Къалэхэр нахь зэтегъэпсыхьэгъэнхэм фэгъэхьыгъэ проект анахь дэгъухэм я Урысые зэнэкъокъу къыщыхахыгъэ проектхэм япхырыщын епхыгъэ зэIукIэр республикэм и ЛIышъхьэу КъумпIыл Мурат АР-м и Правительствэ зычIэт унэм щызэрищагъ. Мыгъэ «Мэздахэмрэ» Адыгэкъалэ ипаркрэ язэтегъэпсыхьан фэгъэхьыгъэ проектхэр ары зэнэкъокъум къыщыхахыгъэхэр. Джащ фэдэу Мыекъуапэ имикрорайонэу Черемушкэм иаллееу ТекIоныгъэм ия 55-рэ илъэс ыцIэ зыхьырэр зэрэзэтырагъэпсыхьащтми мыщ щытегущыIагъэх. 2024-рэ илъэсыр ары мы проектхэр агъэцэкIэнхэу зырахъухьэрэр. ЗэIукIэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, министрэхэм я Кабинет и Тхьаматэ игуадзэу ЛIыхэсэ Махьмуд, псэолъэшIынымкIэ, псэупIэ-коммунальнэ, гъогу хъызмэтымкIэ министрэу Валерий Картамышевыр, архитектурэмкIэ Комитетым итхьаматэу Зезэрыхьэ Азэмат, АР-м мэзхэмкIэ и ГъэIорышIапIэ ипащэу Былымыхьэ Рэщыд, Мыекъуапэ имэрэу Геннадий Митрофановыр, Адыгэкъалэ ипащэу Хьачмамыкъо Азамат, «Дом.РФ»-мрэ подряд организациехэмрэ ялIыкIохэр. Проектхэм ягъэцэкIэнрэ, зыгъэпсэфыпIэ чIыпIакIэхэм ягъэпсынрэ мэхьанэшхо зэряIэр АР-м и ЛIышъхьэ къыхигъэ­щыгъ. «Республикэм ипсэупIэхэм язэтегъэ­псыхьан лъэшэу гъунэ лъытэфы. Федеральнэ гупчэр тиIэпыIэгъоу мыщкIэ Iофышхо дгъэцэкIагъэ. Ау джыри гухэлъыбэ тиI. Ахэр къызэрэддэхъущтхэм ыуж титыщт, къэлэ, къоджэ псэупIэхэм джырэ шапхъэхэм адиштэрэ теплъэ яIэным, тицIыфхэм ящыIэкIэ-псэукIэ зыкъегъэIэтыгъэным тишъыпкъэу тыпылъыщт», — къыIуагъ КъумпIыл Мурат. Зэнэкъокъухэм къащахахыгъэ проектхэр игъом гъэцэкIэгъэнхэм фэшI гъогу картэр агъэхьазырыгъ. Джыдэдэм проектированиемкIэ IофшIэнхэр зэхащэх. «Дом.РФ-м» дашIыгъэ зэзэгъыныгъэм диштэу проектэу «Мэздах» зыфиIорэмкIэ IофшIэнхэр агъэцакIэх. ЦIыфхэм яшIошIхэр къыдалъытэзэ, дизайн-проектым гъэтэрэзыжьынхэр фашIыгъэх. Унагъохэм атегъэпсыхьэгъэ зыгъэпсэфыпIэу гектар 435-рэ зэлъызыубытыщтыр агъэпсыщт. Информационнэ пкъэухэр, къыз­щакIухьан, зызщагъэпсэфын алъэкIыщт чIыпIэхэр, кIэлэцIыкIу джэгупIэр, нэмыкIхэри ащ хэтыщтых. Бюджет ыкIи мыбюджет мылъкур къызфагъэфедэзэ, чэзыу-чэзыоу проектыр агъэцэкIэнэу рахъухьэ. Къалэхэм язэтегъэпсыхьан