Адыгеир апэрэхэм ащыщ
ФедерациемкIэ Советым и Тхьаматэ игуадзэу Андрей Турчак къызэриIуагъэмкIэ, 2023-рэ илъэсым Урысыем ишъолъыриблымэ арыт еджапIэхэр афагъэнэфэгъэ уахътэм ыпэу агъэцэкIэжьыгъэх. «ТфыкIэ» пшъэрылъыр зыгъэцэкIагъэхэр, процентишъэм кIэзыгъэхьагъэхэр Вологодскэ, Магаданскэ, Мурманскэ хэкухэр, Адыгеир, Ингушетиер ыкIи Санкт-Петербург.
2023-рэ илъэсым еджэпIэ 1765-рэ агъэцэкIэжьынэу рахъухьэгъагъ, непэрэ мафэм ехъулIэу 1384-мэ Iоф— шIэнхэр ащаухыгъэх. ЕджэпIэ 1535-р федеральнэ мылъкукIэ, 230-р шъолъыр ахъщэкIэ агъэцэкIэжьых.
Турчак къызэриIуагъэмкIэ, шъолъыр 46-мэ процент 90-м кIахьэу псэуалъэхэр ащагъэцэкIэжьыгъэх, ау процент 60-м нахь макIэу зэрашIылIагъэхэри ахэтых. «Ахэр объект 35-рэ мэхъух, шъолъыр 19-мэ арытых», -— къыхигъэщыгъ ФедерациемкIэ Советым и Тхьаматэ игуадзэ.