Мэфэпчъым фэгъэхьыгъэ зэхэфынхэр

2024-рэ илъэсым IофшIэгъу, мыIофшIэгъу (мэфэкI) мэфэ пчъагъэу хэтыр, сыхьат пчъагъэу Iоф зэрашIэщтыр мы мэфэпчъым икъоу къыщытыгъэх.

МыIофшIэгъу мэфэкI мафэхэр

Урысые Федерацием IофшIэнымкIэ и Кодекс ия 112-рэ статья, Адыгэ Республикэм и Законэу 1995-рэ илъэсым мэзаем и 14-м аштагъэу N 168-1-р зытетэу «МэфэкI, шIэжь мафэхэм яхьылIагъ» зыфиIорэм адиштэу мыIофшIэгъу мэфэкI мафэхэу Адыгэ Республикэм щалъытэх:

щылэ мазэм и 1-р, и 2-р, и 3-р, и 4-р, и 5-р, и 6-р, и 8-р – ИлъэсыкIэ зыгъэпсэфыгъохэр; щылэ мазэм и 7-р – Иисус Христос къызыхъугъэ Маф; мэзаем и 23-р – Хэгъэгум иухъумакIо и Маф; гъэтхапэм и 8-р – бзылъфыгъэхэм я Дунэе маф; мэлылъфэгъум и 10-р – дин мэфэкIэу Бирамыр; жъоныгъуакIэм и 1-р – Гъатхэмрэ IофшIэнымрэ ямэфэкI; жъоныгъуакIэм и 9-р – ТекIоныгъэм и Маф; жъоныгъуакIэм и 14-р – зидунай зыхъожьыгъэхэр агу къызыщагъэкIыжьырэ маф; мэкъуогъум и 12-р – Урысыем и Маф; мэкъуогъум и 16-р – дин мэфэкIэу Къурмэныр; чъэпыогъум и 5-р – Адыгэ Республикэр зызэхащэгъэ Маф; шэкIогъум и 4-р – лъэпкъхэм языкIыныгъэ и Маф.

Адыгэ Республикэм и Законэу 1995-рэ илъэсым мэзаем и 14-м аштагъэу N 168-1-р зытетэу «МэфэкI, шIэжь мафэхэм яхьылIагъ» зыфиIорэм, Адыгэ Респуб­ликэм и ЛIышъхьэ 2023-рэ илъэсым чъэпыогъум и 9-м ышIыгъэ Указэу N 133-р зытетэу «2024-рэ илъэ­сым дин мэфэкIхэр зыхагъэунэфыкIыщт мафэхэр гъэнэфэгъэнхэм, зыгъэпсэфыгъо мафэхэр нэмыкI мафэхэм зэрахьыхэрэм яхьылIагъ» зыфиIорэм адиштэу дин мэфэкIхэр зыхагъэунэфыкIыщт мафэхэр агъэнэфагъэх: Бирамыр – мэлылъфэгъум и 10-р; зидунай зыхъожьыгъэхэр агу къызыщагъэкIыжьырэ мафэр (Радоницэр) – жъоныгъуакIэм и 14-р; Къурмэныр – мэкъуогъум и 16-р.

Зыгъэпсэфыгъо мафэхэр зэрэзэблахъухэрэр

Урысые Федерацием IофшIэнымкIэ и Кодекс диштэу зыгъэпсэфыгъо мафэмрэ мыIофшIэгъу мэфэкI мафэмрэ зызэтефэхэкIэ, зыгъэпсэфыгъо мафэр мэфэкIым къы­кIэлъыкIорэ мафэм ахьы. Щылэ мазэм имыIофшIэгъу мэфэкI мафэхэм атефэрэ зыгъэпсэфыгъо мафэхэм ар афэгъэхьыгъэп. Урысые Федерацием IофшIэнымкIэ и Кодекс ия 112-рэ статья ия 2-рэ Iахь зэрэщыгъэ­нэфагъэмкIэ, Урысые Федерацием и Правительствэ фитыныгъэ иI щылэ мазэм имыIофшIэгъу мэфэкI мафэхэм атефэрэ зыгъэпсэфыгъо мафэхэм ащыщэу тIур мэфэпчъым инэмыкI мафэхэм ыхьынхэу.

