Исэнэхьат фэшъыпкъэу, ищыIэныгъэ гъогу медицинэм езыпхыгъэу республикэм исыр макIэп. Ахэм ащыщых Шэуджэн районым игупчэ сымэджэщ илъэсыбэ хъу­гъэу щылэжьэхэрэ ХьакIэцIыкIу Ларисэрэ Шагудж Фатимэрэ.

[caption id="attachment_142955" align="aligncenter" width="800"] Ф. Шагуджым ихъарзынэщ.[/caption]

ХьакIэцIыкIу Ларисэ 1989-рэ илъэсым къыщегъэжьагъэу ыгуи, ыпси етыгъэу, исэнэхьат хэшIыкI икъу фыриIэу, ­ищытхъу аригъаIозэ терапевтэу Iоф ащешIэ мы сымэджэщымрэ ащ хэт IэзапIэмрэ.

ШIэныгъэ куу ыкIи IэпэIэсэныгъэ ин зиIэ, гуетыныгъэ IофшIэным фызиIэ, зышъхьамысыжьырэ, иIуагъэ емыпцIы­жьырэ, укIытэрэ нэхъойрэ зыхэлъ цIыф Ларисэ. ИIофшIакIэ ХьакIэцIыкIу Ларисэ щытхъубэ къыфихьыгъ, ар псауныгъэр къэухъумэгъэнымкIэ АР-м изаслуженнэ IофышI, АР-м и Къэралыгъо Совет — Хасэм и Щытхъу тхылъ, нэмыкIхэри къыфагъэшъошагъэх.

Медицинэм ихэхъоныгъэхэм ар сыдигъуи ащыгъуаз, ахэр шIуагъэ къытэу гъэфедэгъэнхэм лъэшэу пылъ. IофшIныр шIу ылъэгъоу, ар гъунэм нигъэсэу зэрэщытым, цIыфыгъэшхо зэрэхэлъым афэшI лIэуж пчъагъэм шъхьэкIэфэныгъэ къыфашIызэ къырэкIо.

«ЗипсауныгъэкIэ щынагъо къызы­шъхьарыхьэгъэ цIыфым IэпыIэгъу уфэ­хъуныр, изытет нахьышIу пшIыныр, иуз шъхьащыпхыныр мэхьанэ зиIэ Iофышху. Терапевтым пшъэрылъэу иIэр узыр игъом къыхигъэщыныр, еIэзэгъэныр ары. Ащ дакIоу цIыфмэ диспансеризацие ятэгъэкIу, узхэр пэшIорыгъэшъэу бгъэу­нэфын амал ащ къыуеты. Зэпахырэ уз­хэм тащызыухъумэщт вакцинациер игъом ретэгъэкIокIы. ЛъыдэкIуаер 200-м нэсыгъэу, шъоущыгъоу лъым хэлъыр къафемыгъэхы зыхъукIэ, псынкIэу IэпыIэгъу цIыфым егъэгъотыгъэн фае, ар типшъэрылъ шъхьаI, — еIо ХьакIэцIыкIу Ларисэ.

Шагудж Фатимэ 1992-рэ илъэсым щегъэжьагъэу медсестра IэнатIэр егъэцакIэ. Ар илъэс 30 хъугъэу Ларисэ кIыгъоу Iоф дешIэ.

«ЦIыфхэм япсауныгъэ къэухъумэгъэ­ныр ары медицинэм Iоф щызышIэхэрэм тызыфэлажьэрэр. Врач Iазэу сызгоуцуа­гъэм илъэс 30-м сыдэгупсэфыгъэу сыдэлажьэ», — еIо Шагудж Фатимэ. Ларисэрэ Фатимэрэ пандемием илъэ­хъан ковидыр къызэутэкIыгъэхэм яIэзагъэхэм ащыщых. ХэушъхьафыкIыгъэ ковид бригадэм хэтхэу псэемыблэжьэу лэжьагъэх, IэпыIэгъу зищыкIэгъэ пстэуми якIолIагъэх, яамал къыхьырэм тетэу япшъэрылъ зэшIуахыгъ.

Илъэс 30-м къыкIоцI Ларисэрэ Фатимэрэ зы кабинет чIэсхэу ясэнэхьат фэлажьэх. ЦIыфхэр яшэнкIэ зэфэдэхэп, етIани цIыфыр сымаджэмэ, ныбжьыри хэкIотагъэмэ. Ау мыхэм нэбгырэ пэпчъ екIолIакIэ къыфагъоты. Ары пакIошъ, Iэзэгъу уцхэмкIэ зэряIазэрэм нахьи гущыIэ фабэ зищыкIагъэу, агу илъыр къыраIотыкIымэ ашIоигъоу къяуалIэрэр макIэп. Ахэр нэгушIоу сымаджэмэ апэгъокIых.

Медицинэ IэпыIэгъум нахь шIуагъэ къытынымкIэ, игъом цIыфхэм ар алъыгъэIэсыгъэнымкIэ мэхьанэшхо иI зэкIэми къатефэрэр ашIэным. Щэч хэлъэп, непэ зигугъу къэтшIыгъэ нэбгыритIум къатефэрэр хьалэлэу, щытхъу хэлъэу агъэцакIэ. ТапэкIи ящытхъу аIоу, цIыфхэр къафэразэхэу илъэсыбэрэ ясэнэхьат рылэжьэнхэу тафэлъаIо.

Лъэпшъыкъо Фатим.