Мыекъопэ къэралыгъо технологическэ университетыр къызызэIуа­хыгъэр непэ илъэс 30 мэхъу.

Урысыем и Къыблэ итехнологическэ ап­шъэрэ еджэпIэ пэрытхэм ар непэ ащыщ. На­укэмкIи, егъэ­джэн IофымкIи, Адыгеим, Урысыем, IэкIыб къэ­ра­лы­гъохэм ящыкIэгъэ специалист дэгъухэм ягъэхьазырын­кIи мыщ гъэ­хъэгъэшхохэр иIэх.

1993-рэ илъэ­сым Урысые Федерацием и Правительствэ иунашъокIэ автотранспорт, мэ­къумэщ ыкIи пхъэм икъыдэгъэ­кIыжьын япхыгъэ техникум­хэр зэхагъэхьажьхи, Мыекъопэ къэ­ралыгъо тех­нологическэ институтыр къызэIуахыгъагъ. Ар зигукъэкIы­гъэр ащ иапэрэ ректорэу, джырэ уахътэм ипрезидентэу ТхьакIущынэ Аслъан. 1994-рэ илъэсым апшъэрэ гъэ­сэныгъэ программи 10-кIэ ыкIи гурыт сэнэхьатымкIэ программэ 12-кIэ Iоф ышIэнэу лицензие къыратыгъагъ.

Охътабэ темышIэу мы апшъэ­рэ еджапIэр Урысые ФедерациемкIэ анахь хэхъоныгъэхэр зышIыхэрэм ащыщ хъугъэ. 1996-рэ илъэсым аспирантурэ къызэIуахыгъ, 1998-м кандидат диссертациехэм япхыгъэ хэу­шъхьафыкIыгъэ совет иIэ хъугъэ. 1998-рэ илъэсым МКъТИ-м икъутамэ Яблоновскэм къы­щы­зэIуахыгъ. 2003-м лъэпкъ зэфэшъхьафхэм ялIыкIохэр зы­ще­джэхэрэ факультет иIэ хъугъэ.

Апэрэ илъэсипшIым гъэхъагъэу ышIыгъэхэм къакIэлъыкIоу 2004-рэ илъэсым Мыекъопэ къэралыгъо технологическэ уни­верситет ашIыжьыгъ, ащ ыуж медицинэ институтыри къызэ­Iуахыгъ. Адыгэ Республикэм иапшъэрэ техническэ гъэсэныгъэ хэхъоныгъэхэр ышIынхэмкIэ иIахьышIу зэрэхэлъым, шIэныгъэ куу зиIэ специалистхэр зэрагъэхьазыр­хэрэм къахэкIэу 2004-рэ илъэ­сым медалэу «Адыгеим и Щыт­хъузехь» зыфиIорэр къыфагъэшъошагъ.

Непэ апшъэрэ еджапIэм факультет 12, кафедрэ 40, мединститутыр хэтых. ПсэупIэу Яблоновскэм дэт къутамэр, колле­джи 2, мэкъу-мэщымкIэ шIэныгъэ-ушэтэкIо институт, дзэ егъэ­джэн гупчэр, шIэныгъэ-техническэ, опытнэ-экспериментальнэ базэр, научнэ гупчи 6, лабораторие 12, шIэныгъэ тхылъеджапIэр, ныбжьыкIэ гупчэхэр иIэх. Илъэс къэс университетым специалист миным ехъу къычIетIупщы, студент мин 11-м ехъу ащ щеджэ. Лъэныкъо 14-кIэ научнэ ушэтынхэр щашIых. Ахэр мэкъу-мэщым, гъомылэпхъэ­шIыным, роботизацием, цифрэ технологиехэм ягъэфедэн, медицинэм, фармацием япхыгъэх.

Джащ фэдэу ныбжьыкIэ политикэм епхыгъэу «Школа социального предпринимательства» зыфиIорэм Iоф ешIэ.

Мыекъопэ къэралыгъо тех­нологическэ университетым IэкIыбым щыIэ апшъэрэ еджапIэхэм чанэу Iоф адешIэ, дунэе гъэсэныгъэ программэхэр, проектхэр, научнэ ушэтынхэр зэшIуехых, шIэныгъэ-практическэ конференциехэр зэхещэх. Азием, Африкэм, Европэм, Латинскэ Америкэм ядунэе ор­ганизациехэм, IэкIыб универ­ситетхэм апшъэрэ еджапIэм зэпхыныгъэ адыриI. СНГ-м хэ­­хьэрэ къэралыгъохэм Iоф адешIэ. ДжырэкIэ апшъэрэ еджа­­пIэм дунаим ихэгъэгу 25-мэ яуниверситетхэм ыкIи гъэсэныгъэ организацие 32-мэ зэзэгъыныгъэ адишIыгъэу Iоф адешIэ.

Непэрэ мафэм ехъулIэу УФ-м и Правительствэ къытIупщыгъэ квотэм елъытыгъэу IэкIыб къэралыгъо 46-мэ къарыкIыгъэ студент 1000-м ехъу ыпкIэ хэ­лъэу апшъэрэ еджапIэм щырагъаджэ.

КъэIогъэн фае мы апшъэрэ еджапIэр республикэм ит Iоф­шIэпIэ организациехэм япащэхэм зэрадэлажьэрэр. Ахэм япчъагъэ 300 мэхъу.