Урысые Федерацием IофшIэнымкIэ и Кодекс ия 112-рэ статья ия 5-рэ Iахь, Урысые Федерацием и Правительствэ 2023-рэ илъэсым шышъхьэIум и 10-м ышIыгъэ унашъоу N 1314-р зытетэу «2024-рэ илъэсым изыгъэпсэфыгъо мафэхэр нэмыкI мафэхэм зэрахьыхэрэм яхьылIагъ» зыфиIорэм зэращыгъэнэфэгъэ шIыкIэм диштэу, зыгъэпсэфыгъо ыкIи мыIофшIэгъу мэфэкI мафэхэу мэфэкIхэм атефэхэрэр нахь шIуагъэ къытэу IофышIэхэм къызыфагъэфедэнхэм тегъэпсыхьагъэу зыгъэпсэфыгъо мафэхэр нэмыкI мафэхэм ахьыгъэх: щылэ мазэм и 6-р (шэмбэтыр) жъоныгъуакIэм и 10-м (бэрэскэшхом) ахьыгъ; щылэ мазэм и 7-р (тхьаумафэр) тыгъэгъазэм и 31-м (гъубджым) ахьыгъ; мэлылъфэгъум и 27-р (шэмбэтыр) мэлылъфэгъум и 29-м (блыпэм) ахьыгъ; шэкIогъум и 2-р (шэмбэтыр) мэлылъфэгъум и 30-м (гъубджым) ахьыгъ; тыгъэгъазэм и 28-р (шэмбэтыр) тыгъэгъазэм и 30-м (блыпэм) ахьыгъ.

Адыгэ Республикэм и ЛIышъхьэ 2023-рэ илъэсым чъэпыогъум и 9-м ышIыгъэ Указэу N133-р зытетэу «Дин мэфэкIхэр зыхагъэунэфыкIыщт мафэхэр зэрагъэнафэхэрэм, 2024-рэ илъэсым изыгъэпсэфыгъо мафэ зэрэзэблахъурэм яхьылIагъ» зыфиIорэм диштэу жъоныгъуакIэм и 18-м (шэмбэтым) ычIыпIэкIэ жъоныгъуакIэм и 13-м (блыпэм) загъэпсэфыщт. ЖъоныгъуакIэм и 18-м зы сыхьаткIэ нахьыжьэу IофшIэныр аухыщт.

Мэкъуогъум и 16-р (мыIофшIэгъу мэфэкI мафэр) зыгъэпсэфыгъо мафэм зэрэтефэрэм епхыгъэу зыгъэ­псэфыгъор мэкъуогъум и 17-м (блыпэм) ахьы; чъэпыогъум и 5-м (мыIофшIэгъу мэфэкI мафэм) тефэрэ зыгъэпсэфыгъо мафэр мэфэкI зыгъэпсэфыгъо мафэм къыкIэлъыкIорэм ахьы – чъэпыогъум и 5-м (шэмбэтым) ычIыпIэкIэ чъэпыогъум и 7-м (блыпэм) загъэпсэфыщт. IофшIэгъу, зыгъэпсэфыгъо ыкIи мыIофшIэгъу мафэу мазэ пэпчъ хэтыр

2024-рэ илъэсым изыгъэпсэфыгъо мафэхэм ащыщ­хэр зэрэзэблахъущтхэр, республикэ мыIофшIэгъу мэфэкI мафэхэр къыдэплъытэхэмэ, IофшIэгъу, зыгъэ­псэфыгъо ыкIи мыIофшIэгъу мэфэкI мэфэ пчъагъэу мазэ пэпчъ хэтыр мыщ фэдиз:

