Къэгъэлъэгъон-форумэу «Урысыер» зыфиIоу Москва щызэIухыгъэм непэ Адыгеим и Мафэ щыкIуагъ.

АР-м и ЛIышъхьэу КъумпIыл Мурат, республикэм ихэбзэгъэуцу ыкIи игъэцэкIэкIо хабзэ якъулыкъушIэхэр, тиIэпэIасэхэр, титворческэ куп анахь дэгъухэр, пщэрыхьакIохэр, общественнэ организациехэм ялIыкIохэр ащ хэлэжьагъэх, къэгъэлъэгъоным фыхэхыгъэ павильон зэфэшъхьафхэм лъэныкъо зэмлIэужыгъохэмкIэ Адыгеир къащыгъэлъэгъогъагъ, цIыфэу ахэм къякIолIагъэхэр алъэгъугъэм ыумэхъыщтыгъэх. Пчэдыжьым сыхьатыр 10-м къыщыублагъэу пчыхьэм 10-м нэс Iофтхьабзэхэр зэпымыоу республикэм икIыгъэхэм рагъэкIокIыгъэх. Ахэр зыфэдагъэхэр къэттыжьыным пае «Адыгэ макъэм» иIофышIэхэмкIэ Москва тыкIуагъ. Джы пстэури нахь игъэкIотыгъэу.

ГъэлъэгъопIэ шъхьаIэр

АР-м и ЛIышъхьэу КъумпIыл Мурат Адыгеим икъэгъэлъэгъон шъхьаIэ пчэдыжьым къекIолIагъ. Тишъолъыр ихьэкIэ лъапIэу хъугъэх УФ-м и Прави­тельствэ и Тхьаматэ игуадзэу Дмитрий Чернышенкэр, УФ-м и Федеральнэ ЗэIукIэ ФедерациемкIэ и Совет и Тхьаматэ игуадзэу Андрей Яцкиныр, УФ-м ФедерациемкIэ и Совет исенатор­хэу Хъопсэрыкъо Мурат, Александр Наролиныр,

Къанэкъо Арсен, УФ-м и Къэралыгъо Думэ Адыгэ Республикэм ыцIэкIэ идепутатхэу Вла­дис­лав Резник, Хьасанэкъо Мурат, Пэнэшъу Къэплъан.

Тишъолъыр илIыкIохэм ахэтыгъэх АР-м и Парламент и Тхьаматэу Влади­мир Нарожнэр, министрэхэм я Кабинет ипащэу КIэрэщэ Анзаур, Адыгеим, КъБР-м, КъЩР-м янароднэ тхакIоу, Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу МэщбэшIэ Исхьакъ, муниципальнэ псэупIэхэм япащэхэр, общественнэ IофышIэхэр.

Тиреспубликэ игъэлъэгъуапIэ къыщыдэ­лъытэ­гъэ Iэмэ-псымэхэм ямэхьанэ къызэIуахызэ ахэм афэгъэхьыгъэу ыкIи хэхъоныгъэу тиIэхэр къыIотагъэх АР-м экономикэ хэхъоныгъэмкIэ иминистрэу Шэуджэн Заур.

Адыгеим лъэныкъо зэфэшъхьафхэмкIэ ихэхъоныгъэхэр тигъэлъэгъуапIэ къыщы­тыгъэх, республикэм ичIыопс инэпэеплъ техыгъэхэр, ихахъохэр къизыIотыкIырэр къагъэлъэгъуагъэх. Адыгеим и Мафэ икъызэIухын хэла­жьэзэ Дмитрий Чернышенкэм къыхигъэ­щыгъ мы Iофтхьабзэр ямышIыкIэу зэрэгъэпсыгъэр.

— Урысыем и Президентэу Владимир Путиным игукъэкIкIэ зэхащэгъэ къэгъэ­лъэ­гъонэу «Урысыер» зыфиIорэм Ады­геим и Мафэ къыдыхэлъытагъэу шъо­лъырым ихахъохэр къегъэлъагъох. Сисабыигъо Адыгеим щыкIуагъ, гукъэ­кIыжь фабэхэр ащ епхыгъэх. БэмышIэу ащ сыщыIагъ – шъолъырым псынкIэу хахъохэр ешIых, цIыфхэм ящыIакIэ зыкъеIэты. Федеральнэ правительствэм иIэпыIэгъу шIуагъэ къытэу мыщ зэрэщагъэфедэрэр нафэ, — къыIуагъ УФ-м и Правительствэ ипащэ игуадзэ.

УФ-м и Федеральнэ ЗэIукIэ Федера­циемкIэ и Совет и Тхьаматэу Валентина Матвиенкэм ыцIэкIэ къызэрэугъоигъэхэм шIуфэс къарихыгъ ащ игуадзэу Андрей Яцкиным.

Республикэм хэхъоныгъэу ышIыгъэхэм игъэкIотыгъэу къатегущыIагъ КъумпIыл Мурат, пшъэрылъэу щытхэми ягугъу къышIыгъ. Урысыем ипащэ ыгъэнэфэгъэ лъэпкъ проектхэм, къэралыгъо програм­мэхэм яшIуагъэкIэ тишъолъыр ыпэкIэ лъыкIотагъ. Республикэм федэу мы илъэсым къыщахьыжьыгъэр проценти 108-рэ хъугъэ. Адыгеим ахъщэу къэра­лыгъом къыритыщтыгъэм 2017-рэ илъэсым къыщыублагъэу процент 20-м къыщыкIырагъэчи, процент 13-м щынагъэсыгъ, инвестициехэр сомэ миллиард 200-м кIагъэхьагъэх.

— Мы пчъагъэхэр зишIуагъэр респуб­ликэм илъэныкъо анахь шъхьаIэхэмкIэ IофшIэныр зэрэдгъэлъэшыгъэр, инвес­тиционнэ ыкIи инфраструктурнэ проект пшIы пчъагъэ зэрэдгъэцэкIагъэр, псэупIэ­хэм, гъогухэм яшIын пIалъэм ыпэ итэу зэрэзэшIотхыгъэр, къэралыгъо IэпыIэгъу предпринимательхэм зэряттыгъэр, цIыфыбэ сатыум, анахьэу мэкъу-мэщым тегъэпсыхьагъэм зэрэхэтщагъэр ары, — къыIуагъ КъумпIыл Мурат.

Гъэсэныгъэм, спортым, культурэм алъэ­­ныкъокIэ хахъоу тиIэхэми ЛIышъхьэр къащыуцугъ, ахэм афыхэхыгъэ чIыпIэхэм якIолIэнхэшъ, а пстэури цIыфхэм зэра­гъэлъэгъун амал яIагъ. Джащ фэдэу КъумпIыл Мурат къыщыу­цугъ зекIоным ылъэныкъокIэ шIагъэу щыIэм, джыри шъолъырым къыпыщылъым. ЗыгъэпсэфыпIэу «Лэгъонакъэрэ» Джэго­кIо гъэхъунэмрэ анахь инхэу ашIыщтхэр ары.

— Республикэм илъэсыбэм хэхъоны­гъэхэр ышIынхэмкIэ шъхьаIэу тлъытэрэр зекIоныр ары. Аужырэ илъэсхэм мы лъэныкъом мылъку шIукIае хэтэлъхьэ, республикэм зэтегъэуцожьын амалэу иIэм ащ хегъахъо. Экологие, хъугъэ-шIэ­гъэ, шхыныгъо, чIыгулэжьын ыкIи къоджэ зекIонхэр – непэ цIыфыбэ къызкIэупчIэрэ лъэныкъох ыкIи ахэр республикэм чанэу хахъо щызышIырэх, — къыкIигъэтхъыгъ КъумпIыл Мурат.

Мы зэпстэуми къэгъэлъэгъонэу «Уры­сы­ер» афэIорышIэ.

