Адыгеим и ЛIышъхьэу КъумпIыл Мурат Херсон хэкум и Геническэ район джырэблагъэ щыIагъ. Ащ зэIукIэгъу щыдыриIагъ Херсон хэкум игубернаторэу Владимир Сальдо.

ЗэдэгущыIэгъум хэлэжьагъэх Херсон хэкум и Правительствэ и Тхьаматэу Андрей Алексеенкэр, Адыгеим илIыкIоу Херсон хэкум щыIэ Хъоткъо Хъызыр, псэолъэшIыным фэгъэзэгъэ фирмэхэм ащыщ ипащэу Хьабэхъу Аскэр.

Урысыем и Президентэу Владимир Путиным хэгъэгум ишъолъырыкIэхэм мамыр щыIакIэр зыпкъ ащигъэуцожьыгъэнымкIэ, социальнэ фэIо-фашIэхэр цIыфхэм нахь икъоу афызэшIохыгъэнхэмкIэ пшъэрылъэу къыгъэуцугъэхэм ягъэцэкIэн зэрэкIорэм лъэныкъуитIури тегущыIагъ. Джащ фэдэу 2024-рэ ыкIи 2025-рэ илъэсхэм Iофэу зэдагъэцэкIэщтыр рахъухьагъ.

Адыгеим и ЛIышъхьэ къалэу Геническэ зыщэIэм республикэм иIофышIэхэр къыхагъэлажьэхэзэ ащ щашIыгъэ псэуа­лъэхэр зэригъэлъэгъугъэх. Къалэу Геническэ дэт еджапIэу N 1-м щезыгъа­джэхэрэм КъумпIыл Мурат аIукIагъ. ЗэдэгущыIэгъум илъэхъан кIэлэегъаджэхэр республикэм ипа­щэ шъхьэихыгъэ спорт джэгупIэ, джащ фэдэу физкультурэмрэ псауныгъэм игъэпы­тэнрэ атегъэпсыхьэгъэ гупчэ зэраригъэшIыгъэхэм апае зэрэфэразэхэр къаIуагъ. КIэлэцIыкIухэр физкультурэм фэщэгъэнхэм имызакъоу, спорт секциехэм яIофшIэни зыпкъ игъэуцогъэнымкIэ амалышIухэр ащ къытыгъэх. Ащ нэмыкIэу инженер коммуникациехэр: газ ыкIи псырыкIуапIэхэр агъэ­кIэжьыгъэх, чIыпIэр нахь зэтырагъэпсыхьагъ.

Геническэ дэт еджапIэу N 2-м псауныгъэм игъэпытэнрэ физкультурэмрэ атегъэпсыхьэгъэ унэу щашIыгъэр КъумпIыл Мурат зэригъэлъэгъугъ. Ащ нэмыкIэу зыщеджэхэрэ унэм гъэцэкIэжьын IофшIэнхэр рашIылIагъэх, кIэлэцIыкIухэм ягъэшхэн нахь тэрэзэу зэхэщэгъэным пае уахътэм диштэрэ Iэмэ-псымэхэр къащэфыгъэх. ЕджэпIитIуми ачIэс кIэ­лэцIыкIухэм гъэмафэм Адыгеим зыщагъэпсэфыгъ, къэкIощт гъэ­мэфэ зыгъэпсэфыгъори ащ щагъэкIонэу фаех.

Геническэ дэт краеведческэ музейми ахэр щыIагъэх, Адыгеим къикIыгъэ псэолъэшIхэм ар агъэцэкIэжьыгъ. Унэ гупэри джащ фэдэу зэтырагъэпсыхьагъ, чIэхьапIэм дэжь тетIысхьэпIэ Iэрыфэгъухэр щагъэуцугъэх, чъыгхэр, къэгъагъэхэр агъэтIыс­хьагъэх. КъумпIыл Мурат Геническэ щыщ­хэу якъэлэ гупсэ зыпкъ игъэуцожьыгъэным зи­Iа­хьышхо хэзышIыхьэгъэ нэбгыри 10-мэ рэзэныгъэ тхылъхэр аритыгъ.

Ащ нэужым Адыгэ Респуб­ликэм и ЛIышъхьэ пшъэрылъыбэ зэшIозыхырэ гупчакIэу ашIы­гъэм иIофшIэн нэIуасэ зыфишIыгъ. Херсон хэкум ащ фэдэ учреждение анахь инэу итхэм зыкIэ ар ащыщ хъугъэ, къэралыгъо фэIо-фэшIэ 22-м ехъу цIыфхэм мыщ щафызэшIуа­хы. Адыгеим къикIыгъэ купым хэтхэу ащ ишIын хэлэжьагъэх чIыпIэ специалистхэри. Къэлэ гъэпсыкIэ зиIэ псэупIэу Новоалексеевкэм зэкIохэм, илъэ­сэу къихьащтым социальнэ мэхьанэ зиIэ псэуалъэхэр ащ зэрэщашIыщтхэр ыкIи жъы хъу­гъэхэр зэрагъэцэкIэжьыщтхэр къыхагъэщыгъ.

«2022 — 2023-рэ илъэсхэм Геническэ районым щыпсэурэ цIыфхэм ящыIакIэ нахьышIу шIыгъэным, къэралыгъо фэIо-фашIэхэр ахэм афэгъэцэкIэгъэн­хэм апае бэ зэшIуахын алъэ­кIыгъэр. Херсон хэкум къикIыгъэ тиIофшIэгъухэри тигъусэхэу анахь мэхьанэшхо зиIэ пшъэ­рылъхэу федеральнэ пащэхэр тигъусэу зэшIотхын фаехэр дгъэнэфагъэх. Партиеу «Единэ Россием», общественнэ Iофхэр чанэу зэшIозыхыхэрэм ыкIи бизнесым ялIыкIохэм яIэпыIэгъу хэлъэу а пшъэрылъхэр зэшIо­тэхых. Псауныгъэм икъэухъу­мэн, гъэсэныгъэм алъэныкъокIэ дгъэцэкIэн фаехэр итхъухьагъэх, инфраструктурэр дгъэкIэжьыгъ, чIыпIэр зэтедгъэпсыхьагъ. ЦIыф­хэм яшIоигъоныгъэхэмрэ яфэныкъоныгъэхэмрэ такъыпкъырыкIызэ, илъэсэу къихьащтым дгъэкIэжьыщт ыкIи дгъэпсыщт псэолъэ заулэ дгъэнэфагъэ. Зэ­кIэми анахьэу тынаIэ зытетыдзэщтыр кIэлэцIыкIу IыгъыпIэхэмрэ фельдшер-мамыку IэзапIэхэмрэ гъэцэкIэжьыгъэнхэр ары», — къыIуагъ КъумпIыл Мурат.

АР-м и ЛIышъхьэ ипресс-къулыкъу