Мы программэр мэкъумэщ хъызмэтыр мылъку къэкIуапIэу къыхэзыхы­гъэхэм егъэжьапIэ ашIынэу грантхэр ятыгъэнхэм фэгъэхьыгъ.

Ащ къыдыхэлъытагъэу гъэрекIо сомэ миллион 73-рэ федеральнэ бюджетым къыхэхыгъэу Адыгеим щатыгъ. Джы тызыхэт 2023-м ащ пае республикэм къыфэкIонэу сомэ миллион 94,4-рэ федеральнэ бюджетым щагъэнэфэгъагъ. Ар процент 29,3-кIэ гъэрекIо атыгъэм нахьыб.

Мыгъэ нэбгырэ 42-рэ программэм къыхиубытагъэу грантхэр зыфэкIуа­гъэхэр. Ахэм анахьыбэр цумпэ лъэпкъхэм е коцы, хьэ зыфэпIощтхэм якъэ­гъэкIын зыпылъхэр. Ахэм ащыщ ХьэнэпIэ Азамат.

Ар селоу Красногвардей­скэм щыщ, чIыгулэжьыныр ары зыпылъыр, коцыр, хьэр, тыгъэгъазэр къегъэ­кIых. НахьыпэкIэ ащ мэкъумэщ хъызмэтшIапIэу районым итхэм ащыщ Iоф щишIэщтыгъ. Илъэс пчъагъэхэм чIыгулэжьыным хэшIыкIэу фыриIэ хъугъэр ежь ышъхьэ фигъэфедэжьы­­нэу иунэе хъызмэтшIапIэ ыгъэпсыгъ. ПстэумкIи гек­тар 51-рэ мы уахътэм иI. Ащ щыщэу 41,5-м гъат­хэу кIуагъэм тыгъэгъазэ щырипхъыгъагъ. Зы гектарым, гурытымкIэ лъытагъэу, центнер 38-рэ къырихыгъ.

Арэущтэу щытми, ищы­кIэ­гъэ техникэр икъоу зэ­римыIэм къиныгъохэр къы­фихьыщтыгъэх. Ащ фэшI программэм хэлажьи сомэ миллиони 2-рэ мин 700-рэ жъоныгъокIэ мазэм гран­тэу къыратыгъ.

— Район администрацием мэкъумэщ хъызмэтымкIэ и ГъэIорышIапIэ программэм узэрэхэлэжьэщтым ищыкIагъэр къыщысфаIотагъ, тхылъхэм ягъэ­хьазырынкIэ къыздеIагъэх. Зыпари къин хэслъэгъуагъэп, мэкъумэщ хъызмэтым ыуж ихьэ зышIоигъо­хэр терэмыщыныхьэх, — еIо Азамат. — Ахъщэ IэпыIэгъур лъэшэу къыздеIагъ. Ащ ишIуагъэкIэ техникэр къэсымылъэIу- фэу Iоф сшIэн амал сиIэ хъугъэ.

Программэм къызэрэдэ­лъытагъэм тетэу, ежьыри ахъщэ IэпэчIэгъанэ иIагъэ­ти, къыратыгъэм ар хигъа­хъуи ищыкIэгъэ техникэр, ащ пышIэгъэн фаехэр къы­щэфыгъэх. Тыгъэгъазэр зытырихыжьыгъэ гектар 41,5-м бжыхьэсэ коц хилъхьагъ, къэнагъэм къэкIорэ илъэсым игъатхэ ты­гъэгъазэ рипхъыщт.

Азамат къэралыгъо IэпыIэгъур мы уахътэм къы­зэрышъхьэпагъэм имыза­къоу, тапэкIэ хэхъоныгъэ­хэр ышIынхэми зэрэфэIорышIэщтым ицыхьэ телъ. ЧIыгоу ылэжьырэм хигъэ­хъонэу фай, къырихыжьырэр нахьыбэ хъуным фэшI чылэпхъэ лъэпкъ дэгъухэр, чIыгъэшIухэр ыгъэфедэщтых. НэмыкI гухэлъхэри иIэх. Зэпстэури къыдэхъу­нэу тыфэлъаIо!

АР-м мэкъу-мэщымкIэ и Министерствэ тызэрэщигъэгъозагъэмкIэ, блэкIыгъэ 2022-рэ илъэсым федеральнэ ыкIи шъолъыр бюджетхэм къахэхыгъэу зэкIэмкIи сомэ миллион 701-м ехъу мы лъэныкъом щылажьэхэрэм къэралыгъо IэпыIэгъоу аратыгъ.

Ащ нэмыкIэу АР-м социальнэ ыкIи экономикэ хэхъоныгъэхэр егъэшIы­гъэн­хэмкIэ унэе программэм къыдыхэлъытагъэу мэкъумэщ техникэ е оборудование кIэу къэзыщэфыгъэхэм субсидиехэр яты­жьыгъэнхэм сомэ миллиони 120-рэ республикэм щыпэIуагъэхьагъ. Ащ щыщэу сомэ миллиони 118-р федеральнэ бюджетым къы­хэхыгъ. Мы ахъщэ IэпыIэгъури хэгъэхъуагъэу сомэ миллион 359,6-рэ зыосэ техникэу е нэмыкI псэуалъэу 177-рэ мэкъу­мэщ хъызмэтым пылъхэм къащэфыгъ.

ХЪУТ Нэфсэт.