КъекIолIагъэр чIэкIыжьышъугъэп

Адыгеим и Мафэ ВДНХ-м икъэгъэлъэ­гъопIэ шъхьаIэ зэрэщыкIорэр дэхьапIэм къыщегъэжьагъэу къэошIэ. Лъэныкъо пстэуми Iоф ащызышIэрэ мэкъэгъэIухэм къаIопщы. Адыгеим игъэлъэгъуапIэу я 75-м щы­гъэпсыгъэм мы мафэм, адырэмэ афэ­мыдэу, щыжъотыгъ. Ащ икIэщакIохэм пшъэрылъ шъхьаIэу ащкIэ зыфагъэу­цужьыгъэр къадэхъугъ: къекIуалIэрэм зэкIэми лъэшэу ашIогъэшIэгъоныгъ. А зы уахътэм дышъэидэр зыфэдэр ыкIи ишIыкIэ зэрагъэлъэгъун алъэкIыгъ, пIуаблэм ишIын хэлэжьагъэх, пхъэкIычэ теуакIэ зэрагъэшIагъ, АР-м гъэсэ­ныгъэмрэ шIэныгъэмрэкIэ и Министерствэ зэхищэгъэ джэгукIэ зэфэшъхьафхэм ахэлэжьагъэх, лъэпкъ мэкъэмэ Iэмэ-псымэхэмкIэ творческэ купхэм къырагъаIорэм ыумэхъыгъэхэу едэIугъэх. Адыгеим ичIыопс идэхагъэ фильмхэмкIэ зылъэгъугъэхэу ежь ышъхьэкIэ зыуплъэкIужьы зышIоигъохэм апае джащ фэдэу зэнэкъокъу гъэшIэгъон рекIокIыгъ. ЗекIоным ылъэныкъокIэ Iоф зышIэхэу, республикэм къихьэрэ хьакIэхэм зекIонымкIэ фэIо-фашIэхэр языгъэ­гъотыхэрэм Адыгеим ичIыопс фэгъэ­хьыгъэ упчIипшI агъэхьазырыгъ. Ахэм джэуап тэрэзхэр къязытыгъэ нэбгырищмэ Адыгеим иегъэблэгъэ тхылъхэр аратыгъэх.

«Лъэшэу сигуап фэдэ шIухьафтын къэсхьын зэрэслъэкIыгъэр. Шъыпкъэр пIощтмэ, къэгъэлъэгъоным сыкъакIо зэхъум ащ фэдэм сыщыгугъыгъэп. Адыгеим бэшIагъэу сыкъэкIонэу сыфай, ау сыщыIэнэу хъугъэп. Джы мы егъэблэгъэ тхылъым ихьатыркIэ гъэтхапэм блэзгъэкIыщтэп. УпчIипшIыри тэрэзынэу сыгугъагъэп, ау тезгъэфагъ»,— къыддэгощагъ егъэблэгъэ тхылъ зыхьы­гъэу, Москва щыщэу Александра Коло­меец.

Адыгэ Республикэм и Мафэ къы­дыхэлъытагъэу лъэпкъ шхыныгъохэм якъэгъэлъэгъон джащ фэдэу ВДНХ-м щыкIуагъ. «Урысыем ишхыныгъохэр» зыфиIорэ Унэм Адыгеим икIыгъэ пщэры­хьакIохэм Iофтхьэбзэ иныр щырагъэ­кIокIыгъ. Владимир Титовым мэл блэ­бгъур тхъужъожьыгъэм щигъэжъагъ, щыпс-пIастэр ышIыгъ. ЯтIонэрэ пщэрыхьа­кIоу Нурлан Дельгош бжьыныфщыгъукIэ ущыугъэ былымылым къэб щытIагъэр голъэу ыупщэрыхьыгъ. ЗэлъашIэрэ адыгэ къоешIэу Цышэ Казбек ахэм акIыгъоу къоеихыкIэр хьакIэхэм къаригъэлъэгъугъ ыкIи а чIыпIэм рахыгъэ щэхэкI хьалым хьалыжъор хашIыкIыгъ. ЫпкIэ хэмылъэу зэкIэ шхыныгъохэр хьакIэхэм апагъо­хыгъэх, адыгэ лъэпкъ пщэрыхьапIэм къикIырэ гъомылэхэм яIэшIугъэ ара­гъэуплъэкIугъ. Iофтхьабзэм къекIолIа­гъэхэр ащ фэдэ шIухьафтыным ежагъэхэп, ягуапэ зэрэхъугъэр къахэщэу язэхашIэ­хэмкIэ къыддэгощагъэх.

«Былымылрэ къэб щытIагъэрэ зэкIы­гъу­хэу зэрэсшхырэр апэрэ. Шъыпкъэр пIощтмэ, ахэр зэкIухэми сшIагъэп, ау IэшIу дэдэу къычIэкIыгъ. Лыр шъэбэ дэдэу жъагъэ, «жэм дэткIухьэ» зыфаIорэм фэд. Тигуапэ Москва шъукъызэреб­лэгъагъэр. Тхьэм шъуегъэпсэу мэфэкIэу тфызэхэшъущагъэм пае», — еIо Москва щыщ Александр Песковым.

