Тыгъэгъазэм и 12-р — Урысые Федерацием и Конституцие и Маф
Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр!
Тихэгъэгу итарихъ хэхьащт хъугъэ-шIэгъэшхомкIэ — Урысые Федерацием и Конституцие заштагъэр илъэс 30 зэрэхъурэмкIэ тышъуфэгушIо!
1993-рэ илъэсым тыгъэгъазэм и 12-м Урысыем ихэхъоныгъэкIэ лъэхъаныкIэр ублагъэ хъугъэ. Закон ШъхьаIэр зэраштагъэм ишIуагъэкIэ политикэ кризисыр дэгъэзыжьыгъэ хъугъэ, Урысыем исуверенитет, икъэралыгъо гъэпсыкIэ гъэпытэгъэным, чIыпIэу къыгъэгъунэрэр мыукъогъэным ар афэIорышIагъ.
Конституциер зылъэпсэ правовой шапхъэхэм амал къатыгъ уахътэм къыздихьыгъэ къиныгъохэр зэрифэшъуашэу зэшIохыгъэнхэу, яцыхьэ зытелъыжьэу ыпэкIэ лъыкIотэнхэу, экономикэмрэ социальнэ лъэныкъомрэ зэхъокIыныгъэ инхэр афэшIыгъэнхэу. Ащ общественнэ-политикэ зыпкъитыныгъэр нахь ыгъэпытагъ, цIыфхэм неущырэ мафэм яцыхьэ телъ хъугъэ.
Урысые Федерацием и Конституцие тикъэралыгъо хэхъоныгъэ егъэшIыгъэным, лIэужыкIэхэм щыIэкIэ дэгъу яIэным тапэкIи зэрафэIорышIэщтым, Адыгэ Республикэм исхэм Урысыешхор нахь зэтегъэпсыхьагъэ хъуным кIуачIэу яIэр зэрэрахьылIэщтым тицыхьэ телъ.
ТичIыпIэгъу лъапIэхэр, псауныгъэ пытэ, насыпышхо, щыIэкIэ-псэукIэ дэгъу шъуиIэнэу, IофшIэнымкIи, нэмыкI лъэныкъохэмкIи гъэхъагъэхэр шъушIынэу, шIоу щыIэр къыжъудэхъунэу шъуфэтэIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр