Адыгеим и ЛIышъхьэу КъумпIыл Мурат Iахьзэхэлъ обществэу «Газпромбанкым» илIыкIохэм IофшIэгъу зэIукIэгъоу адыриIагъэр зыфэгъэхьыгъагъэр республикэм финанс-кредит организациехэм зэдэлэжьэныгъэ адыриIэнымкIэ гугъапIэу ыкIи амалэу щыIэхэр ары.

Джащ фэдэу зэдэгущыIэгъум хэлэ­жьагъэх Адыгэ Республикэм иминис­трэхэм я Кабинет и Тхьаматэу КIэрэщэ Анзаур, гъэцэкIэкIо вице-президентэу – Къыблэ шъолъырымкIэ Газпромбанкым ипащэу Сергей Селютиныр, вице-президентэу – Газпромбанкым банкхэм яхэхъоныгъэкIэ и Департамент ипащэу Михаил Завьяловыр, республикэм иминистерствэхэмрэ иведомствэхэмрэ яIэшъхьэтетхэр, банкхэм япащэхэр.

Мылъкур тэрэзэу гъэфедэгъэнымкIэ, лъэныкъо пстэуми финанс уплъэкIунхэр ащызэхэщэгъэнхэмкIэ, зэзэгъыныгъэхэм ягъэцэкIэн епхыгъэ Iофтхьабзэхэр икъоу зехьэгъэнхэмкIэ Адыгэ Республикэм икъэралыгъо ыкIи иинвестиционнэ проектхэм яIофхэм язытет, амалэу яIэхэм зэIукIэгъум щатегущыIагъэх.

Газпромбанкым и Банк ивице-прези­дентэу Михаил Завьяловым къызэри­IуагъэмкIэ, фэтэрыбэу зэхэт унэхэм ягъэцэкIэжьынкIэ, промышленностым хэхъо­ныгъэ егъэшIыгъэнымкIэ, къэралы­гъо IэпыIэгъур къызфагъэфедэзэ унэе инвестпроектхэр зэшIохыгъэнхэмкIэ фондхэм якъэкIуапIэхэм нахь шIогъэ ин къягъэтыгъэнымкIэ ащ амал дэгъухэр къетых. Нэужым Газпромбанкым иэлектрон сатыушIыпIэ зэIукIэм хэлажьэхэрэр нэIуасэ фашIыгъэх. Цифрэ технологиехэр агъэфедэхэзэ къэралыгъо щэфынхэр тэрэзэу зэшIохыгъэнхэм иамал ащ къеты.

Ащ нэмыкIэу Адыгэ Республикэм инвестиционнэ проектышхохэр щызэшIо­хыгъэнхэм хэлэжьэным банкыр фэхьа­зыр. Ащ къыхеубытэх инфраструктурнэ псэуалъэхэр шIыгъэнхэр. ЦIыфхэм банкхэм алъэныкъокIэ яфэIо-фашIэхэм нахь зягъэушъомбгъугъэным ыкIи нэмыкI фэIо-фашIэхэу къызфагъэфедэн алъэ­кIыщтхэм нэIуасэ афэшIыгъэнхэм ятегущыIэн хэушъхьафыкIыгъэу рекIо­кIыгъ.

ЗэIукIэгъум икIэуххэр зэфихьы­сыжь­хэзэ, республикэм и ЛIышъхьэ банкхэм алъэныкъокIэ, ахэм яIофшIэн тапэкIи хэхъоныгъэ егъэшIыгъэнымкIэ респуб­ликэм къытефэрэр зэрэзэ­шIуихыщтым ыкIи ащ ифедэ зэрэхэлъым анаIэ тыраригъэдзагъ.

«Лъэныкъо пстэумкIи, финанс лъэны­къори зэрахэтэу, зэнэкъокъу нэшанэ ахэлъыныр игъоу тэлъэгъу. Банк фэIо-фашIэхэр нахь дэгъоу ыкIи нахь Iэрыфэгъоу щытынхэм пае лъэныкъо зэфэшъхьафхэм тызэдяусэ. Инвести­ционнэ ыкIи инфраструктурнэ проектхэм язэшIохын Газпромбанкыр хэлэжьэ­нымкIэ амалэу щыIэхэм тшIогъэшIэгъонэу тынаIэ атетыдзагъ. Адыгеим мы аужырэ илъэсхэм макроэкономическэ лъэны­къохэмкIэ гъэхъэгъэшIухэр ышIыгъэх. КIэу ннвесторхэр къызфэдгъэфедэнхэм ренэу тынаIэ тетэгъэты, къэралыгъо программэхэм тахэлажьэ, республикэмкIэ мэхьанэшхо зиIэ проектхэм ягъэцэкIэнкIэ зэдэлэжьэныгъэм тыфэхьазыр», — къыIуагъ КъумпIыл Мурат.

ИкIэухым Адыгэ Республикэм и ЛIышъхьэ министерствэхэмрэ ведомствэ­хэмрэ япащэхэм пшъэрылъ афишIыгъ Газпромбанкым игъоу ылъэгъугъэхэм игъэкIотыгъэу ахэплъэнхэу, банк фэIо-фашIэхэм шIуагъэу къатын алъэкIыщтым зыщагъэгъозэнэу ыкIи зэдэлэжьэ­ны­гъэмкIэ амалэу щыIэхэм джыри нахь зягъэушъомбгъугъэным анаIэ тырагъэ­тынэу.

АР-м и ЛIышъхьэ ипресс-къулыкъу