Ащи изакъоп, шхыныгъохэм яфестиваль къеблэгъагъэхэм шIухьафтынхэр зыда­хьыжьыгъэх. Адыгэ къое пытэ гъозагъэр зэгозыкIыкIын зылъэкIыгъэ Галина Нико­лаевам мэтэ къое къэмланыр Москва хэкум зыдихьыжьыгъ.

«Адыгэ къуае зэрэщыIэр сэшIэ. Кавказым сыкъызыкIокIэ сшхэуи хъугъэ, ау непэрэ къое пытэм фэдэ зэрэс­лъэгъурэр апэрэ. СыкъызыхэкIым псын­кIэу зэгоскIыкIын сшIошIыгъ, ау сыхэу­къуагъ (мэщхы бзылъфыгъэр). Адыгэ къое шъыпкъэн фае», — еIо Галинэ.

Джащ фэдэу Москва хэкум икъалэу Королев къикIыгъэ Татьяна Саркисовам къыIуагъ:

«Сыдэу тхъагъуа Адыгеир! Сыдэуи хьалэла! Мыщ пчэдыжь сыкъызэ­рэчIэхьагъэу пчыхьэ кIахэ хъугъэу джы сычIэкIыжьыщт. Шъуишхыныгъохэри, шъуикъашъохэри, шъуицIыф гъэпсыкIи сыгу екIугъэхэу сыкIожьын фаеу мэхъу Iофтхьабзэр аухыгъэшъ».

Творческэ зэхэт купэу «Ошъадэм» мэфэ реным концерт мыщ къыщитыгъ, къекIолIэгъэ пстэури ащ нахь къызэкIи­гъэблагъ.

Унагъор. IофшIэныр. ГъэшIэ кIыхьэр

Мыщ фэдэ цIэ иIэу УФ-м IофшIэнымкIэ ыкIи социальнэ хэхъоныгъэмкIэ и Минис­терствэ Адыгеим мыщ фэдэ икъулыкъу иIофшIагъэхэр къыщагъэлъэгъуагъэх. Шхыныгъохэу адыгэ чIыгум щашIыхэрэр ыкIи пхъэшъхьэ-мышъхьэу къыщыкIыхэрэр ахэм язы Iахьыгъэх. ЗэкIэмэ анахь лъэшъэу къахэщыщтыгъэх шIуфаIохэр зытетхэгъэ тхьапэхэмкIэ гъэкIэрэкIэгъэ мыIэрысэхэр.

 ГъэлъэгъуапIэм пае хэушъхьафыкIыгъэу ашIыгъэ сурэт­техы­пIэу «Адыгеир шIу сэлъэгъу!» зытетхэ­гъагъэр мыщ щагъэпсыгъагъ. Федеральнэ министерствэм иволонтерхэр къетэкъо­кIыгъэхэу пчэдыжьым щыубла­гъэу щыжъотыгъ. Москва исоциальнэ къэлэ къулыкъу зынаIэ тет нэжъ-Iужъхэм ыкIи сэкъатныгъэ зиIэхэм ялIыкIо 30 къэгъэ­лъэгъоным къыщагъ. ЗэрэчъыIэм емы­лъытыгъэу (Москва ос хъотыр щызэрехьэ), курэжъыехэм арысхэри ахэм ахэтыгъэх.

АР-м IофшIэнымкIэ ыкIи социальнэ хэхъоныгъэмкIэ и Министерствэ икъэгъэ­лъэгъон къызэIузыхыгъэр ыкIи зезыща­гъэр АР-м изаслуженнэ журналистэу ТIэшъу Светлан. Республикэм хьакIэхэр нэIуасэ фишIыхэзэ ащ хигъэунэфыкIыгъ непэ Адыгеим цIыф лъэпкъ зэфэшъ­хьафхэм ащыщэу нэбгырэ мин 500 фэдиз зэрэщыпсэурэр. Зэкъошныгъэрэ зэгуры­Iоныгъэрэ азыфагу илъэу шъолъырым ис адыгэхэм, урысхэм, ермэлхэм, абхъазхэм, къэндзалхэм ыкIи нэмыкI лъэпкъыбэхэм ялIыкIохэм якультурэ, яшэн-хабзэхэр, яныдэлъфыбзэ къызэ­раухъумэрэр хьакIэхэм къафиIотагъ.