1) щылэ мазэм IофшIэгъу мэфэ 17, зыгъэпсэфыгъо мэфи 6, мыIофшIэгъу мэфэкI мэфи 8; 2) мэзаем IофшIэгъу мэфэ 20, зыгъэпсэфыгъо мэфи 8, зы мыIофшIэгъу мэфэкI маф; 3) гъэтхапэм IофшIэгъу мэфэ 20, зыгъэпсэфыгъо мэфи 10, зы мыIофшIэгъу мэфэкI маф; 4) мэлылъфэгъум IофшIэгъу мэфэ 20, зыгъэпсэфыгъо мэфи 9, зы мыIофшIэгъу мэфэкI маф; 5) жъоныгъуакIэм IофшIэгъу мэфэ 19, зыгъэпсэфыгъо мэфи 9, IофшIэгъу мэфэкI мэфи 3; 6) мэкъуогъум IофшIэгъу мэфэ 18, зыгъэпсэфыгъо мэфи 10, мыIофшIэгъу мэфэкI мэфи 2; 7) бэдзэогъум IофшIэгъу мэфэ 23-рэ, зыгъэпсэфыгъо мэфи 8; 8) шышъхьэIум IофшIэгъу мэфэ 22-рэ, зыгъэпсэфыгъо мэфи 9; 9) Iоныгъом IофшIэгъу мэфэ 21-рэ, зыгъэпсэфыгъо мэфи 9; 10) чъэпыогъум IофшIэгъу мэфэ 22-рэ, зыгъэпсэфыгъо мэфи 8, зы мыIофшIэгъу мэфэкI маф; 11) шэкIогъум IофшIэгъу мэфэ 21-рэ, зыгъэпсэфыгъо мэфи 8, зы мыIофшIэгъу мэфэкI маф; 12) тыгъэгъазэм IофшIэгъу мэфэ 21-рэ, зыгъэпсэфыгъо мэфи 10.

IофшIэгъу уахътэмкIэ шапхъэхэр

Урысые Федерацием IофшIэнымкIэ и Кодекс ия 91-рэ статья, мазэкIэ, кварталкIэ, илъэсныкъокIэ зэтеутыгъэу IофшIэгъу уахътэр къызэрэрадзэрэ ШIыкIэу Урысые Федерацием псауныгъэм икъэухъумэнкIэ ыкIи социальнэ хэхъоныгъэмкIэ и Министерствэ 2009-рэ илъэсым шышъхьэIум и 13-м ышIыгъэ унашъоу N 588-р зытетымкIэ аухэсыгъэм (ыужыкIэ ШIыкIэр тIозэ дгъэкIощт) адиштэу IофшIэгъу уахътэр къырадзэ.

Зигугъу къэтшIыгъэ ШIыкIэм, IофшIэгъу мэфи 5, зыгъэпсэфыгъо мэфи 2 (шэмбэтымрэ тхьаумафэмрэ) къызыхэфэрэ графикым адиштэу IофшIэгъу мафэр зыфэдизыр къалъытэ:

тхьамафэм сыхьат 40 Iоф зышIэхэрэмкIэ ар зэрэ­хъурэр сыхьати 8; тхьамафэм сыхьат 36-рэ Iоф зышIэхэрэмкIэ ар зэрэхъурэр сыхьати 7,2-рэ; тхьамафэм сыхьат 24-рэ Iоф зышIэхэрэмкIэ ар зэрэхъурэр сыхьати 4,8-рэ.

IофшIэгъу мафэу е сменэу мыIофшIэгъу мэфэкI мафэм ыпэрэ мафэм тефэрэр зы сыхьаткIэ агъэкIэкIы (Урысые Федерацием IофшIэнымкIэ и Кодекс ия 95-рэ статья иа 1-рэ Iахь). ШIыкIэм иа 1-рэ пункт зэрэщыгъэнэфагъэмкIэ, Урысые Федерацием и Правительствэ иунашъо тетэу зыгъэпсэфыгъо мафэр Iоф­шIэгъу мафэм захьыкIэ, а мафэм (зыгъэпсэфыгъоу щытыгъэм) сыхьат пчъагъэу Iоф зэрашIэн фэягъэмрэ гъэпсэфыгъор зыдахьыжьыгъэ мафэм Iоф зэрашIэн фаемрэ зэфэдизынхэ фае. ГущыIэм пае, мэфэкI Iоф­шIэгъу мафэхэм апэкIэ къикIырэ мэфи 8 2024-рэ илъэсым къыхэфэ: мэзаем и 22-р, гъэтхапэм и 7-р, мэлылъфэгъум и 9-р, жъоныгъуакIэм и 8-р, жъоныгъуакIэм и 18-р, мэкъуогъум и 11-р, чъэпыогъум и 4-р, шэкIогъум и 2-р. IофшIэгъу, мэфэкI мафэхэм азыфагу зыгъэпсэфыгъо мафэ къызыдафэкIэ, IофшIэгъу мафэр агъэкIэкIырэп, зы сыхьаткIэ нахьыжьэу IофшIэныр аухырэп.

