ЧъыIэ, лыгъу-лыст, щтыргъукI — шIошъхъугъуаеми, кIымэфэ раф­тингыр зыфэдэр ууплъэкIунымкIэ анахь мэфэ чъыIэри къекIу.

[caption id="attachment_143211" align="aligncenter" width="800"] П. Фешин[/caption]

Мы мафэхэм республикэм къихьэгъэ зекIуабэмэ ар ашъхьэ­кIэ аушэты. ЧъыIэм ичъыIэ­жьэу къушъхьэтIуакIэхэм ащызэрихьэрэ псыхъом ымы­гъащтэхэу Шъхьэгуащэ зыкъырырагъэхьыхы. Мыщ фэдэу, кIымэфэ рафтингыр зыщыплъэ­гъун плъэкIыщтхэм Адыгеир ащыщ.

— Адыгеим ичIыопс кIымэфэ рафтингымкIэ зыфэдэ къэмы­хъугъэ нэшанэхэр иIэх. Ахэр: икъушъхьэхэм, ипсыхъохэм ягъэ­псыкI, чъыIэу щыIэр зы­фэ­дэр. Непэ мыщ фэдэ зыгъэ­псэфыкIэ амалыр республикэм пытэу щызэтеуцуагъ, — тыщегъэгъуазэ АР-м рафтингымкIэ ыкIи слаломымкIэ и Федерацие ипащэу Петр Фе­шиным.

Ащ къызэрэхигъэщырэмкIэ, гъэмэфэ лъэхъаным фэдэу жъугъэу зекIохэм ар къыхахырэп — ехьыжьагъэу чъэрэ псы­хъо мылыдыкъым хэхьанэу изыхъухьэхэрэр анахь гушхохэр ары. Ахэм япчъагъэ мыбэми, мыщ фэдэ экстремальнэ зы-гъэ­псэфыкIэм хэщагъэхэр зэщынхэу игъо ифэхэрэп, зэхэ­шIакIэ­хэм алъыхъухэрэр зе­кIо­хэм мы­макIэу къахэкIы. Анахь гъэшIэгъоныр, инхэм ямыза-къоу, сабыйхэми щынэ амышIэу кIымэфэ рафтингыр зыфэдэр ауплъэкIу. Пстэури зэлъыты­гъэр псым игъэпсыкIэрэ цIыфыр зэрэфэхьазырымрэ. ХэушъхьафыкIыгъэу рафтингым зыфэзымыгъэсагъэхэр я 3-рэ категорием халъытэрэ псыхъо лъагъом тыратIупщыхьэх.

[caption id="attachment_143212" align="aligncenter" width="800"] П. Фешин[/caption]

— КIымэфэ рафтингым тыкъызэрэфэкIуагъэм цIыфхэр къы­кIэупчIэщтыгъэх. Зы лъэ­хъан горэм жъугъэу къытфытеохэу аублэгъагъ. А уахътэм ащ тыфытегъэпсыхьэгъагъэп, анахьэу зыщалъэщтхэмкIэ. Джы мы лъэныкъомкIэ Iофхэм язытет нахь псынкI, псыр зыпкъырымыхьэрэ хэушъхьафыкIыгъэ шъуашэхэр ащэх ыкIи тэгъэфедэх, — еIо Петр Фешиным.

Гъэмэфэ рафтингым фы­тегъэпсыхьэгъэ зэштэгъухэм ялъытыгъэмэ, кIымафэм зыща­лъэхэрэр сантиметрэ заулэкIэ нахь Iужъух ыкIи тIоу зэтелъых. Iалъэ­хэри, лъэкъопылъхьэхэри фабэх.

Пкъышъолыр мэуцIыны, ау ищыкIэгъэ фабэр къызэтырегъанэ. Арэущтэу зэтемыгъэпсыхьагъэхэу зекIохэр псым тырагъахьэхэрэп. Псым ичъыIагъэ градусипшI фэдиз мэхъу.

КIымафэм Шъхьэгуащэ зэрэмыкуум къыхэкIэу, мы лъэхъаным тегъэпсыхьэгъэ рафтингыр псы лъхъэнчэ лъагъоу алъытэ. Пстэуми зэлъа­шIэрэ гранит къушъхьэ тIуакIэр къуашъохэм якъехыпI. ЧIыопс саугъэтым иIахь километри 5 фэдизыр гъогууанэм къызэлъеу­быты. ЗэхашIэу ащ щыбгъотыхэрэм адакIоу, псыхъо дэчъыпIэм икIымэфэ теплъэ зэбгъэлъэгъун амал огъоты. Осылъэ хъугъэ нэпкъ щтыгъэу, мыл закIэхэм ямышIыкIэ дунаир псыхъом къырашIэкIы, тхыпхъэ дахэхэр чъыIэм атырешIыхьэх.

Шъхьэгуащэ игъэпсыкIэ рафтингым тегъэпсыхьэгъэ дэдэу алъытэ. Апэрэ категорием къыщегъэжьагъэу я 6-м нэсэу пэрыохъухэр къыхагъэщых. Зэнэкъо­къухэр щызэхэпщэщтхэмэ, ар шэпхъэшIу. Ащ ишIуагъэкIэ илъэс пчъа­гъэ хъугъэу рафтингымкIэ Урысые мэхьанэ зиIэ Iоф­тхьабзэу «Интеррали — Шъхьэгуащ» зы­­фиIорэр республикэм щырекIокIы.

ЗекIоным изы лъэныкъоу рафтингым илъэс 20 фэдизкIэ узэкIэIэбэжьмэ рес­публикэм зыщиушъомбгъоу ыублагъ. Ащ ишIуагъэ­кIэ тишъолъыр ичIыопс идэхагъэ зекIохэм къызфызэIуахы.

КIымэфэ раф­тингыр къыхэзыххэрэм осымрэ щтыр­гъукIымрэ ятхыпхъэ­хэр къызэшIэкIыгъэ псыхъомрэ нэпкъхэмрэ яхьалэмэтыгъэ къяжэ.

Анцокъо Ирин.