Нэужым IофшIэнымкIэ ыкIи социальнэ хэхъоныгъэмкIэ АР-м иминистрэу Мырзэ Джанбэч къэгущыIагъ: «Непэ къэралыгъом ипащэ пшъэрылъ гъэнэфагъэ къытфегъэуцу — лъэпкъ проектэу «Ныбжь зиIэхэр» зыфиIорэм тыдэлажьэ. Тинэжъ-Iужъхэр язакъоу къэнагъэхэу зэхамышIэным пае ищыкIэгъэ Iофыгъохэр зэшIотэхых. Къэралыгъо программэхэмкIэ IэпыIэгъу тафэхъу, шъолъырым щыIэкIэшIу щыряIэным тыдэлажьэ. Ащ лъэшэу тишъолъыр пащи ынаIэ тет. ЗекIоным, нэжъ-Iужъхэм ящыIакIэ нахь гъэшIэгъон къэзышIыщт лъэныкъохэм ахэр ахэщагъэ хъунхэм тыдэлажьэ. Пенсием зыныбжь нэсыгъэхэм ящыкIэгъэ фэIо-фашIэхэм язэшIохын къэзыгъэпсынкIэщт проект республикэм джащ фэдэу щагъэцакIэ, Адыгеим щыпсэурэ цIыфхэм социальнэ лъэныкъо зэфэшъхьафхэмкIэ IэпыIэгъу икъу агъотыным тишъыпкъэу тыдэлажьэ ыкIи тапэкIэ а лъэныкъор джыри на­хьышIу хъуным Iоф дэтшIэщт».

Министерствэм ныбжь зиIэу респуб­ликэм щыпсэухэрэм Iоф зэрадишIэрэ шIыкIэ-амалыкIэхэм къатегущыIагъ социальнэ фэIо-фашIэхэмкIэ къулыкъухэм адэлэжьэрэ отделым ипащэу ЦIыпIынэ Жанетэ:

«Урысыем инэмыкI шъолъырхэм афэдэу социальнэ программэ зэфэшъ­хьафхэм язэшIохын тиминистерствэ игъэкIотыгъэу дэлажьэ. Уахътэм диштэу шъолъырым фэхъурэ зэхъокIыныгъэхэр зэхашIэнхэм тынаIэ тет, министерствэм епхыгъэ къулыкъухэм муниципальнэ гъэIорышIапIэхэм ащызэхищэрэ Iоф­тхьэбзэ зэфэшъхьэфхэр къизыIотыкIырэ интерактивнэ платформэу УФ-м IофшIэ­нымкIэ ыкIи социальнэ хэхъоныгъэмкIэ и Министерствэ зэхи­гъэу­цуагъэм тыхэтэу непэ тикъэгъэлъэ­гъуапIэ ихьакIэхэр ащ щытэгъэгъуазэх».

Нэужым къэгъэлъэгъоным изещакIоу ТIэшъу Светланэ пчэгум къырагъэуцогъэ Iанэхэм акIэрытIысхьанхэу хьакIэхэм къяджагъ. ИлъэсыкIэм ипэгъокIэу пцIыикъ чъыгым пашIэрэ илъэсыкIэ джэгуалъэхэм яшIын ахэр хэлэжьэнхэу ригъэблэгъагъэх. ЦIыфхэм социальнэ фэIо-фашIэхэр ягъэгъотыгъэнымкIэ Красногвардейскэ районым и Гупчэ иIофышIэхэу Марина Котовар, Карина Разуваевар, Виктория Поповар хьакIэхэм IэпыIэгъу афэхъущтыгъэх. Джэгуалъэхэм яшIын пэлъыхэфэ адыгэхэр илъэсыкIэм зэрэпэгъокIыщтыгъэхэм тарихъэу пылъыр ТIэшъу Светланэ хьакIэхэм къафиIотагъ. А къэбарым едэIухэзэ хьакIэхэм ашIыщ­тыгъэ илъэсыкIэ джэгуалъэхэр ыкIэм нагъэсыгъэх. Адыгэ быракъым итеплъэ ахэм яIагъ. Джэгуалъэхэр аIыгъхэу Iофтхьабзэм хэлэжьагъэхэм сурэт зытырарагъэхыгъ.

