Урысыем и Конституцие и Мафэ ехъулIэу зэхащэгъэ Урысые Iофтхьабзэу «Тэ Урысыем тырицIыф» зыфиIорэм Адыгеири хэлэжьагъ. Республикэм икIэлэеджэкIуи 10-у еджэнымкIи, спортымкIи, общественнэ IофшIэнымкIи гъэхъэгъэшхохэр зышIыгъэхэм республикэм и Правительствэ зычIэт унэм непэ паспортхэр щаратыгъэх. Адыгеим и ЛIышъхьэу КъумпIыл Мурат а Iофтхьабзэм хэлэжьагъ.

Джащ фэдэу Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м гъэсэныгъэмрэ шIэныгъэмрэкIэ и Минис­терствэ, АР-м ныбжьыкIэхэм яIофхэмкIэ и Комитет, Урысые общественнэ движе­ниеу «Пэрытхэм я Движение» ишъолъыр къу­та­мэ япащэхэр, кIэлэеджакIохэр, ны-тыхэр.

Республикэм и ЛIышъхьэ Iофтхьабзэм хэлажьэхэрэм шIуфэс къарихи, документ шъхьаIэр – Урысыем ипаспорт къазэрара­тырэмкIэ ыкIи Урысые Федерацием и Конституцие заштагъэр илъэс 30 зэрэ­хъу­рэмкIэ кIэлэеджакIохэм къафэгушIуагъ.

«Конституциер зыщыщым, къэралыгъо лъапсэм игъэпытэнкIэ, обществэм хэхъо­ныгъэ егъэшIыгъэнымкIэ ащ мэхьанэшхо зэри­Iэр къыжъугурызгъэIожьыныр имы­щы­кIагъэу сэлъытэ. Урысыер кIочIэшхо зиIэ хэгъэгу ин. Ар пстэуми апэу зыгъэ­лъэшырэр тицIыфхэу республикэ гупсэм­рэ хэгъэгумрэ яшъыпкъэу фэлажьэхэрэр, нэмыкIхэм яфитыныгъэхэр икъоу къыдэ­зы­лъытэхэрэр, чIыопсыр къэзыу­хъумэ­хэрэр, я Хэгъэгу рыгушхохэрэр, ащ хэхъо­ныгъэ егъэшIыгъэным зиIахь хэ­зышIыхьаным фэхьазырхэр ары. Ащ фэдэ цIыфэу шъузэрэщытыр шъуныбжьы­кIэзэ къэжъугъэлъэгъуагъ», — къыIуагъ КъумпIыл Мурат.

Республикэм ипащэ анахьэу къыхигъэ­щыгъэр еджэнымкIи, творчествэмкIи, спортымкIи, общественнэ IофшIэнымкIи кIэлэеджакIохэм гъэхъагъэхэр зэряIэхэр ары. Республикэм и ЛIышъхьэ яшIэны­гъэхэм ренэу ахагъахъозэ цIыфыгъэ ахэлъынэу, ящыIэныгъэ дахэу зэпыфэнэу, Адыгеимрэ Урысыемрэ апае ятворческэ амалхэр агъэфедэнхэу, гъэхъагъэхэр ашIынхэу афэлъэIуагъ. Паспортхэм анэмыкIэу кIэлэеджакIохэм шIухьафтынхэри аратыгъэх. Республикэм ипащэ зыдэгущыIэхэ нэуж АР-м и ЛIышъхьэ и Координационнэ гупчэ Iоф зэ­ри­­шIэрэм ахэр нэIуасэ фашIыгъэх, Лъэпкъ музеим щыIагъэх, Конституцием итарихъ къафаIотагъ.

Адыгэ Республикэм и ЛIышъхьэ ипресс-къулыкъу