фэгъэхьыгъэ проект анахь дэгъухэм я Урысые зэнэкъокъу диштэу федеральнэ грантыр сомэ миллиони 106-рэ мэхъу. Проектым иапэрэ чэзыу кушъхьэфачъэхэм атегъэпсыхьэгъэ гъогухэр агъэпсыщтых, остыгъэхэр агъэуцущтых, кIэлэцIыкIу джэгупIэхэр, общественнэ транспортым иуцупIэхэр ашIыщтых, адыгэхэм якульту­рэрэ ящыIэкIэ-псэукIэрэ нэIуасэ уафэзышIырэ лъэс гъогур зэтырагъэпсыхьащт. Адыгеим и ЛIышъхьэ зэрэхигъэунэфыкIыгъэмкIэ, зыгъэпсэфыпIакIэм итеплъэ дэхэн, Мые­къуапэ дэсхэмкIэ ыкIи къалэм ихьакIэхэмкIэ гуIэтыпIэу хъун фае. Ащ пае Нэгыежъ Iуашъхьэ ичапэ тетыщт зыгъэпсэфыпIэ чIыпIэмрэ къэлэ паркымрэ зэкIоу зэпхыгъэнхэ, рекреационнэ чIыпIэ зэхэщэгъэн фае. Адыгеим щыпсэурэ лъэпкъхэм яижъырэ культурэрэ ящыIэкIэ- псэукIэрэ нэIуасэ уафэзышIырэ псэуалъэхэр паркым дэтынхэу рахъухьэ. Проектым мэхьанэшхо щыраты культурэ, архе­ологие кIэным икъызэтегъэнэ­жьын. Джащ фэдэу тыкъэзыуцухьэрэ дунаир амыушIоинми лъэшэу анаIэ тырагъэты. АР-м и ЛIышъхьэ проектыр Адыгэкъалэ щыгъэцэкIэгъэнымкIэ пшъэрылъ заулэ афишIыгъ. ИкIэрыкIэу мы къалэр Урысые зэнэкъокъум къащыхахыгъ. Шъугу къэтэгъэкIыжьы Адыгэкъа­лэ ыпэкIи федеральнэ грант къызэрэратыгъагъэр ыкIи общественнэ чIыпIэм изэтегъэ­псыхьанкIэ апэрэ чэзыум Iоф зэрэдашIагъэр. Урысые зэнэкъокъум икIэрыкIэу къызэрэщыхахыгъэм ишIуа­гъэкIэ къалэм игупчэ изэтегъэ­псыхьан джыри лъагъэкIотэщт. Мемориальнэ комплексым къы­­пэIулъ мэзым паркэу щагъэ­псырэм епхыгъэ IофшIэнхэр лъагъэкIотэщтых. Къихьащт илъэсым ТекIоныгъэм ия 55-рэ илъэс ыцIэ зыхьырэ аллеем изэтегъэпсы­хьан лъагъэкIотэнэу рахъухьэ. Черемушкэм дэсхэр мы Iофыгъом егъэгумэкIых ыкIи зэдэгущыIэгъу занкIэм ащ фэдэ упчIэ АР-м и ЛIышъхьэ щыратыгъагъ. Геннадий Митрофановым къызэриIуагъэмкIэ, лъэпкъ проектэу «ПсэупIэмрэ къэлэ щыIакIэмрэ» зыфиIорэм диштэу IофшIэн гъэнэфагъэхэр агъэцакIэх. Джыдэдэм проект-сметэ документацием гъэтэрэзыжьынхэр фашIых. «Лъэныкъо пстэури къыдалъы­тэн, зэрищыкIагъэм лъыкIахьэу проектхэр агъэцэкIэнхэ фае. ЗыгъэпсэфыпIэ чIыпIэхэр гуIэтыпIэу, теплъэ дахэ яIэу щытынхэ фае», — къыIуагъ Къум­пIыл Мурат. Адыгэ Республикэм и ЛIышъхьэ ипресс-къулыкъу