Сэкъатныгъэ зиIэхэм яобществэу Моск­ва щызэхэщагъэм ипащэ игуадзэу Ольга Абуковар зэхахьэм хэлэжьагъ, ылъэгъурэр шIогъэшIэгъонэу ащ «Адыгэ макъэм» къыфиIотагъ: «ТшIагъэп Адыге­им фэдэ шъолъыр Урысыем итми. Роликэу къэжъугъэлъэгъуагъэмкIэ рес­пуб­ликэр зэрэдахэр, ичIыопс зэрэхьа­лэмэтыр, хэхъоныгъэхэр шъушIызэ ыпэкIэ шъузэрэлъыкIуатэрэр нэрылъэгъу тфэхъугъ. Адыгеим икъэгъэлъэгъон тыгу рихьыгъ, шъуадэжь тыкъэкIонэу итхъу­хьагъ. ШъуцIыф зэIухыгъ, шъуикультури баи. ЩыIэныгъэм ыкIуачIэ непэ мыщ щызэхэтшIагъ сIомэ сыхэукъонэп».

Курэжъыехэм зэрарысхэм пае къэмы­нэу адыгэ къашъор сэкъатныгъэ зиIэхэм къашIыгъ.

Наталья Пенкинар, Соня Вишневар Москва дэт кIэлэегъэджэ институтым щеджэх, Адыгеим икъэгъэлъэгъон къекIолIэгъэ ныбжьыкIэхэм ахэтыгъэх: «Елкэ чъыгым пае джэгуалъэм ишIынкIэ егъэджэнхэр зэрэхэтыщтыр зытэшIэм, Адыгеим икъэгъэлъэгъон тыкъекIолIагъ. Ар лъэшэу тшIогъэшIэгъон, Iэпэщысэхэм яшIын тыхэлажьэу къыхэкIыгъ, зытыу­шэтынэу тыфай. Дышъэ IуданэкIэ хэды­кIыгъэхэр зиIэ IэшIагъэу мыщ щытлъэ­гъугъэхэр тыгу хэпкIагъэх. Ахэр IэпэIэ­сагъэм ишэпхъэ лъэгэ дэдэу зэрэ­щытыр нафэ. ТэгушIо мыщ тыкъызэ­рэкIуагъэм пае, шъуикъэгъэлъэгъон тишIэныгъэ хигъэхъуагъ, Урысыем щыпсэурэ цIыф лъэпкъхэм якультурэ зэрэгъэшIэгъоныр нэрылъэгъу тфэхъугъ».

IэпэIасэу Сет Сафиети егъэджэнхэр афызэхищагъэх. ИIэшIагъэхэм ащыщхэу дышъэидагъэр зыщыгъэфедагъэхэр – Iалъмэкъхэр, чысэхэр, ахъщалъэхэр къэгъэлъэгъоным хэтыгъэх. Адыгэ лъэпкъ къашъохэу «Ислъамыем», «Уджым» хьакIэхэр ащагъэгъуазэхэзэ ахэр къызэрэпшIын фаехэр къафагъэ­лъэгъуагъэх Абэсэ Муратрэ ЦIыпIынэ Жанетэрэ. Ахэм къызэдашIыгъэ «Ислъа­мыем» ыуж хьакIэхэр «Удж хъураем» къырагъэблэгъагъэх.

Имбирь зыхэлъ пряникхэу адыгэ тхыпхъэхэр зытетхэр кIэухым агощыгъэх.

Спорт гъэхъагъэхэр

Адыгеим спортымкIэ гъэхъагъэу иIэ­хэри мы мафэм щашIагъ. ЗэлъашIэрэ тренерэу Кобл Якъубэ зэхищагъэу дзю­домкIэ ыкIи самбэмкIэ Мыекъопэ еджапIэм зыщызыгъасэхэрэм мэфэ реным зыкъагъэлъэгъуагъ. УФ-м спортымкIэ и Министерствэ ипчэгу ахэр зыдэщыIагъэхэр.