НыбжьыкIэхэм япсауныгъэ гъэпытэгъэным, ахэр спортым пыщэгъэнхэм афэшI IофшIэны­шхо мыщ щызэшIуахы. АщкIэ ящыкIэгъэщт спорт Iэмэ-псымэ дэгъухэр, спортивнэ зал зэтегъэпсыхьагъэ, псауныгъэр зыщагъэпытэрэ комплекс, тренажернэ зал еджапIэм хэтых.

2013-рэ илъэсым къыщегъэ­жьагъэу Мыекъопэ къэралыгъо технологическэ университетым иректорыр экономическэ шIэныгъэхэмкIэ докторэу, профессорэу Къуижъ Саида. Апшъэрэ еджапIэр зэхэзыщагъэу, социологическэ шIэныгъэхэмкIэ докторэу, гъэсэныгъэмкIэ Урысые академием иакадемикэу, профессорэу ТхьакIущынэ Ас­лъан МКъТУ-м ипрезидент.

Апшъэрэ еджапIэр шIэныгъэм­кIэ Урысые фестивалэу «NAUKA 0+» зыфиIорэм иплощадкэ хъугъэ. Ащ ыуж мэхьанэшхо зиIэ дунэе зэзэгъыныгъэ пчъагъэмэ акIэтхагъ. Абхъаз къэралыгъо университетым, Азербайджан шIэныгъэмкIэ илъэпкъ академие, нэужым Дубай, Иорданием адэт уни­верситетхэм, нэмыкIхэм адэлэжьэнэу ыублагъ.

2018-рэ илъэсым хэгъэгумкIэ апэрэ пилотнэ проектэу «Бережливый вуз — МГТУ» зыфиIорэр щыIэныгъэм щыпхыращыгъ. Къуижъ Саидэ ащ епхыгъэ Ассоциацием ипащэу агъэ­нэфагъ.

Апшъэрэ еджапIэм ипроектэу «Инновационные образовательные технологии развития бережливых компетенции современного инженера» зыфиIорэмкIэ федеральнэ инновационнэ площадкэ хъугъэ.

Университетым щеджэрэ ныбжьыкIэхэм яшIэныгъэхэм зэрахагъахъорэм имызакъоу ягухэлъхэр щыIэныгъэм щы­пхыращын амал яI. «Точка ки­пения» зыфиIорэр АдыгеимкIэ апэрэу мыщ къыщызэIуа­хыгъ. 2021-рэ илъэсым апшъэрэ еджапIэм истудентхэр Урысые студент зэнэкъокъоу «Твой ­ход» ыкIи лъэпкъ шIухьафтынэу «Илъэсым истудент» зыфиIохэрэм текIоныгъэр къащыдихыгъ. 2022-м МКъТУ-м ыкIи политехническэ колледжым ястудент 19-мэ УФ-м и Президентрэ и Правительствэрэ ястипендиехэр къаратыгъ.

Апшъэрэ еджапIэм проек­тыкIэхэр ренэу щызэхащэх. ГущыIэм пае, технологическэ предпринимательствэм хэхъоныгъэхэр егъэшIыгъэнхэмкIэ программэу «Инновектор» зы­фиIорэм къыдыхэлъытагъэу студентхэм проекти 150-рэ зэхагъэуцуагъ. Апшъэрэ еджапIэр къэзыухырэ ыкIи щеджэрэ нэбгыри 8-мэ зэнэкъокъоу «Студенческий стартап» зыфи­Iорэм текIоныгъэр къыщыда­хыгъ. Нэбгырэ пэпчъ ибизнес гухэлъхэр щыIэныгъэм щыпхырищынхэм фэшI сомэ миллион зырыз фагъэшъошагъ.

Илъэс къэс апшъэрэ еджапIэр къэзыухырэ нэбгырэ 30 фэдиз «Стартап как диплом» зыфи­Iорэм къыдыхэлъытагъэу ясэнэ­хьат епхыгъэ IофшIэнхэр къа­гъэлъагъох. 2022-рэ илъэсым Урысыем шIэныгъэмкIэ и Министерствэ иунашъокIэ мэкъу­мэщымкIэ Адыгэ шIэныгъэ-­ушэтэкIо институтыр апшъэрэ еджапIэм хагъэхьажьыгъ. Дунэе общественнэ организациеу «Врачхэм я Хас» зыфиIорэр зэхащагъ. Джащ фэдэу Урысыем зыкъэухъумэжьынымкIэ и Министерствэ, АР-м и ЛIышъхьэ яIэпыIэгъоу апшъэрэ еджапIэм дзэ егъэджэн Гупчэ къыщызэ­Iуахыщт.

Мыекъопэ къэралыгъо тех­нологическэ университетым мы илъэсми гъэхъэгъэшIухэр ышIы­гъэх. Мыщ Iоф щызы­шIэ­хэрэр, щеджэхэрэр яшIэ­ныгъэ­хэмкIэ, ясэнаущыгъэкIэ къахэщых. Мы мафэхэм апшъэ­рэ еджапIэм мэфэкI Iофтхьэбзэ зэфэшъхьафхэр щэкIох.

ДЕЛЭКЪО Анет. Сурэтхэр: МКъТУ-м ихъарзынэщ.