Неущ, тыгъэгъазэм и 14-м, дунэе къэгъэлъэгъон-форумэу «Урысыем» Адыгэ Республикэм имафэ щыкIощт.

Iофтхьабзэм хэлэжьэщтхэм респуб­ликэм культурэ, шэн-хэбзэ баеу иIэхэм, ицIыф цIэрыIохэм, экономикэмкIэ, спор­тымкIэ, гъэсэныгъэмкIэ Адыгеим гъэхъа­гъэу ышIыгъэхэм нэIуасэ зафашIын алъ­э­­кIыщт.

«Лъэныкъуабэ типрограммэ къызэ­лъиу­бытыщт: зекIо-кластерым зызэред­гъэушъомбгъущт шIыкIэм, республикэм чIыопс амалэу иIэхэм татегущыIэщт, лъэпкъ IэшIагъэхэмкIэ мастер-классхэр зэхэтщэщтых, Адыгеим итворческэ коллектив цIэрыIохэм концертышхо къатыщт. Мы мафэм джащ фэдэу бизнесым, гъэсэныгъэм, спортым япхыгъэ Iофтхьабзэхэр зетхьащтых», — къаригъэхьагъ Адыгеим и ЛIышъхьэ социальнэ хъытыухэм.

Тыгъэгъазэм и 14-м ВДНХ-м Iофтхьаб­зэу щыкIощтхэр:

* Адыгеим истенд дэжь сыхьатыр 10.20-м программэр щырагъэжьэщт, сыхьатыр 11-м культурнэ проектхэм якъэгъэлъэгъуапIэ дэжь республикэм гъэхъагъэу иIэхэм ялъэтегъэуцо щыкIощт, коллективхэм зыкъыщагъэлъэгъощт.

* Мэфэ псаум республикэм истенд дэжь лъэпкъ IэшIагъэхэмкIэ, мэкъэмэ Iэмэ-псымэхэм къягъэIогъэнымкIэ мас­тер-классхэр щызэхащэщтых. ЗышIоигъо пстэуми Адыгеим илъэгъупхъэ чIыпIэхэр зытешIыхьэгъэ почтэ открыткэр яныбджэ­гъухэм е ядэжь арагъэхьын алъэкIыщт.

* Культурнэ проектхэм якъэгъэлъэ­гъуапIэ дэжь сыхьатыр 3-м къыщегъэ­жьагъэу пчыхьэм 7-м нэс ансамблхэу «Нал­мэсым», «Ислъамыем», «Казача­тэм», «Уджым», «Ащэмэзым» зыкъыща­гъэ­лъэгъощт, Даутэ Сусанэ орэд къыщи­Iощт.

* Урысые Федерацием спортымкIэ и Министерствэ истенд дэжь мафэм къыкIоцI тиспортсмен цIэрыIохэми, ныб­жьыкIэхэми зыкъыщагъэлъэгъощт, мастер-классхэр къыщатыщтых.

* Мы мафэм конференц-залхэм Адыгеим ичIыопс, зекIоным республикэми Мыекъуапи зызэращиушъомбгъурэм, адыгэхэм якультурэрэ ятарихърэ афэгъэхьыгъэ лекциехэм къащяджэщтых.

* Я 75-рэ павильоным ыпашъхьэ сыхьатыр 11-м къыщегъэжьагъэу пчы­хьэм 6-м нэс зышIоигъохэр «Шыу Хасэм» зэхищэрэ мэфэкI зэхахьэхэм ахэлэ­жьэнхэ, шъоурэ хьалыжъорэ зыкIыгъу щай стырым ешъонхэ алъэкIыщт.

* Тиреспубликэ изекIо егъэблэгъэ тхылъхэр пхъэдзкIэ къырарагъэхыщт.

«Мы мафэм ВДНХ-м Iофтхьэбзабэ щызэрахьащт. ХьакIэхэми, Iофтхьабзэхэм ахэлажьэхэрэми ар шIукIэ агу къинэ­жьынэу сэгугъэ. ЗышIоигъохэр зэкIэ павильонэу N 75-м, Адыгэ Республикэм истендэу мэлылъфэгъум и 12-м нэс зэIу­хыгъэщтыр зэрагъэлъэгъунэу етэгъэбла­­­гъэх», — къытхыгъ КъумпIыл Мурат.