Ахъщэ къолъхьэ тын-­Iыхыным пэшIуекIогъэным и Дунэе мафэ ипэгъокIэу Адыгэ Республи­кэм и Прокуратурэ пресс-конференцие зэ­хищагъ.

Ащ хэлэжьагъэх ахъщэ къолъ­хьэ тын-Iыхыным пэшIуекIогъэнымкIэ хэбзэгъэуцугъэр гъэцэкIагъэ зэрэхъурэм лъыплъэгъэнымкIэ прокурорым иIэпыIэгъухэу Максим Новоселецкэр ыкIи Евгений Базаровыр.

Прокуратурэм иIофышIэхэм къызэраIуагъэмкIэ, подразде­лением пшъэрылъэу иIэхэм ащыщ ахъщэ къолъхьэ тын-Iыхыным пэшIуекIогъэнымкIэ хэбзэгъэуцугъэр гъэцэкIагъэ зэрэ­хъурэм лъыплъэгъэныр, ащкIэ уплъэкIунхэр зэхэщэгъэнхэр, мы лъэныкъомкIэ бзэджэшIагъэ зезыхьагъэхэр гъэпщынэгъэнхэр, ахъщэ къолъхьэ тын-Iыхыным ылъэныкъокIэ цIыфхэм, организациехэм яфитыныгъэу аукъуагъэхэр зэтегъэуцожьы­гъэнхэр ыкIи къэухъумэгъэнхэр.

Е. Базаровым къызэриIуа­гъэмкIэ, 2023-рэ илъэсым къолъ­хьэ тын-Iыхын нэшанэ зиIэ бзэ­джэшIэгъэ 76-рэ респуб­ли­кэм щагъэунэфыгъ. Ахъщэ къолъ­хьэ тын-Iыхыным епхыгъэ бзэджэшIагъэу зэрахьэхэрэм янахьыбэр бюджет ахъщэр зэратыгъугъэм, къуалъхьэ зэраратыгъэм ыкIи зэраштагъэм япхыгъэх. ГущыIэм пае, къолъхьэ тын-Iыхыным епхыгъэ ыкIи цIыфхэм ямылъку атыгъугъэу хъугъэ-шIэгъэ 26-рэ, къуалъхьэ аштагъэу хъугъэ-шIэгъи 6, къуалъ­хьэ къаIахыгъэу 17 къыхагъэщыгъ.

Щысэ къыхьызэ, Теуцожь районым щыIэ гъэIорышIэкIо компанием ипащэхэм алъэныкъокIэ къызэIуахыгъэ уголовнэ Iофым игугъу къышIыгъ. Мыхэм яIэнатIэ къызфагъэфедэзэ мы районым щыпсэурэм ищагу псыр дэщэгъэным пае сомэ миллиони 2,5-рэ хэбзэнчъэу къыIахын гухэлъ яIагъ. Ахъщэу зыкIэдэугъэхэм ызыныкъор къа­ритыгъэу организацием иIофышIэ нэбгыритIур хэбзэ ухъу­мэкIо къулыкъухэм къаубытыгъэх. Ахэм уголовнэ Iоф къафызэIуахыгъ, мы уахътэм зэхэ­фынхэр макIох.

Коррупционнэ нэшанэ зиIэ бзэджэшIагъэ зезыхьэгъэ нэбгырэ 27-р хьыкумым ыгъэмысагъ. ГущыIэм пае, АР-м и Гостехнадзор иэксперт шъхьаIэ ылъэныкъокIэ къызэIуахыгъэ уголовнэ Iофым Мыекъопэ район хьыкумыр хэплъагъ. ИIэнатIэ къызфигъэфедэзэ къуалъхьэ зэриштагъэм фэшI ар агъэмысэ. Хьыкумым иунашъокIэ ащ илъэ­ситф хьапс тыралъхьагъ ыкIи илъэсиплI пIалъэкIэ хэбзэ Iэна­тIэм рылэжьэн фитыщтэп.

Евгений Базаровым къызэриIуагъэмкIэ, къэралыгъо ыкIи муниципальнэ къулыкъушIэхэм яхэбзэ пшъэрылъхэр зэрагъэцакIэхэрэм анаIэ тырагъэтыгъ. Къолъхьэ тын-Iыхын нэшанэ зиIэ бзэджэшIагъэу зэрахьэхэрэм, мы лъэныкъомкIэ IэнатIэм аIутхэу хэбзэгъэуцугъэр зыукъо­хэрэм якъыхэгъэщынкIэ пэшIорыгъэшъ Iофтхьабзэхэр прокуратурэм зэрихьагъэх. Уплъэ­кIунэу ашIыгъэхэм къызэрагъэ­лъэгъуагъэмкIэ, коррупционнэ нэшанэ зиIэ бзэджэшIагъэ зэрахьагъэу IэнатIэ зыIыгъ нэбгыри 10 IофшIапIэхэм аIуагъэ­кIыгъ.

Джащ фэдэу хэбзэгъэуцугъэм къыдилъытэу къэралыгъо ыкIи муниципальнэ къулыкъушIэхэм мылъкоу ыкIи федэу яIэр, агъэ­кIодыгъэ пчъагъэр зэрытхэгъэ тхьапэр аIэкIагъахьэхэмэ, прокуратурэм ренэу уплъэкIунхэр зэхещэх. Мы лъэныкъомкIэ хэу­къоныгъэ зышIыгъэхэр къыхагъэщыгъэх ыкIи IэнатIэ зы­Iыгъ нэбгыри 112-мэ дисциплинарнэ пшъэдэкIыжь атыралъхьагъ.

Къолъхьэ тын-Iыхыным пэшIуекIогъэнымкIэ экспертизэм иIофшIэн хахьэу къэралыгъо хэбзэгъэуцугъэм ыкIи чIыпIэ зыгъэIорышIэжьын къулыкъухэм яшэпхъэ правовой актхэр гъогогъу 249-рэ аукъуагъэу къы­хигъэщыгъ.

Къолъхьэ тын-Iыхыным ылъэ­ныкъокIэ зэрахьэгъэ бзэджэшIагъэхэм зэрарэу арагъэшIыгъэ сомэ миллиони 10,4-м ехъум икъегъэгъэзэжьынкIэ прокурорхэм ядэуи 5-мэ хьыкумыр ахэплъагъ, миллиони 8,1-м къырагъэгъэзэжьыгъ.

Прокурорхэм къызэраIуагъэм­кIэ, ахъщэ къолъхьэ тын-Iыхыным ылъэныкъокIэ хэбзэухъу­мэкIо къулыкъухэм яIофшIэн шIуагъэ къытэу зэхащэным лъэ­кIэу яIэр зэкIэ рахьылIэныр, обществэмкIэ щынагъо къэзыты­рэ бзэджэшIагъэхэр ыкIи бзэ­джэшIэгъэ инэу зэрахьэхэрэр нахь макIэ шIыгъэныр прокуратурэм иIофышIэхэм пшъэры­лъэу зыфагъэуцужьыхэрэм ащыщ.

КIАРЭ Фатим.