Адыгеим узэрыгушхон ныбжьыкIабэ ис. Непэ нэIуасэ шъузыфэтшIыщтхэ Жарэкъомэ якIалэхэу Пщымафэрэ Шумафэрэ ахэм ащыщых.

ШIэныгъэр нэбгырэ пэпчъ ищыкIэгъэ гушъхьэгъомылэу зэрэщытыр ныбжьыкIэхэм къагурыIон фае. НыбжьыкIитIоу зигугъу къэтшIыщтхэм зыкIэхъо­псырэ сэнэхьатхэр зэрагъэгъотыгъ.

Пщымафэрэ Шумафэрэ зэтIуазэх, ахэр Хьаты­гъу­жъыкъуае къыщыхъугъэх, Джыракъые щапIугъэх. ЯцIыкIугъом къыщегъэ­жьагъэу еджапIэм дэгъоу щеджагъэх.

УблэпIэ классхэм къаще­гъэжьагъэу лъэныкъо зэ­фэшъхьафхэмкIэ олимпиа­дэхэм, гущыIэм пае, крае­ведениемкIэ, тарихъым­кIэ, обществознаниемкIэ, инджылызыбзэмкIэ, нэмы­цыбзэмкIэ ахэлэжьагъэх. ЕджапIэр медалькIэ къаухыгъ. Ащ фэдэ сэнаущыгъэ зыхэлъ зэшхэм апшъэ­рэ еджапIэм чIэхьанхэр къафэкъиныгъэп.

Пщымафэ Пшызэ къэралыгъо университетым дунэе зэфыщытыкIэхэмкIэ ифакультет диплом плъыжькIэ къыухыгъ. ­Адыгэ лъэпкъым къыхэкIыгъэ ныб­жьыкIэм инджылызы­бзи, нэмыцыбзи зэригъэшIагъэх, Германием Iоф щишIэнэу кIогъагъэ. КIэлэ чаным шIэныгъэхэм джыри ахигъэхъуагъ, Москва къэралыгъо университетым имагистратурэ къыухыгъ. ИгупшысакIэ, гумэкIыгъоу къэуцухэрэм ядэгъэзыжьын ямышIыкIэу зэрекIуалIэрэм яшIуагъэкIэ Москва IэнатIэ къыщыратыгъ.

— Программэу «Дунэе зэфыщытыкIэхэр» зыфи­IорэмкIэ магистратурэм Москва сыщеджэзэ, нэ­ужым IофшIапIэ сэзыгъэгъотыгъэм нэIуасэ сыфэ­хъугъ, ари мы программэм­кIэ къыддеджагъ.

Еджэныр езгъэжьагъэу 2021-рэ илъэ­сым ащ IофшIэным сыригъэблэгъагъ, экспортым ылъэныкъокIэ тызэ­дэлэжьэнэу итхъухьагъ. Ащ ыпэкIэ нэмыц компаниеу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «КЛААС» зыфиIорэм иотдел практикэ зэрэщысхьыгъэм ишIогъэшхо къысэкIыгъ, IофшIэкIэ амалхэр сIэ къихьагъэх. Джырэ уахътэм финансхэм япхыгъэ IофшIэным нахь сыфэгъэзагъ, ащ къыхэкIыкIэ программэу «Финанс пащэр» зыфиIорэмкIэ се­джэ, мы организацием от­делым ипащэу сыщэлажьэ. СиIофшIэн дакIоу репетиторэу сэлажьэ, инджылызыбзэмрэ нэмыцыбзэмрэ онлайн шIыкIэм тетэу ясэгъашIэх. Ныб­жьыкIэхэм зафэзгъазэмэ сшIои­гъу: сыд фэдэрэ сэнэхьат шъуфеджэми, ар щыIэныгъэм къыщышъу­шъхьэпэным пае куоу зэ­жъугъашIэ, — къыхигъэу­нэфыкIыгъ Пщымафэ.

Шумафэ ицIыкIугъом щегъэжьагъэу кIэлэегъаджэ хъунэу фэягъ. Ащ АКъУ-м илъэпкъ факультет къыу­хыгъ. Джыракъые гурыт еджапIэм кIэлэегъаджэу щэлажьэ. Адыгэ шэн-ха­бзэхэм еджакIохэр афэгъэ­сэгъэнхэм лъэшэу пылъ.

— Адыгабзэм хэхъоныгъэ ышIыным, ащ имэхьанэ зыкъегъэIэтыгъэным тапы­лъын фае, — еIо Шумафэ, — ащкIэ амалэу щыIэр зэкIэ тиеджапIэ егъэфедэ. КъыткIэхъухьэрэ лIэужхэм яныдэлъфыбзэ рыгущыIэнхэу ыкIи рытхэнхэу ягъэшIэгъэныр непэ пшъэрылъ шъхьаIэу тиIэхэм ащыщ. АщкIэ еджапIэмрэ мы предметымкIэ кIэлэегъа­джэхэмрэ яIофшIэн зэрэзэхащэрэм бэ елъытыгъэр. Ар къыдэтлъытэзэ, адыгабзэм, лъэпкъ культурэм язэгъэшIэнкIэ шIыкIэ зэфэшъхьафхэр тэгъэфедэх.

Къуаджэу зыдэсым щызэрахьэрэ общественнэ Iофхэм чанэу Шумафэ апылъ.

Адыгэ пщынэм ыкIи синтезаторым мэкъамэхэр къаригъэIонхэу зэригъэшIагъ. Джы ар нысэщэ джэгухэм, музыкальнэ зэнэкъокъухэм ахэлажьэ. БэмышIэу ежьыми къы­щагъ, шъэожъые къыфэ­хъугъ.

Пшъэрылъ шъхьаIэу ныбжьыкIэхэм яIэр акъыл хэлъэу ясэнэхьат къыхахыныр ары. ЦIыф пэпчъ сэнаущыгъэ зыфыриIэ лъэныкъор ыгъэфедэмэ, мыщ фэдэ ныбжьыкIэхэм ахэхъощт, ялъэпкъ аIэтыщт.

Лъэпшъыкъо Фатим.