ИшIэжь агъэлъапIэ
[caption id="attachment_143045" align="aligncenter" width="800"] АКъУ.[/caption]
Адыгэ къэралыгъо университетым ипроректорыгъэу Александр Аракеловым ишIэжь фэгъэхьыгъэ турнир мы мафэхэм зэхащагъ.
Ащ ищыIэныгъэ ызыныкъо мы апшъэрэ еджапIэм фигъэхьыгъ, илъэс пчъагъэрэ инженернэ-физическэ факультетым идеканыгъ. 2020-рэ илъэсым коронавирусым ыпкъ къикIыкIэ илъэс 42-рэ нахь ымыныбжьэу идунай ыхъожъыгъ. Iоф дэзышIагъэхэми, ригъэджагъэхэми игугъу дахэкIэ ашIы, 2021-рэ илъэсым къыщегъэжьагъэу мы зэнэкъокъур зэхащэ.
«А. В. Аракеловым ыцIэкIэ Кубок» зыфиIорэм я 7 — 11-рэ классхэм ащеджэрэ кIэлэеджакIохэр хэлэжьагъэх. Ахэр купитIоу гощыгъагъэх: апэрэм — я 7 — 8-рэ классым щеджэхэрэр, ятIонэрэм — я 9 — 11-рэ классхэм арысхэр ащызэнэкъокъугъэх. Командэ пэпчъ нэбгыри 4 хэтыгъ. ЗэкIэмкIи нэбгыри 100-м ехъу хъущтыгъэх. Ахэр Адыгеим ыкIи Краснодар краим ялIыкIох.
[caption id="attachment_143046" align="aligncenter" width="800"]
АКъУ.[/caption]
КIэлэеджакIохэм задачэ 20 къашIыгъ. Зэнэкъокъум зэфэхьысыжьэу фэхъугъэмкIэ апэрэ купым текIоныгъэр къыщыдихыгъ Мыекъопэ гимназиеу N 22-м икомандэ, ащ Кубокыр фагъэшъошагъ. ЯтIонэрэ чIыпIэр ахьыгъ къалэу Лэбапэ къикIыгъэхэм, ящэнэрэр гурыт еджапIэу N 3-мрэ Адыгэ республикэ гимназиемрэ зэдагощыгъ. ЯтIонэрэ купым анахь щылъэшыгъэх лицееу N 8-м икIэлэеджакIохэр, ятIонэрэ хъугъэх Мыекъопэ гимназиеу N 22-м илIыкIохэр, ящэнэрэ чIыпIэр къахьыгъ лицееу N 35-м щеджэхэрэм.
Адыгэ къэралыгъо унивеситетым иректорэу Мамый Даутэ къызэриIуагъэмкIэ, Александр Аракеловым ишIэжь агъэлъапIэзэ мы Iофтхьабзэр зэхащэ. Ащ ищыIэныгъэ гъогу физикэм рипхыгъ, илъэс пчъагъэрэ кIэлэеджакIохэм, студентхэм шIэныгъэ аригъэгъотыгъ, ипредмет шIу аригъэлъэгъугъ.
— Физикэм изэгъэшIэн нахь зыкъегъэIэтыжьыгъэныр пшъэрылъэу къытфагъэуцухэрэм ащыщ. «Физика для всех» зыфиIорэ проектыр тэгъэцакIэ. Непэрэ зэнэкъокъум кIэлэеджакIохэмкIэ мэхьанэ ин иI, физикэмкIэ ахэм заушэтын, яшIэныгъэхэм ахагъэхъон амал яIагъ, — къыIуагъ ректорым.
Александр Аракеловым икIалэу Михаил илъэсищ хъугъэ мы зэнэкъокъум зыхэлажьэрэр. Аужырэ илъэситIум ежьыми ишIэныгъэхэр еушэты, ар лицееу N 8-м щеджэ, ятэ илъэуж рэкIо, ищыIэныгъэ гъогу физикэм рипхын гухэлъ иI.
ДЕЛЭКЪО Анет.