2023-рэ илъэсым ибжыхьэ дзэ дэщыгъо ыкIэм фэкIуагъ. Пшъэрылъэу къафагъэуцугъэр зэрагъэцэкIагъэм, джащ фэдэу Къыблэ дзэ шъолъырым иIэпэчIэгъэнэ шхончэо часть зэзэгъыныгъэ шIыкIэм тетэу дзэ къулыкъур щызыхьыщтхэм яугъоин зэрэлъагъэкIуатэрэм афэгъэхьыгъэ пэшIорыгъэшъ зэфэхьысыжьхэр къышIыгъэх къалэу Мыекъуапэ идзэ комиссарэу А. Санташовым. Бжыхьэ дзэ дэщыгъор шапхъэхэм адиштэу зэрэрекIокIыгъэр, пшъэры­лъэу къафагъэуцугъэр шIокI имыIэу зэрагъэ­цэкIагъэр дзэ комиссарым пэублэм къыIуагъ.

— ТикIалэхэм янахьыбэм Къыблэ дзэ шъолъырым ичастьхэм, Мыекъопэ дзэ гарнизоным къулыкъур аща­хьы. Къыблэ дзэ шъолъырым и Командующэ иунашъокIэ УФ-м идзэ къулыкъу хахьэхэрэ лъэсыдзэхэм, ошъогу десантыдзэхэм, стратегическэ мэхьанэ зиIэ ракетэ дзэхэм тэгъакIох. Урысыем икъалэхэм къулыкъур ащахьынэу фаеу бэмэ зыкъытфагъэзагъ ыкIи шъхьадж ишIоигъоныгъэ къыдэтлъы­тагъ, — еIо А. Санташовым. — Бжыхьэ дзэ дэщыгъор зэрифэшъуашэу редгъэ­кIокIыгъ. Ащ фэгъэзэгъэ къулыкъухэм зэкIэми яIо зэхэлъэу Iоф зэдашIагъ, шIуагъэ къэзытыщт къэгъэлъэгъонхэм такъыфэкIуагъ. Тикъэралыгъо ищынэ­гъон­чъагъэ гъэпытэгъэнымкIэ ащ мэхьанэшхо иI, — къыIуагъ А. Санташовым.

Бжыхьэ дзэ дэщыгъом къыхиубытэу нэбгыри 100 фэдиз Мыекъуапэ икIхи къулыкъум кIуагъэх. Ахэм ащыщ зы кIалэ къалэу Санкт-Петербург инаучнэ ротэ хэфагъ. Къулыкъур пIэлъэ гъэнэфагъэкIэ зыфызэкIахьагъэхэм япчъагъэ мы илъэсым хэпшIыкIэу хэхъуагъ. Мые­къуапэкIэ мыгъэ а пчъагъэр 85-рэ фэдиз, блэкIыгъэ илъэсхэм нэбгырэ 35 — 40-рэ хъущтыгъ. Ащ лъапсэ фэхъугъэр аныбжькIэ къулыкъур зыхьынэу къызтефэхэрэм апшъэрэ гъэсэныгъэ зызэрагъэгъотырэ нэуж магистратурэм, аспирантурэм зэрачIэхьажьыгъэхэр ары.

— Административнэ хэбзэукъоны­гъэхэмкIэ Кодексым зэхъокIыныгъэхэр зыфашIыгъэхэм къыщыублагъэу къулыкъум зыщызыдзыехэрэм япчъагъэ хэпшIыкIэу нахь макIэ хъугъэ, — къе­Iуатэ А. Санташовым. — Ащ лъапсэ имыIэу щытэп. Джы зэхъокIыныгъэм къызэригъэнафэрэмкIэ, повесткэ зэратыгъэу военкоматым къемыкIуалIэхэрэм ыкIи къулыкъум зыщызыдзыехэрэм тазырэу сомэ мин 30 арагъэты, ащ нэмыкIэу медицинэ комиссиер зымыкIугъэхэм сомэ мин 25-рэ атыралъхьэ. Ащ нэмыкIэу къулыкъум зыщызыдзыехэу военкоматым къемыкIолIагъэхэм нахь пхъашэу алъыхъунхэм фэшI Мые­къопэ къэлэ администрациер, Урысыем хэ­гъэгу кIоцI IофхэмкIэ и Министерствэ иотделэу Мыекъуапэ щыIэр къыхэдгъэ­лажьэхэзэ лъыхъун Iофтхьабзэхэр ретэгъэкIокIых. Дзэ комиссариатым къемыкIуа­лIэхэу зызыгъэбылъыщтыгъэ нэбгыри 110-м ехъумэ ащыщэу 70-р къетщэлIагъ.

Джащ фэдэу А. Санташовым къызэриIуагъэмкIэ, зэзэгъыныгъэ шIыкIэм тетэу хэушъхьафыкIыгъэ дзэ операцием къулыкъур щызыхьыщтхэм якъы­хэхын лъагъэкIуатэ. Мыхэм ахъщэ тынэу аратырэм зэхъокIыныгъэ фэ­хъугъэп. УФ-м зыкъэухъумэжьынымкIэ и Министерствэ сомэ мини 195-рэ, шъолъырымкIэ — сомэ мин 200, муниципальнэ тыныр — сомэ мини 105-рэ. ЗэкIэмкIи зэхэтэу зэтыгъо ахъщэр сомэ мин 500 мэхъу. Ащ нэмыкIэу ахэм фэгъэкIотэныгъэхэр яIэх. Зэо зэпэуцужьхэм ахэлэжьагъэхэу удостоверение зиIэхэм, къэралыгъо тын лъапIэхэр къызэратыгъэхэм чIыгу Iахь къаIахынымкIэ фитыныгъэ яI. Хэу­шъхьафыкIыгъэ дзэ операцием хэлажьэхэрэм якIалэхэр гурыт ыкIи апшъэрэ гъэсэныгъэ зэрагъэгъотынхэмкIэ зэнэкъо­къум хэмыла­жьэхэу еджапIэхэм ачIэхьанхэ алъэ­кIыщт.

АныбжькIэ къулыкъур зыхьынэу къызтефэхэрэм мымакIэу къахэкIых зэзэгъыныгъэ шIыкIэм тетэу дзэм кIохэрэр. Ащ нэмыкIэу бзэджэшIэгъэ мыин зезыхьагъэу хьапс зытелъыгъэ­хэми зэзэгъыныгъэ шIыкIэм диштэу къулыкъур ахьын алъэкIыщт.

КIАРЭ Фатим.