Хэгъэгум и ЛIыхъужъхэм я Мафэ къыдыхэлъытагъэу Мыекъопэ гурыт еджапIэу N7-м патриотическэ Iофтхьабзэу «ЛIыхъужъэу къэхъухэрэп» зыфиIорэр щыкIуагъ. Ащ икIэщэкIуагъ къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ, IэпыIэгъу къыфэхъугъэх Юнармиер ыкIи еджапIэм иадминистрацие.

Iофтхьабзэм къырагъэблэгъа­гъэх Урысыем и ЛIыхъужъэу, АР-м и Къэ­ралыгъо Совет — Хасэм и Тхьаматэ игуадзэу Цэй Эдуард, Урысыем и ЛIыхъужъ щытхъуцIэр къызфагъэшъошэгъэ щымыIэжь майорэу Вадим Лемеш ишъхьэгъусэу Елена Бронниковар.

Урысыем и ЛIыхъужъ щытхъу­цIэр къызфагъэшъошагъэхэм афэгъэхьыгъэ видеофильмымкIэ Iофтхьабзэр къызэ­Iуахыгъ. Нэ­ужым шъолъыр фондым ипащэ игуадзэу Джарымэ Еленэ кIэлэеджакIохэм зафигъэзагъ. Ащ къызэрэхигъэщыгъэмкIэ, мы шIэжь мафэм Урысыер къэзыу­хъумэхэрэм лъытэныгъэ зэрафашIырэр, зэрагъэлъапIэхэрэр къеушыхьаты. Джащ фэдэу хэушъхьафыкIыгъэ дзэ операцием хэлэжьэгъэ тичIыгогъухэу ядзэ пшъэрылъ­хэр агъэцакIэхэзэ лIыхъужъэу фэхыгъэхэм ар къатегущыIагъ.

— Къэралыгъо тын анахь лъапIэр — ме­да­лэу «Дышъэ Жъуагъу» зыфиIорэр зыпсэ зыгъэтIылъыгъэ тичIыгогъухэу Олег Цоковым, Вадим Лемиш, Валерий Зава­лянскэм къаратыгъэх. Ахэм зэрахьэгъэ лIы­хъужъныгъэр тыгухэм арылъыщт, — къыIуагъ Е. Джарымэм.

ГущыIэр лъигъэкIотагъ Цэй Эдуард. Апшъэрэ классхэм арысхэм, юнармей­цэхэм еджэным гъэхъагъэхэр щашIынхэу, сыд фэдэрэ Iоф рахьыжьагъэми, лъэгапIэхэм анэсынхэу къафэлъэIуагъ, къэралыгъом и ЛIы­хъужъхэр ащымыгъуп­шэнхэу ыкIи Хэгъэгур къэзыухъумэрэ цIыф­хэм сыдигъуи лъытэныгъэ афа­шIэу щыIэнхэу къяджагъ.

УФ-м и ЛIыхъужъэу щымыIэжь майо­рэу Вадим Лемеш ишъхьэгъусэу Еленэ Iофтхьабзэм щагъэшIуагъ, фондым иIофышIэхэм къэгъагъ Iэрам ащ ратыгъ.

Хэгъэгум иухъумакIохэу зэпэуцужь зэфэшъхьафхэм ахэкIодагъэхэм зы такъикърэ афэ­шъыгъуагъэх.

Патриотическэ Iофтхьабзэу «ЛIыхъу­жъэу къэхъухэрэп» зыфиIорэр гъэшIэгъо­нэу рекIо­кIыгъ, хэлэжьэгъэ пстэуми агу зэрэрихьыгъэр къахэщыгъ. Хэгъэгум и ЛIыхъужъхэм я Мафэ аукъо­дыеу мэфэ­пчъым хагъэхьагъэп, ар лIэшIэгъухэр зэзыпхырэ маф.

Iэшъынэ Сусан. Сурэтыр: Артур Лаутеншлегер.