Аужырэ илъэсхэм республикэм ит гурыт еджапIэхэм ыкIи кIэлэцIыкIу IыгъыпIэхэм ащыщхэм ныдэлъфыбзэр нахь игъэкIотыгъэу ащызэрагъашIэу аублагъ. Пилотнэ про­ектым техьагъэхэм ащыщ Адыгэкъалэ дэт кIэлэцIыкIу IыгъыпIэу N 3-р. Федеральнэ къэралыгъо шапхъэхэм адиштэу ныдэлъфыбзэр мыщ нахь игъэкIотыгъэу щызэрагъашIэ.

[caption id="attachment_142952" align="aligncenter" width="800"] кIэлэцIыкIу IыгъыпIэм ихъарзынэщ.[/caption]

ЯIофшIэн зэхъокIыныгъэу фэхъу­гъэхэр, ныдэлъфыбзэм икъызэтегъэ­нэжьынкIэ Iофтхьабзэу зэхащэхэрэр къытфиIотагъ кIэлэцIыкIу IыгъыпIэм икIэлэпIу шъхьаIэу Хэжъ Ларисэ.

КIэлэцIыкIу IыгъыпIэм Iоф зишIэрэм къыщегъэжьагъэу лъэпкъ нэшанэ иIэу кIэлэцIыкIухэм адыгэ шэн-хабзэхэр ахилъхьэу мэлажьэ. Непэрэ мафэм ехъулIэу нэбгырэ 89-рэ фэдиз ащ къе­кIуалIэ, ахэм янахьыбэр адыгэ унагъохэм къарыхъухьагъэх. Проектым ишIуа­гъэкIэ ноутбук, проектор, тхылъхэр, пкъы­гъо зэфэшъхьафхэр IыгъыпIэм зэ­ригъэгъотыгъэх.

— КъыткIэхъухьэрэ лIэужхэм яныдэлъфыбзэ, ятарихъ, якультурэ ашIэнымкIэ пшъэрылъхэр зэрифэшъуашэу тэ­гъэцакIэх. Пилотнэ проектымкIэ Iоф тшIэ­нэу тыкъызэрэхахыгъэр тигуапэ хъу­гъэ ыкIи ащ епхыгъэ Iофтхьабзэхэр зэхэтэщэх. Iэмэ-псымэхэр дгъэфедэхэзэ лъэпкъ нэшанэ зиIэ чIыпIэ дгъэпсыгъэ. ТикIэлэцIыкIухэм ижъыкIэ агъэфедэщтыгъэ пкъыгъохэр лъэшэу ашIогъэшIэгъоных, ахэм тарихъэу апылъыр къафэтэIуатэ, ижъырэ джэгукIэхэр ятэгъэ­лъэгъух, — еIо Ларисэ.

ТигущыIэгъу къызэрэтиIуагъэмкIэ, яIофшIэн зэхъокIыныгъэхэр фэхъугъэх. Федеральнэ къэралыгъо шапхъэхэм адиштэу Iоф ашIэ, тхьамафэм зы мафэ къыхагъафэ адыгабзэ нэмыкIкIэ мыгущыIэхэу. ДжэгукIэ шIыкIэм тетэу ныдэлъфыбзэр арагъашIэ. ЯцIыкIугъом къыщегъэжьагъэу адыгабзэм щыгъуазэхэу ахэр къэтэджых.

— Тхьамафэм зэ егъэджэн афызэхэпщагъэкIэ сабыйхэм ар ашъхьэ къинэжьыщтэп, ар къыдэтлъытэзэ, зы мэфэкI блэтымыгъэкIэу хэтэгъэунэфыкIы. Гущы­Iэм пае, адыгэ шъуашэм, адыгэ быра­къым, адыгабзэмрэ тхыбзэмрэ ямафэхэр, нэмыкIхэр зэхэтэщэх. КIэлэцIыкIу­хэм ашIогъэшIэгъонэу усэхэр зэрагъашIэ, орэдхэр къаIо, къэгъэлъэгъонхэм ахэла­жьэх. Ащ нэмыкIэу, шапхъэу пылъыр зэкIэ дгъэцакIэзэ, ижъырэ шэн-хабзэхэр къизыIотыкIырэ Iофтхьабзэхэр зэхэтэщэх, ахэм ащыщ кушъэхапхэр, лъэтегъэуцор ыкIи нэмыкIхэр, — еIо Ларисэ.

КIэлэцIыкIу IыгъыпIэм иIофышIэхэм адыгабзэм икъызэтегъэнэжьынкIэ, ­адыгэ шэн-хабзэхэр къыткIэхъухьэрэ лIэужхэм зэрагъэшIэнымкIэ илъэсым къыкIоцI бэ ашIагъэр, къихьащт илъэсми ащ мы лъэ­ныкъокIомкIэ яIофшIэн хагъэхъон гухэлъ яI.

Делэкъо Анет.