Тинахьыжъхэм къашIэжьы адыгэ унагъохэм пхъонтэ зэтеуIубагъэхэр зыщызэрахьэщтыгъэ лъэхъанхэр. Анахьэу ахэр зэплъэгъулIэщтыгъэхэр ныжъхэр ары.

Анахь лъапIэу яIэу, агъа­шIорэр зэкIэ ащ щаухъумэ­щтыгъ, пхъуантэм ыкIыIу кIэлъын-те­хъонхэр тыралъхьэщтыгъэх, унэгъо хъызмэтымкIэ уимыIэ мы­хъущтмэ ахалъытэщтыгъ. Аужырэ уахътэм, лъэхъаным зыдедгъаштэу тIозэ, пыдзы тшIыгъэ­хэм, чIэтыдзыжьхэрэм пхъуан­тэхэри ахэфагъэх. Ау блэкIы­гъэм къыфэгъэзэжьыгъэным ифэмэ-бжьымэу непэ дунаим къыщекIокIырэр ахэми анэсыгъ. Янэжъ ипхъуантэу унэм иты­гъэм игукъэкIыжь фабэ тыригъэгушIухьагъэу пхъэм хэшIыкIыгъэ IэпэщысэхэмкIэ IэпэIасэу ЛIышэ Ахьмэд пхъонтэ шъыпкъэ ышIи, иунэ ригъэуцуагъ.

«Кушъэхэр, Iанэхэр ренэу сэшIых. КIэ горэм ыуж сихьанэу сыгукIэ бэрэ сылъыхъущтыгъ. Сегупшысэзэ, сянэжъ ипхъуантэ сынэгу къыкIэуцуагъ. КъэсэшIэжьы, джыри сыцIыкIоу сянэжъ ихьап-щыпхэр ащ дэ­лъыщтыгъэх. «Ащ фэдэ горэ сшIымэ дэгъуба» сIуи, бэ тесымыгъашIэу мары згъэхьазы­рыгъ. ЧIыпIэ гъэнэфагъэ фы­хэхыгъэу унэм дахэу ит, лыеу къэлъагъо­рэп. Уфаемэ, дэхэфэшIэу, уфаемэ, гъэтIылъыпIэу бгъэфедэн плъэкIыщт», — еIо къуаджэу Джамбэчые щыщ ЛIышэ Ахьмэд.

Ахьмэд адыгэ Iэпэщысэхэр пхъэм хишIыкIырэ къодыеп, ахэм якъэбар, лъэпкъым мэхьанэу ритырэр зыщигъэфедэрэр къы— Iотэныр, бэмэ зэлъаригъэшIэныр икIас. ЗекIо Iофтхьэбзэ инхэм ахэлажьэ, хьакIэу шъолъырым къихьэхэрэм мастер-классхэр афызэхещэх, ахэр лъэпкъ культурэм щегъэгъуазэх. Джы адыгэ пхъуантэу ышIыгъэри зекIомэ аригъэлъэгъурэ пкъыгъомэ ащыщ хъугъэ. Ащ дакIоу егъэжьапIэ зыфэхъугъэ пхъуантэм ишIын Адыгеими зыщиужьыжьыным щэгугъы.

Анцокъо Ирин. Сурэтыр авторым ий. .