IофшIэгъу мэфи 5, зыгъэпсэфыгъо мэфи 2-рэ зыхэхьэрэ IофшIэгъу тхьамафэр тштэмэ, сыхьат пчъа­гъэу IофышIэхэр зэрэлэжьэщтхэр:

щылэ мазэм:

тхьамафэм сыхьат 40 Iоф зышIэхэрэр сыхьати 136-рэ; тхьамафэм сыхьат 36-рэ Iоф зышIэхэрэр сыхьати 122,4-рэ; тхьамафэм сыхьат 24-рэ Iоф зышIэхэрэр сыхьат 81,6-рэ;

мэлылъфэгъум:

тхьамафэм сыхьат 40 Iоф зышIэхэрэр сыхьати 159-рэ; тхьамафэм сыхьат 36-рэ Iоф зышIэхэрэр сыхьати 143-рэ; тхьамафэм сыхьат 24-рэ Iоф зышIэхэрэр сыхьат 95-рэ;

жъоныгъуакIэм:

тхьамафэм сыхьат 40 Iоф зышIэхэрэр сыхьати 150-рэ; тхьамафэм сыхьат 36-рэ Iоф зышIэхэрэр сыхьати 134,8-рэ; тхьамафэм сыхьат 24-рэ Iоф зышIэхэрэр сыхьат 89,2-рэ;

мэкъуогъум:

тхьамафэм сыхьат 40 Iоф зышIэхэрэр сыхьати 143-рэ; тхьамафэм сыхьат 36-рэ Iоф зышIэхэрэр сыхьати 128,6-рэ; тхьамафэм сыхьат 24-рэ Iоф зышIэхэрэр сыхьат 85,4-рэ;

чъэпыогъум: тхьамафэм сыхьат 40 Iоф зышIэхэрэр сыхьати 175-рэ; тхьамафэм сыхьат 36-рэ Iоф зышIэхэрэр сыхьати 157,4-рэ; тхьамафэм сыхьат 24-рэ Iоф зышIэхэрэр сыхьати 104,6-рэ.

2024-рэ илъэсым IофшIэгъу мэфэ 244-рэ, зыгъэпсэфыгъо, мэфэкI мэфи 122-рэ къыхэфэх, мэфи 8 Iоф­шIэныр зы сыхьаткIэ нахьыжьэу аухыщт.

Тхьамафэм сыхьат 40 Iоф зышIэхэрэмкIэ 2024-рэ илъэсым IофшIэгъу уахътэр зэрэхъурэр сыхьат 1944-рэ;

сыхьат 36-рэ Iоф зышIэхэрэмкIэ IофшIэгъу уахътэр зэрэхъурэр сыхьат 1748,8-рэ;

сыхьат 24-рэ Iоф зышIэхэрэмкIэ IофшIэгъу уахътэр зэрэхъурэр сыхьат 1163,2-рэ.

Отпуск мэфэ пчъагъэр къызэралъытэрэр

Урысые Федерацием IофшIэнымкIэ и Кодекс ия 120-рэ статья диштэу IофышIэхэм яотпуск шъхьаIэу ыкIи тедзэу ахъщэ къазыфыратыхэрэр календарь мафэхэмкIэ къалъытэх. МыIофшIэгъу мэфэкI мафэхэр отпускым икалендарь мафэхэм ахалъытэхэрэп. ГущыIэм пае, 2024-рэ илъэсым отпускым икалендарь мафэхэм ахалъытэхэрэп щылэ мазэм и 1-м къыщегъэжьагъэу и 8-м нэс, мэлылъфэгъум и 10-р, жъоныгъуакIэм и 1-р, и 9-р, и 14-р, мэкъуогъум и 12-р, и 16-р, чъэпыогъум и 5-р. Зыгъэпсэфыгъо мафэхэу щылэ мазэм и 13-р, и 14-р, и 20-р, и 21-р, и 27-р, и 28-р, мэлылъфэгъум и 6-р, и 7-р, и 13-р, и 14-р, и 20-р, и 21-р, и 28-р, и 29-р, и 30-р, жъоныгъуакIэм и 4-р, и 5-р, и 10-р, и 11-р, и 12-р, и 13-р, и 19-р, и 25-р, и 26-р, мэкъуогъум и 1-р, и 2-р, и 8-р, и 9-р, и 15-р, и 17-р, и 22-р, и 23-р, и 29-р, и 30-р, чъэпыогъум и 6-р, и 7-р, и 12-р, и 13-р, и 19-р, и 20-р, и 26-р, и 27-р ахэм ахалъытэх.