АР-м и ЛIышъхьэу КъумпIыл Мурат спортс­менхэм шIуфэс къарихыгъ, тиспортс­менхэм зэрарыгушхорэр къыхи­гъэщыгъ. Кобл Якъубэ ишъхьэгъусэу Ща­рет къекIолIагъэхэм закъыфигъэзагъ, мы спорт лъэпкъыр зэрэлъагъэкIуатэрэмкIэ зэрафэразэр ариIуагъ.

Олимпийскэ чемпионхэу Арсен Галстян, Мудрэнэ Бислъан яIэпэIэсэ­ныгъэкIэ тиспортсмен ныбжьыкIэхэм адэгощагъэх.

Лъэпкъ джэгукIэхэр

Лъэпкъ джэгукIэхэу адыгэхэм яIэхэри мы мафэм тигъэлъэгъуапIэ къекIуалIэ­хэрэм зэрагъэшIэн алъэкIыгъ. Ахэр общественнэ организациеу «Шыу Хасэм» хэтхэм къагъэлъэгъуагъэх. Шыгъачъэр, кIэпсэ зэпэкъудыиныр, къупшъхьэкъутэр, аркъэн дзыныр, бэлагъэр, цэлдаор — мы зэпстэумкIи узэрэджэгущтыр къекIуа­лIэ­хэрэм къафаIотагъ, акIуачIи арагъэуп­лъэкIугъ. «Лъэпкъ джэгукIэхэм пIуныгъэ ыкIи гъэсэныгъэ мэхьэнэ куу ахэлъ, лъэпкъым итарихъ апхырыщыгъ, — къытфиIотагъ «Шыу Хасэм» ипащэу Тхьапшъэкъо Альберт. — Джэгунхэр, нэмыкI лъэпкъхэм афэдэу, адыгэхэм ялъэпкъ культурэ изы Iахьэу щытыгъэх. Ахэм къызэрыкIоу, кIэлэцIыкIухэм атегъэп­сыхьагъэу адыгэхэм язытет, лъэныкъуа­бэкIэ къызэIухыгъэу, яхъызмэт къыщыу­благъэу къыдэгъэкIыным нэсы­жьэу, унэгъо хъызмэтри, социальнэ зэмы­шIуныгъэри къагъэлъагъощтыгъ. Джэгуныр гъэсэн шIыкIэ закъоу щымытэу, об­щественнэ гукъэкIыжь инэу лIэшIэ­гъухэм къызэфагъэнэжьы. Адыгэ джэгу­кIэхэм акупкIых къэчъэныр, кIоныр, лъэныр, дзыныр, дэкIоеныр — физическэу пкъышъолыр зэкIафы. Лъэпкъ хабзэхэмрэ физическэ пIуныгъэмрэ зэголъхэу къыт­кIэ­хъухьэхэрэм яфизическэ пIуныгъэкIэ пшъэрылъхэр зэшIохыгъэнхэм ахэр фэIорышIэх».

Тиадыгэ джэгукIэхэр нэмыкI лъэпкъхэм зэрашIогъэшIэгъонхэр тыгъосэрэ мафэми къыгъэлъэгъуагъ — ахэм атегъэпсыхьэгъэ чIыпIэу республикэм къызэIуихыгъэр зэгъокIэу къыхэкIыгъэп, сабыйхэр етIупщыгъэу щызэнэкъокъущтыгъэх.

Бэрэ ащыгъупшэщтэп

Адыгеим и Мафэ мэкIофэ тикуп цIэрыIохэу «Ислъамыемрэ» «Налмэ­сымрэ» концертхэр къатыгъэх, кIэухым къэгъэлъэгъоным къекIолIэгъэ пстэури «Удж-хъураем» къыхагъэлэжьагъ.

Непэрэ мафэм къемыкIолIэ­шъугъэхэм джыри уахътэ яI пстэури зэрагъэлъэгъунэу – шъугу къэдгъэкIыжьын, мэлылъфэгъум и 12-м нэс къэгъэлъэ­гъоным Iоф ышIэщт. ЫпкIэ хэлъэп, блэшъумыгъэкI!

МЭЩЛIЭКЪО Саид. ТЭУ Замир. АНЦОКЪО Ирин. къ. Москва, тыгъэгъазэм и 14.