэхьащт счетхэм якъызэIухын иIофыгъуи тегущыIа-­ гъэх.

ДЕЛЭКЪО Анет.